டெஹ்ரான்,ஜன.14; ஈரானில் நிலவி வரும் பதற்றமான சூழலுக்கு மத்தியில், அமெரிக்க அதிபர் டொனால்ட் டிரம்ப் அந்த நாட்டு போராட்டக்காரர்களுக்கு ஆதரவாகவும், ஈரான் அரசுக்கு எச்சரிக்கையாகவும் சில முக்கிய கருத்துகளைத் தெரிவித்துள்ளார். இது சர்வதேச அரசியலில் பெரும் பரபரப்பை ஏற்படுத்தியுள்ளது.
போராட்டக்காரர்களுக்கு டிரம்பின் அறிவுறுத்தல்
ஈரானில் அதிகரித்து வரும் விலைவாசி மற்றும் பொருளாதார நெருக்கடிக்கு எதிராக மக்கள் வீதியில் இறங்கிப் போராடி வருகின்றனர். இந்நிலையில், தனது சமூக வலைதளப் பக்கத்தில் பதிவிட்டுள்ள டிரம்ப், “ஈரானிய தேசப்பற்றாளர்களே, உங்கள் போராட்டத்தைத் தொடருங்கள். உங்கள் நாட்டின் நிறுவனங்களைக் கைப்பற்றுங்கள்” என்று அழைப்பு விடுத்துள்ளார். மேலும், “உதவி வரப்போகிறது” (Help is on the way) என்ற வாசகத்தையும் அவர் அழுத்மாகக் குறிப்பிட்டுள்ளார்.
ஈரான் அதிகாரிகளுடன் பேச்சுவார்த்தை ரத்து
ஈரானில் போராட்டக்காரர்கள் மீது நடத்தப்படும் தாக்குதல்கள் மற்றும் உயிரிழப்புகளைச் சுட்டிக்காட்டிய டிரம்ப், ஈரானிய அதிகாரிகளுடன் திட்டமிடப்பட்டிருந்த அனைத்து உயர்தர சந்திப்புகளையும் ரத்து செய்துள்ளதாக அறிவித்துள்ளார். “மக்களைக் கொல்லும் செயல் நிறுத்தப்படும் வரை அவர்களுடன் எந்தப் பேச்சுவார்த்தையும் கிடையாது” என்று அவர் திட்டவட்டமாகக் கூறியுள்ளார்.
குற்றமிழைப்பவர்களுக்கு ‘பெரிய விலை’ காத்திருக்கிறது
போராட்டத்தின் போது மக்கள் மீது தாக்குதல் நடத்துபவர்கள் மற்றும் கொலை செய்பவர்களின் பெயர்களைப் பட்டியலிட்டுப் பாதுகாப்பாக வைக்குமாறு டிரம்ப் போராட்டக்காரர்களைக் கேட்டுக்கொண்டுள்ளார். “அவர்கள் அனைவரும் தங்கள் செயலுக்காகப் பெரிய விலையைக் கொடுக்க வேண்டியிருக்கும்” என்று எச்சரித்துள்ள டிரம்ப், இது ஒரு எச்சரிக்கை மட்டுமல்ல, விரைவில் இதற்கான நடவடிக்கைகள் எடுக்கப்படும் என்பதையும் குறிப்பாகச் சுட்டிக்காட்டியுள்ளார்.
டிரம்பின் கருத்துக்கு ஈரான் அரசின் எதிர்வினை
டிரம்பின் இந்தக் கருத்துகளுக்கு ஈரான் கடும் கண்டனம் தெரிவித்துள்ளது. அமெரிக்கா தனது உள்நாட்டு விவகாரங்களில் தலையிடுவதாகவும், இது பிராந்திய அமைதியைக் குலைக்கும் செயல் என்றும் ஈரான் குற்றஞ்சாட்டியுள்ளது. இதற்கிடையில், ஈரானில் இணையச் சேவைகள் முடக்கப்பட்டுள்ளதால், அங்கிருந்து வரும் செய்திகள் உலகிற்குத் தெரியாமல் தடுக்கப்படுவதாகவும் மனித உரிமை அமைப்புகள் கவலை தெரிவித்துள்ளன.
டிரம்பின் தலையீடு; ஈரானுக்கு அதிகரிக்கும் சர்வதேச நெருக்கடி
ஈரான் மக்களின் நீண்டகாலப் போராட்டம் தற்போது உச்சத்தை எட்டியுள்ளது. டொனால்ட் டிரம்பின் இந்த அதிரடித் தலையீடு மற்றும் ‘உதவி வரும்’ என்ற வாக்குறுதி, ஈரானிய அரசுக்கு சர்வதேச அளவில் அழுத்தத்தைக் கொடுத்துள்ளது. அமெரிக்காவின் அடுத்தகட்ட நடவடிக்கை ராணுவ ரீதியானதா அல்லது பொருளாதார ரீதியானதா என்பதைப் பொறுத்திருந்துதான் பார்க்க வேண்டும்.