உலகை உலுக்கிய சிட்னி கடற்கரை துப்பாக்கிச்சூடு சம்பவம்; முதன்முறையாக நீதிமன்றத்தில் ஆஜரான நவீத் அக்ரம் -வீடியோ ஆதாரங்கள் சமர்ப்பிப்பு!

சிட்னி,பிப்.16; ஆஸ்திரேலியாவின் சிட்னி நகரில் உள்ள போண்டி கடற்கரையில் (Bondi Beach) கடந்த டிசம்பர் மாதம் நடந்த மிக மோசமான துப்பாக்கிச் சூடு சம்பவம் தொடர்பாக கைது செய்யப்பட்ட நவீத் அக்ரம் (Naveed Akram) முதன்முறையாக நீதிமன்றத்தில் ஆஜரானார்.

நீதிமன்றத்தில் நடந்தது என்ன?

சிட்னியின் டவுனிங் சென்டர் உள்ளூர் நீதிமன்றத்தில் (Downing Centre Local Court) காணொளி காட்சி வாயிலாக நவீத் அக்ரம் ஆஜர்படுத்தப்பட்டார். சிறையில் இருந்து பச்சை நிற ஜெர்சி அணிந்து தோன்றிய அவர், நீதிபதியின் கேள்விகளுக்கு மிகச் சுருக்கமாக “Yeah” (ஆம்) என்று மட்டுமே பதிலளித்தார். பாதிக்கப்பட்டவர்களின் அடையாளங்களை ரகசியமாக வைப்பது தொடர்பான உத்தரவுகளை அவர் கேட்டறிந்தாரா என்ற கேள்விக்கே அவர் இவ்வாறு பதிலளித்தார்.

சுமத்தப்பட்டுள்ள கடுமையான குற்றச்சாட்டுகள்

24 வயதான நவீத் அக்ரம் மீது பயங்கரவாதம், 15 கொலைக் குற்றச்சாட்டுகள் மற்றும் கொலை செய்யும் நோக்கில் பலரை காயப்படுத்தியது என மொத்தம் 59 குற்றச்சாட்டுகள் பதிவு செய்யப்பட்டுள்ளன. இந்த தாக்குதல் கடந்த டிசம்பர் 14 ஆம் தேதியன்று யூதர்களின் ஹனுக்கா (Hanukkah) என்ற பண்டிகை கொண்டாட்டத்தின் போது நடத்தப்பட்டது. நவீத்துடன் இணைந்து தாக்குதலில் ஈடுபட்ட இவரது தந்தை சஜித் அக்ரம் (Sajid akram), காவல்துறையினரால் சுட்டுக்கொல்லப்பட்டார் என்பது குறிப்பிடத்தக்கது.

திட்டமிட்ட பயங்கரவாத தாக்குதல்

காவல்துறையின் விசாரணையில், தந்தை மற்றும் மகன் இருவரும் இந்த தாக்குதலை பல மாதங்களாக மிகவும் நுணுக்கமாகத் திட்டமிட்டது தெரியவந்துள்ளது. இவர்கள் தாக்குதலுக்கு முன்னதாக துப்பாக்கிச் சுடும் பயிற்சி மேற்கொண்ட புகைப்படங்கள் மற்றும் ஐஎஸ் அமைப்பின் சித்தாந்தங்களால் ஈர்க்கப்பட்டு எடுக்கப்பட்ட வீடியோ ஆதாரங்கள் நீதிமன்றத்தில் சமர்ப்பிக்கப்பட்டுள்ளன.

நவீத் அக்ரமின் வழக்கறிஞர் பென் ஆர்ச்போல்ட் (Ben Archbold) கூறுகையில், தனது கட்சிக்காரர் தற்போது மிகக் கடுமையான சிறை விதிமுறைகளின் கீழ் வைக்கப்பட்டுள்ளார் என்றும், அவர் குற்றத்தை ஒப்புக்கொள்கிறாரா இல்லையா என்பது குறித்து இப்போதே கூற முடியாது என்றும் தெரிவித்தார்.

ஆஸ்திரேலிய மக்களை அதிர்ச்சியில் உறைய வைத்த சம்பவம்

ஆஸ்திரேலியாவில் கடந்த 30 ஆண்டுகளில் இல்லாத வகையில் நடந்த இந்த மிகப்பெரிய துப்பாக்கிச் சூடு சம்பவம் அந்நாட்டு மக்களிடையே பெரும் அதிர்ச்சியை ஏற்படுத்தியது. இந்த வழக்கின் அடுத்தக்கட்ட விசாரணை வரும் மார்ச் 9ஆம் தேதி நடைபெற உள்ளது. இச்சம்பவம் ஆஸ்திரேலியாவில் துப்பாக்கி உரிமம் மற்றும் பாதுகாப்பு சட்டங்களை மேலும் வலுப்படுத்த வேண்டியதன் அவசியத்தை உணர்த்தியுள்ளது.