டெல்லி.பிப்.13; டி20 உலகக கோப்பையில் கிரிக்கெட் ரசிகர்களின் பெரும் எதிர்பார்ப்புக்கு மத்தியில், இந்தியா மற்றும் பாகிஸ்தான் அணிகள் மோதவுள்ளன. இந்த போட்டியில் பாகிஸ்தான் அணியின் சுழற்பந்து வீச்சாளர் உஸ்மான் தாரிக்கை இந்திய பேட்ஸ்மேன்கள் எவ்வாறு எதிர்கொள்ளப் போகிறார்கள் என்ற கேள்வி எழுந்துள்ளது. இதற்கு இந்திய விக்கெட் கீப்பர்-பேட்ஸ்மேன் இஷான் கிஷன் மிகத் தெளிவான பதிலை அளித்துள்ளார்.
நமீபியாவுக்கு எதிரான வெற்றிக்கு பின் இஷான் கிஷனின் விளக்கம்
டெல்லியில் நேற்று (12.02.2026) நமீபியா அணிக்கு எதிரான போட்டியில் 93 ரன்கள் வித்தியாசத்தில் இந்தியா அபார வெற்றி பெற்றது. இந்த வெற்றிக்குப் பிறகு பேசிய இஷான் கிஷன், பாகிஸ்தான் சுழற்பந்து வீச்சாளர் உஸ்மான் தாரிக்குக்கு எதிராக இந்திய அணி ஏற்கனவே தயாராகிவிட்டதாகக் கூறினார்.
நமீபியா கேப்டன் கெர்ஹார்ட் எராஸ்மஸ், உஸ்மான் தாரிக் போன்றே ‘சைடு ஆர்ம்’ (Sidearm) ஆக்சனில் பந்து வீசக்கூடியவர். இப்போட்டியில் எராஸ்மஸின் பந்துவீச்சை எதிர்கொண்டது, தாரிக்கை எதிர்கொள்வதற்கு ஒரு சிறந்த பயிற்சியாக அமைந்ததாக கிஷன் குறிப்பிட்டார்.
வீடியோக்கள் மூலம் வியூகம்
“உஸ்மான் தாரிக்கை எதிர்கொள்வதற்கான தயாரிப்புகள் ஏற்கனவே முடிந்துவிட்டன; இப்போது களத்தில் பந்தைக் கவனித்து எங்களது இயல்பான ஆட்டத்தை விளையாடுவது மட்டுமே எஞ்சியுள்ளது” என்று இஷான் கிஷன் கூறினார்.
மேலும், நவீன கிரிக்கெட்டில் வீடியோ பகுப்பாய்வு முக்கிய பங்கு வகிப்பதாக அவர் தெரிவித்தார். ஒரு வீரரின் பந்துவீச்சு முறையை வீடியோக்கள் மூலம் பார்த்து அவர் எத்தகைய பந்துகளை வீசுவார் என்பதை முன்கூட்டியே கணிக்க முடிவதாகவும், இதனால் பெரிய அளவில் தனிப்பட்ட பயிற்சிகள் தேவையில்லை என்றும் அவர் விளக்கினார்.
மாறிய இஷான் கிஷன்: புதிய மனநிலை
தனது ஆட்டம் மற்றும் மனநிலை குறித்துப் பேசிய கிஷன், தான் இப்போது ஒரு “மாற்றமடைந்த மனிதன்” என்று கூறினார். முன்பு எப்போதும் கேலி கிண்டல் செய்து கொண்டிருந்த தான், இப்போது கிரிக்கெட் மற்றும் விக்கெட் கீப்பிங்கில் அதிக கவனம் செலுத்துவதாகத் தெரிவித்தார். ஜார்கண்ட் அணிக்காக சையத் முஷ்டாக் அலி கோப்பையை வென்றது அவருக்கு பெரும் தன்னம்பிக்கையை அளித்துள்ளது.
நமீபியாவுக்கு எதிரான போட்டியில் 24 பந்துகளில் 61 ரன்கள் குவித்து இஷான் கிஷன் தனது ஃபார்மை நிரூபித்துள்ளார். அதேபோல் ஹர்திக் பாண்ட்யாவும் அதிரடி காட்டியுள்ளார். தற்போது குரூப் ஏ பிரிவில் இந்தியா முதலிடத்தில் உள்ளது. பிப்ரவரி 15 அன்று நடைபெறவுள்ள பாகிஸ்தானுக்கு எதிரான மெகா மோதலில், உஸ்மான் தாரிக்கின் சுழற்பந்து சவாலை இந்திய பேட்ஸ்மேன்கள் தகர்த்தெறிவார்களா என்பதைப் பொறுத்திருந்து பார்ப்போம்.