டெஹ்ரான்,மார்ச்.17; ஈரானின் நீண்டகால உயர் தலைவராக இருந்த அயதுல்லா அலி கமேனி, கடந்த பிப்ரவரி 28 அன்று இஸ்ரேல் நடத்திய வான்வழித் தாக்குதலில் கொல்லப்பட்டார். இந்தத் தாக்குதல் ஈரானையே உலுக்கிய நிலையில், அவரது மகனும் தற்போதைய புதிய உயர் தலைவருமான மொஜ்தபா கமேனி (Mojtaba Khamenei) மரணத்தின் விளிம்பிலிருந்து எப்படித் தப்பினார் என்பது குறித்த திடுக்கிடும் தகவல்கள் தற்போது வெளியாகியுள்ளன.
அலி கமேனியை வீழ்த்திய ‘புளூ ஸ்பாரோ’ ஏவுகணை
இஸ்ரேலின் ‘ஆபரேஷன் எபிக் ஃபியூரி’ (Operation Epic Fury) திட்டத்தின் கீழ், விண்வெளியின் எல்லை வரை சென்று தாக்கும் திறன் கொண்ட அதிநவீன ‘புளூ ஸ்பாரோ’ (Blue Sparrow) ஏவுகணைகள் பயன்படுத்தப்பட்டன. டெஹ்ரானில் உள்ள கமேனியின் பலத்த பாதுகாப்பு கொண்ட பதுங்கு குழியைத் தகர்க்கும் வகையில் இந்தத் தாக்குதல் திட்டமிடப்பட்டது. மொசாட் மற்றும் இஸ்ரேலிய உளவுத்துறையின் பல ஆண்டுகால கண்காணிப்பிற்குப் பிறகு, அலி கமேனி தனது உயர்மட்ட அதிகாரிகளுடன் தரைக்கு மேலே சந்திப்பு நடத்திய தருணத்தில் இந்தத் தாக்குதல் நடத்தப்பட்டது.
நொடிப்பொழுதில் தப்பிய மொஜ்தபா; கசிந்த ஆடியோ தகவல்
சமீபத்தில் கசிந்த ஈரான் அதிகாரிகளின் ரகசிய ஆடியோ பதிவின்படி, தாக்குதல் நடப்பதற்கு சில விநாடிகளுக்கு முன்பு வரை மொஜ்தபா கமேனி தனது தந்தையுடன் அதே கட்டடத்தில்தான் இருந்துள்ளார்.
தாக்குதல் நடப்பதற்குச் சரியாக 9:00 மணியளவில், “ஏதோ ஒரு வேலை இருக்கிறது” என்று கூறிவிட்டு மொஜ்தபா கட்டடத்தை விட்டு வெளியே முற்றத்திற்குச் சென்றுள்ளார். அவர் வெளியேறிய சில நொடிகளில், முதல் ஏவுகணை அலி கமேனி இருந்த பகுதியைத் தாக்கியது.
“இறைவனின் விருப்பப்படிதான் மொஜ்தபா உயிர் தப்பினார். அவர் மாடிப் படிக்கட்டுகளில் ஏறிக்கொண்டிருந்தபோது ஏவுகணை தாக்கியது” என்று அந்த ஆடியோவில் ஈரான் அதிகாரி மசாஹர் ஹொசைனி என்பவர் குறிப்பிடுகிறார்.
குடும்பத்தில் ஏற்பட்ட இழப்புகள்
மொஜ்தபா உயிர் தப்பினாலும், அவரது காலில் சிறிய காயம் ஏற்பட்டதாகக் கூறப்படுகிறது. இருப்பினும், இந்தத் தாக்குதலில் அலி கமேனியுடன் சேர்ந்து மொஜ்தபாவின் மனைவி சஹ்ரா ஹதாத்-அடெல் மற்றும் அவர்களது மகனும் கொல்லப்பட்டனர். ஈரானின் புதிய தலைவராகப் பொறுப்பேற்றுள்ள மொஜ்தபா, தனது குடும்பத்தையே இழந்த துயரத்தோடு தற்போது நாட்டை வழிநடத்தி வருகிறார்.
மர்மமாக இருக்கும் மொஜ்தபாவின் இருப்பிடம்
புதிய உயர் தலைவராக அறிவிக்கப்பட்ட பின்னரும், மொஜ்தபா கமேனி இதுவரை பொதுமக்களின் முன்னால் தோன்றவில்லை. அவர் தீவிர சிகிச்சையில் இருப்பதாகவும் அல்லது பாதுகாப்பான ரகசிய இடத்தில் தங்கியிருப்பதாகவும் பல்வேறு தகவல்கள் பரவி வருகின்றன. அமெரிக்க அதிபர் டொனால்ட் டிரம்ப் கூட, “அவர் உயிருடன் இருக்கிறாரா அல்லது கொல்லப்பட்டாரா என்பது உறுதியாகத் தெரியவில்லை” என்று சமீபத்தில் கருத்து தெரிவித்தது குறிப்பிடத்தக்கது.
மொஜ்தபா தப்பியது தற்செயலானதா? (அ) திட்டமிடப்பட்டதா?
ஈரான் மற்றும் இஸ்ரேல் இடையேயான போர் உச்சகட்டத்தை எட்டியுள்ள நிலையில், மொஜ்தபா கமேனியின் வருகை ஈரானின் எதிர்காலத்தை மாற்றியமைக்கும் என்று எதிர்பார்க்கப்படுகிறது. ‘புளூ ஸ்பாரோ’ தாக்குதலில் இருந்து அவர் தப்பியது ஒரு தற்செயலான நிகழ்வா அல்லது திட்டமிடப்பட்டதா என்பது இன்னும் மர்மமாகவே உள்ளது. மத்திய கிழக்கில் நிலவும் இந்த போர் பதற்றம் உலக நாடுகளிடையே பெரும் கவலையை ஏற்படுத்தியுள்ளது.