ஆஸ்திரேலியாவிற்கு எதிரான டெஸ்ட் போட்டி; நட்சத்திர வீராங்கனைகளுடன் களமிறங்கும் இந்திய மகளிர் அணி!

டெல்லி, ஜன.24; ஆஸ்திரேலிய மகளிர் அணிக்கு எதிராக நடைபெறவுள்ள வரலாற்று சிறப்புமிக்க ஒரே (One-off) டெஸ்ட் போட்டிக்கான இந்திய மகளிர் அணியை கிரிக்கெட் கட்டுப்பாடு வாரியம் அறிவித்துள்ளது. அனுபவம் மற்றும் இளமை கலந்த ஒரு வலுவான அணியை இந்தியா இம்முறை தேர்வு செய்துள்ளது.

கேப்டன் ஹர்மன்பிரீத் கவுர் தலைமையில் இந்திய அணி

பெர்த் நகரில் உள்ள வரலாற்றுச் சிறப்புமிக்க ‘வாக்கா’ (WACA) மைதானத்தில் மார்ச் 6 ஆம் தேதி தொடங்கும் இந்த டெஸ்ட் போட்டிக்கு ஹர்மன்பிரீத் கவுர் கேப்டனாக நியமிக்கப்பட்டுள்ளார். அதிரடி தொடக்க வீராங்கனை ஸ்மிருதி மந்தனா துணை கேப்டனாகச் செயல்படுவார். உலக சாம்பியன்களாக உருவெடுத்த பிறகு, இந்திய அணி ஆஸ்திரேலியாவை அவர்களின் சொந்த மண்ணில் எதிர்கொள்வது பெரும் எதிர்பார்ப்பை ஏற்படுத்தியுள்ளது.

அறிமுக வீராங்கனைகளுக்கு ஜாக்பாட்!

இந்த டெஸ்ட் தொடரில் பல புதுமுகங்களுக்கு வாய்ப்பளிக்கப்பட்டுள்ளது. பேட்ஸ் உமன் பிரதிகா ராவல், வேகப்பந்து வீச்சாளர் கிராந்தி கௌட், ஆல்-ரவுண்டர் அமன்ஜோத் கவுர் மற்றும் விக்கெட் கீப்பர்-பேட்ஸ் உமன் உமா செத்ரி ஆகியோர் தங்களது முதல் டெஸ்ட் அழைப்பைப் பெற்றுள்ளனர். இவர்களுடன் ஹர்லீன் தியோல், சாயலி சத்கரே மற்றும் சுழற்பந்து வீச்சாளர் வைஷ்ணவி சர்மா ஆகியோரும் அணியில் சேர்க்கப்பட்டுள்ளனர்.

இந்திய டெஸ்ட் அணி விவரம்:

ஹர்மன்பிரீத் கவுர் (C), ஸ்மிருதி மந்தனா (VC), ஷஃபாலி வர்மா, ஜெமிமா ரோட்ரிக்ஸ், அமன்ஜோத் கவுர், ரிச்சா கோஷ் (WK), உமா செத்ரி (WK), பிரதிகா ராவல், ஹர்லீன் தியோல், தீப்தி சர்மா, ரேணுகா சிங் தாக்கூர், ஸ்னே ராணா, கிராந்தி கௌட், வைஷ்ணவி சர்மா, சாயலி சத்கரே.

ஆஸ்திரேலியாவின் சவால் மற்றும் அலிசா ஹீலியின் ஓய்வு

ஆஸ்திரேலிய மண்ணில் விளையாடுவது எப்போதுமே கடினமான சவாலாகும். மேலும், இந்தத் தொடர் ஆஸ்திரேலிய ஜாம்பவான் அலிசா ஹீலியின் கடைசி சர்வதேசத் தொடராக அமையவிருப்பது குறிப்பிடத்தக்கது. இதற்கு முன்னதாக பிப்ரவரி 15 முதல் மூன்று டி20 மற்றும் மூன்று ஒருநாள் போட்டிகள் நடைபெறவுள்ளன.

இந்திய மகளிர் அணியின் ஆட்டங்களைக்காண ரசிகர்கள் ஆர்வம்

இந்திய மகளிர் அணி சமீபகாலமாக அபாரமான ஆட்டத்தை வெளிப்படுத்தி வருகிறது. குறிப்பாக டெஸ்ட் கிரிக்கெட்டில் இந்திய வீராங்கனைகளின் நிதானமும், ஆக்ரோஷமும் ரசிகர்களை ஈர்த்துள்ளது. ஆஸ்திரேலியாவின் வேகப்பந்து வீச்சுக்கு சாதகமான ஆடுகளங்களில் இந்திய நட்சத்திரங்கள் எவ்வாறு செயல்படுவார்கள் என்பதைப் பொறுத்திருந்து பார்ப்போம்.