மும்பை,பிப்.27; மகாராஷ்டிர அரசியலில் பெரும் அதிர்வலைகளை ஏற்படுத்திய முன்னாள் துணை முதலமைச்சர் அஜித் பவாரின் மரணம் தொடர்பான விமான விபத்து வழக்கில், தற்போது புதிய திருப்பம் ஏற்பட்டுள்ளது. இந்த விபத்து தொடர்பாக முதல் தகவல் அறிக்கை (FIR) பதிவு செய்ய மும்பை காவல்துறை மறுப்பதாக அஜித் பவாரின் மருமகனும், எம்.எல்.ஏ-வுமான ரோகித் பவார் பகிரங்கமாகக் குற்றஞ்சாட்டியுள்ளார்.
பின்னணி என்ன?
கடந்த மாதம் (ஜனவரி) 28ஆம் தேதி பாராமதியில் நிகழ்ந்த விமான விபத்தில் அஜித் பவார் உள்ளிட்ட ஐந்து பேர் உயிரிழந்தனர். இந்தச் சம்பவம் தற்செயலான விபத்து அல்ல, இதில் சதி இருக்கலாம் என்ற சந்தேகத்தை ரோகித் பவார் தொடர்ந்து எழுப்பி வருகிறார். குறிப்பாக, விமானத்தை இயக்கிய VSR வென்ச்சர்ஸ் நிறுவனம் மற்றும் விமான போக்குவரத்து இயக்குநரகம் (DGCA) மீது அவர் அடுக்கடுக்கான புகார்களை முன்வைத்துள்ளார்.
காவல்துறை மீது ரோகித் பவாரின் குற்றச்சாட்டு
மும்பையில் உள்ள மரைன் டிரைவ் காவல் நிலையத்தில் புகார் அளிக்கச் சென்ற ரோகித் பவார், அங்கு நடந்த நிகழ்வுகளை ஊடகங்களிடம் விவரித்தார்.
அவர் கூறியதாவது: “நாங்கள் புகார் அளித்தபோது, அங்கிருந்த அதிகாரிகள் முதலில் எஃப்ஐஆர் பதிவு செய்யத் தொடங்கினர்; ஆனால், திடீரென ஒரு உயர் அதிகாரி (Additional DCP) தலையிட்டு, வழக்கை பதிவு செய்ய வேண்டாம் என உத்தரவிட்டார்; ஒரு நாட்டின் குடிமகனாக, ஒரு கிரிமினல் குற்றம் தொடர்பாக புகார் அளிக்க எனக்கு உரிமை உண்டு; ஆனால், காவல்துறை அதைத் தடுப்பது ஏன்?” என கேள்வி எழுப்பியுள்ளார்.
புகாரில் குறிப்பிடப்பட்டுள்ள முக்கிய அம்சங்கள்
ரோகித் பவார் அளித்துள்ள 20 பக்கங்கள் கொண்ட புகார் மனுவில் பின்வரும் முக்கிய விஷயங்கள் சுட்டிக்காட்டப்பட்டுள்ளன:
அலட்சியத்தால் ஏற்பட்ட மரணம்: விமான நிறுவனத்தின் கவனக்குறைவே இந்த விபத்துக்குக் காரணம்.
ஆவணங்கள் மோசடி: DGCA அதிகாரிகள் மற்றும் VSR நிறுவனம் ஆவணங்களை போலியாகத் தயாரித்துள்ளதாகக் குற்றச்சாட்டு.
பாதுகாப்பு விதிமீறல்: விமானத்தில் சட்டவிரோதமாகக் கூடுதல் எரிபொருள் டாங்கிகள் பொருத்தப்பட்டிருந்ததாக ரோகித் பவார் சந்தேகிக்கிறார்.
பதவி விலகல் கோரிக்கை: இந்த விவகாரத்தில் முறையான விசாரணை நடக்க விமான போக்குவரத்துத் துறை அமைச்சர் ராம் மோகன் நாயுடு பதவி விலக வேண்டும் என்றும் ரோகித் பவார் வலியுறுத்தியுள்ளார்.
மாநில சிஐடி (State CID) விசாரணைக்கு மாற்றம்
மும்பை காவல்துறை எஃப்ஐஆர் பதிவு செய்யாத நிலையில், தற்போது ரோகித் பவாரின் புகார் மனு மாநில குற்றப் புலனாய்வுத் துறைக்கு (State CID) மாற்றப்பட்டுள்ளது. ஏற்கனவே பாராமதி காவல்துறையினர் இந்த விபத்து குறித்து ‘தற்செயலான மரணம்’ (Accidental Death Report) எனப் பதிவு செய்துள்ளதால், இந்த மனுவையும் அதனுடன் இணைத்து விசாரணை நடத்தப்படும் எனத் தெரிகிறது.
அஜித் பவார் மரணம்; குடும்பத்தினரே சந்தேகம்-மாநில அரசுக்கு நெருக்கடி
அஜித் பவாரின் மரணம் மகாராஷ்டிர அரசியலில் ஒரு பெரிய வெற்றிடத்தை ஏற்படுத்தியுள்ளது. இந்நிலையில், அவரது குடும்பத்தினரே இந்த விபத்தில் மர்மம் இருப்பதாகக் கூறுவது மாநில அரசுக்குக் கூடுதல் நெருக்கடியை ஏற்படுத்தியுள்ளது. சிஐடி விசாரணையில் இந்த விபத்தின் பின்னணியில் உள்ள உண்மைகள் வெளிவருமா என்பதைப் பொறுத்திருந்துதான் பார்க்க வேண்டும்.