டெல்லி,மார்ச்.02; தமிழ்நாடு சட்டப்பேரவைத் தேர்தல் களம் சூடுபிடித்துள்ள நிலையில், அதிமுக பொதுச்செயலாளர் எடப்பாடி பழனிசாமியின் திடீர் டெல்லி பயணம் அரசியல் வட்டாரத்தில் பெரும் விவாதத்தை ஏற்படுத்தியுள்ளது. தொகுதிப் பங்கீடு மற்றும் கூட்டணி விவகாரங்களில் நிலவும் இழுபறியே இந்தப் பயணத்திற்கு முக்கியக் காரணமாகப் பார்க்கப்படுகிறது.
தொகுதிப் பங்கீட்டில் சிக்கல்
அதிமுக தலைமையிலான கூட்டணியில் பாஜக, பாமக, தமாகா உள்ளிட்ட பல கட்சிகள் இடம் பெற்றுள்ளன. ஆனால், திமுக கூட்டணியில் தொகுதிப் பங்கீடு ஒப்பந்தங்கள் கையெழுத்தாகத் தொடங்கிவிட்ட நிலையில், அதிமுக கூட்டணியில் இன்னும் பேச்சுவார்த்தைக் குழு கூட அமைக்கப்படவில்லை.
35 தொகுதிகளைக் கேட்கும் பாரதிய ஜனதா!
குறிப்பாக, கடந்த முறை 20 இடங்களில் போட்டியிட்ட பாஜக இந்த முறை 35 தொகுதிகளைக் கேட்பதும், பாமக 18 தொகுதிகளைக் கேட்பதும் அதிமுக தலைமைக்குச் சிக்கலை ஏற்படுத்தியுள்ளது. கூட்டணி கட்சிகளின் கோரிக்கையை ஏற்றால், அதிமுக 153 இடங்களுக்குக் குறைவாகவே போட்டியிட வேண்டிய சூழல் உருவாகும். தனிப்பெரும்பான்மை பெற வேண்டுமெனில், இந்த எண்ணிக்கை போதாது. இவ்வளவு குறைந்த தொகுதிகளில் நின்றால், கட்சி நிர்வாகிகளிடையே அதிருப்தியை ஏற்படுத்தும் என எடப்பாடி பழனிசாமி கருதுகிறார். அத்துடன்,
மதுரைக் கூட்டம் மற்றும் அமித்ஷா சந்திப்பு
மதுரையில் நேற்று (மார்ச் 1, ஞாயிறு) நடைபெற்ற தேசிய ஜனநாயகக் கூட்டணியின் பிரசாரக் கூட்டத்தில் பிரதமர் மோடியுடன் எடப்பாடி பழனிசாமி பங்கேற்றார். அக்கூட்டத்திற்குப் பிறகு மத்திய அமைச்சர் பியூஷ் கோயல் முன்னிலையில் நடைபெற்ற முதற்கட்ட பேச்சுவார்த்தையில் சுமுக முடிவு எட்டப்படவில்லை. இதன் தொடர்ச்சியாகவே, டெல்லி சென்று உள்துறை அமைச்சர் அமித்ஷாவை நேரில் சந்தித்து இறுதி முடிவெடுக்க அவர் திட்டமிட்டுள்ளார்.
எடப்பாடி பழனிசாமி பயணத்தின் முக்கியத்துவம்
ஏற்கனவே கடந்த காலங்களில் அமித்ஷாவின் வருகையைத் தவிர்த்த எடப்பாடி பழனிசாமி, இப்போது அவசரமாக டெல்லி செல்வது தொகுதிப் பங்கீட்டை உறுதி செய்யவும், கூட்டணிக்குள் நிலவும் அதிருப்திகளைச் சரிசெய்யவும் எடுக்கப்பட்ட முக்கிய முயற்சியாகக் கருதப்படுகிறது.
இபிஎஸ்-ன் பயணம் தொகுதிப்பங்கீடு பிரச்னைக்கு தீர்வுகாணும்
தமிழ்நாட்டில் அரசியலில் இந்தத் தேர்தல் மிக முக்கியமானதாகக் கருதப்படுகிறது. எடப்பாடி பழனிசாமியின் இந்தப் பயணம், அதிமுக கூட்டணியின் பலத்தையும் தொகுதிப் பங்கீட்டையும் தீர்மானிக்கும் காரணியாக அமையும் என்பதில் சந்தேகமில்லை. வரும் நாட்களில் இதன் வெளிப்பாடாகக் கூட்டணி உடன்பாடுகள் எட்டப்படும் என்று எதிர்பார்க்கப்படுகிறது.