அட்லாண்டா,ஜன.24; அமெரிக்காவின் ஜார்ஜியா மாகாணம், அட்லாண்டாவில் உள்ள லாரன்ஸ்வில்லே (Lawrenceville) பகுதியில் நிகழ்ந்த துப்பாக்கிச் சூடு சம்பவம் இந்தியர்களிடையே பெரும் அதிர்ச்சியை ஏற்படுத்தியுள்ளது. குடும்பத் தகராறு காரணமாக நடந்த மோதலில், இந்தியப் பெண் ஒருவர் உட்பட மொத்தம் நான்கு பேர் உயிரிழந்துள்ளனர்.
லாரன்ஸ்வில்லேயில் நடந்தது என்ன?
அட்லாண்டாவின் குவினெட் கவுண்டி (Gwinnett County) பகுதியில் உள்ள ஒரு குடியிருப்பில் இந்தத் துயரம் நிகழ்ந்துள்ளது. காவல்துறை விசாரணையின்படி, 51 வயதான விஜய் குமார் என்பவர் இந்தத் தாக்குதலை நடத்திய முக்கிய சந்தேக நபராக அடையாளம் காணப்பட்டுள்ளார். இந்தச் சம்பவத்தில் விஜய் குமாரின் மனைவி மீமு டோக்ரா (43) மற்றும் அவர்களது உறவினர்களான கௌரவ் குமார் (33), நிதி சந்தர் (37), ஹரிஷ் சந்தர் (38) ஆகியோர் சுட்டுக்கொல்லப்பட்டனர்.
தப்பித்த குழந்தைகள்: பீதியில் உறைந்த 911 அழைப்பு
சம்பவம் நடந்த போது அந்த வீட்டில் மூன்று குழந்தைகள் (12, 7 மற்றும் 9 வயதுடையவர்கள்) இருந்துள்ளனர். துப்பாக்கிச் சூடு சத்தம் கேட்டவுடன் உயிரைக் காத்துக்கொள்ள குழந்தைகள் அலமாரிக்குள் (Closet) ஒளிந்து கொண்டுள்ளனர். சந்தேக நபரான விஜய் குமாரின் 12 வயது மகன் தான், தைரியமாக 911 என்ற அவசர எண்ணுக்கு அழைத்து போலீசாருக்குத் தகவல் தெரிவித்துள்ளான். போலீசார் அங்கு சென்றபோது நான்கு பேர் சடலமாகக் கிடப்பதைக் கண்டு அதிர்ச்சியடைந்தனர்.
கொலையின் பின்னணி: இந்தியத் தூதரகம் தகவல்
துப்பாக்கியால் சுட்ட விஜயகுமார் இந்தியர் என்பதை அட்லாண்டாவில் உள்ள இந்தியத் தூதரகம் உறுதி செய்துள்ளது. மற்றவர்கள் பெயரை வைத்துப் பார்க்கும்போது அவர்களும் இந்தியர்களாகத் தான் இருக்க வேண்டும் என்றும் தூதரக அதிகாரிகள் கூறியுள்ளனர்.
கொடூரச் சம்பவம் தொடர்பாக எக்ஸ் தளத்தில் பதிவிட்டுள்ள இந்திய தூதரகம், “குடும்பத் தகராறு காரணமாக நடந்த இந்தத் துப்பாக்கிச் சூடு சம்பவத்தில் இந்திய நாட்டவர் ஒருவர் பலியானது ஆழ்ந்த வருத்தத்தை அளிக்கிறது. உயிரிழந்தவர்களின் குடும்பத்தினருக்குத் தேவையான அனைத்து உதவிகளும் வழங்கப்பட்டு வருகின்றன” எனத் தெரிவித்துள்ளது.
விசாரணையில், விஜய் குமார் மற்றும் அவரது மனைவி மீமு டோக்ரா இடையே அவர்களது வீட்டில் ஏற்கனவே வாக்குவாதம் ஏற்பட்டுள்ளது. அதன் பின்னரே அவர்கள் உறவினர் வீட்டிற்குச் சென்றுள்ளனர், அங்கு இந்தத் துயரம் அரங்கேறியுள்ளது.
கொலையாளி கைது: சட்ட நடவடிக்கை
தாக்குதல் நடத்திய விஜய் குமாரை போலீசார் அந்தப் பகுதிக்கு அருகிலேயே கைது செய்தனர். அவர் மீது கொலைக் குற்றம், கொடூரமான தாக்குதல் மற்றும் குழந்தைகளுக்கு எதிரான வன்கொடுமை உள்ளிட்ட பிரிவுகளின் கீழ் வழக்குப்பதிவு செய்யப்பட்டுள்ளது. தற்போது அவர் சிறையில் அடைக்கப்பட்டுள்ளார்.
வன்முறைக்கு இட்டுச்சென்ற குடும்பப் பிரச்னை
அந்நிய தேசத்தில் இந்திய வம்சாவளியைச் சேர்ந்த ஒரு குடும்பமே சிதைந்து போனது மிகுந்த சோகத்தை ஏற்படுத்தியுள்ளது. குடும்பப் பிரச்னைகள் இவ்வளவு பெரிய வன்முறைக்கு இட்டுச் சென்றிருப்பது சமூகத்தில் அதிர்ச்சியை ஏற்படுத்தியுள்ளது. உயிரிழந்தவர்களின் குடும்பத்தினருக்கு அட்லாண்டா வாழ் இந்தியர்கள் மற்றும் தூதரகம் தொடர்ந்து ஆதரவளித்து வருகிறது.