ஆஸ்திரேலிய ஓபன் டென்னிஸ்; காயத்தையும் தாண்டி இறுதிப்போட்டிக்குள் நுழைந்தார் கார்லோஸ் அல்காரஸ்!

மெல்போர்ன்,ஜன.30; மெல்போர்னில் இன்று (30.01.2026)நடைபெற்ற ஆஸ்திரேலிய ஓபன் ஆடவர் ஒற்றையர் பிரிவின் பரபரப்பான முதலாவது அரையிறுதிப் போட்டியில், உலகின் முதல் நிலை வீரரான கார்லோஸ் அல்காரஸ், ஜெர்மனியின் அலெக்சாண்டர் ஸ்வெரெவ்வை வீழ்த்தி முதல்முறையாக ஆஸ்திரேலிய ஓபன் இறுதிப்போட்டிக்கு தகுதி பெற்றுள்ளார்.

5 மணி நேரம் நீடித்த அசராத போர்

சுமார் 5 மணி நேரம் 27 நிமிடங்கள் நீடித்த இந்த மாரத்தான் ஆட்டத்தில், அல்காரஸ் 6-4, 7-6(5), 6-7(3), 6-7(4), 7-5 என்ற செட் கணக்கில் போராடி வெற்றி பெற்றார். இது ஆஸ்திரேலிய ஓபன் வரலாற்றிலேயே மூன்றாவது மிக நீண்ட அரையிறுதிப் போட்டியாக பதிவாகியுள்ளது.

காயமும் விடாமுயற்சியும்

போட்டியின் முதல் இரண்டு செட்களை அல்காரஸ் கைப்பற்றிய போதிலும், மூன்றாவது செட்டின் போது அவருக்கு காலில் தசைப்பிடிப்பு ஏற்பட்டது. இதனால் அவரது வேகம் குறைந்தது. இந்த வாய்ப்பைப் பயன்படுத்திக் கொண்ட ஸ்வெரெவ், அடுத்த இரண்டு செட்களையும் டை-பிரேக்கரில் வென்று ஆட்டத்தை ஐந்தாவது செட்டிற்கு கொண்டு சென்றார்.

ஐந்தாவது செட்டில் ஸ்வெரெவ் 5-4 என முன்னிலையில் இருந்து வெற்றியை நெருங்கினார். ஆனால், மன உறுதியை தளரவிடாத அல்காரஸ், அடுத்தடுத்து கேம்களை வென்று 7-5 என செட்டைக் கைப்பற்றி வரலாற்று வெற்றியைப் பதிவு செய்தார்.

வரலாற்றின் விளிம்பில் அல்காரஸ்

இந்த வெற்றியின் மூலம் 22 வயதான அல்காரஸ், தனது முதல் ஆஸ்திரேலிய ஓபன் இறுதிப் போட்டிக்கு முன்னேறியுள்ளார். நாளை மறுதினம் ஞாயிற்றுக்கிழமை (01.02.2026)நடைபெறவுள்ள இறுதிப்போட்டியில் அவர் வெற்றி பெற்றால், டென்னிஸ் வரலாற்றில் ‘கேரியர் கிராண்ட் ஸ்லாம்’ (Career Grand Slam) பட்டத்தை வென்ற மிக இளவயது வீரர் என்ற சாதனையை படைப்பார்.

இறுதிப் போட்டியில் யாருடன் மோதுவார் அல்காரஸ்?

“உங்களை நீங்களே நம்ப வேண்டும்” என வெற்றிக்கு பின் நெகிழ்ச்சியுடன் பேசிய அல்காரஸ், இப்போது மெல்போர்னின் புதிய ராஜாவாக உருவெடுத்துள்ளார். இறுதிப்போட்டியில் அவர் ஜானிக் சின்னர் அல்லது நோவக் ஜோகோவிச் ஆகியோரில் ஒருவரை எதிர்கொள்ள உள்ளார். ஒட்டுமொத்த டென்னிஸ் உலகமே இந்த இறுதிப் போருக்காக ஆவலுடன் காத்திருக்கிறது.