சென்னை,பிப்.17; தமிழ்நாடு சட்டப்பேரவையில் இன்று (17.02.2026) 2026-2027-ம் ஆண்டிற்கான இடைக்கால பட்ஜெட் தாக்கல் செய்யப்பட்டது. இதில் வேளாண்மை மற்றும் உழவர் நலத்துறைக்கான சாதனைகள் மற்றும் கடந்த ஐந்து ஆண்டுகளில் ஒதுக்கப்பட்ட நிதி குறித்த முக்கிய விவரங்களை அமைச்சர் எம்.ஆர்.கே.பன்னீர்செல்வம் விரிவாக விளக்கினார்.
தமிழ்நாடு வரலாற்றில் முதல்முறை: தனி வேளாண் பட்ஜெட்
தமிழ்நாடு வரலாற்றிலேயே முதன்முறையாக 2021-22-ம் ஆண்டு வேளாண்மைக்கென தனி நிதிநிலை அறிக்கை அறிமுகப்படுத்தப்பட்டது. விவசாயிகளின் தேவைகளை நேரடியாகக் கேட்டறிந்து திட்டங்களை வகுக்க வேண்டும் என்ற முதலமைச்சர் மு.க.ஸ்டாலினின் வழிகாட்டுதலின்படி, கடந்த ஐந்து ஆண்டுகளில் மாநிலம் முழுவதும் 28 கருத்துக்கேட்புக் கூட்டங்கள் நடத்தப்பட்டன.
கடந்த 5 ஆண்டுகளில் ரூ.1.94 லட்சம் கோடி நிதி ஒதுக்கீடு
விவசாயிகள், உழவர் சங்கங்கள், இயற்கை விவசாயிகள் மற்றும் வேளாண் வல்லுநர்களின் கருத்துகளின் அடிப்படையில் திட்டங்கள் தீட்டப்பட்டன. அதன்படி, கடந்த 5 ஆண்டு கால வேளாண் நிதிநிலை அறிக்கைகளில் வேளாண்மை மற்றும் அதன் சார்புத் துறைகளுக்கென மொத்தம் 1,94,076 கோடி ரூபாய் நிதி ஒதுக்கீடு செய்யப்பட்டுள்ளதாக அமைச்சர் தெரிவித்தார்.
முக்கிய சிறப்பம்சங்கள்:
கலைஞரின் அனைத்துக் கிராம ஒருங்கிணைந்த வேளாண் வளர்ச்சித் திட்டம்: தமிழ்நாட்டில் உள்ள 12,525 கிராம ஊராட்சிகளிலும் ஒட்டுமொத்த வளர்ச்சியை எட்டும் நோக்கில் இத்திட்டம் செயல்படுத்தப்பட்டு வருகிறது.
கூடுதல் மானியம்: ஆதிதிராவிடர் மற்றும் பழங்குடியின விவசாயிகளுக்கு ரூ.62 கோடி கூடுதல் மானியம் வழங்கப்பட்டுள்ளது.
நவீனமயமாக்கல்: விவசாயத்தை நவீனமயமாக்குதல், உற்பத்தித் திறனை அதிகரித்தல் மற்றும் விவசாயிகளின் வருமானத்தை உயர்த்துதல் ஆகியவற்றை இலக்காகக் கொண்டு அரசு செயல்பட்டு வருகிறது.
விவசாயிகளின் வாழ்வாதாரத்தை மேம்படுத்தும் திட்டங்கள்
தமிழ்நாடு பொருளாதாரத்தின் முதுகெலும்பாக விளங்கும் விவசாயத் துறையை மேம்படுத்த, உணவு மற்றும் ஊட்டச்சத்து பாதுகாப்பை உறுதி செய்யும் வகையில் பல்வேறு தொடர் நடவடிக்கைகள் எடுக்கப்பட்டு வருகின்றன. இடுபொருள் விற்பனையாளர்கள் முதல் ஏற்றுமதியாளர்கள் வரை அனைவரது ஆலோசனைகளும் இந்த பட்ஜெட் தயாரிப்பில் முக்கிய பங்கு வகித்துள்ளன.
வேளாண்துறையை அடுத்தகட்டத்திற்கு கொண்டு செல்ல நடவடிக்கை
தமிழ்நாடு அரசு விவசாயிகளுக்காகத் தனி பட்ஜெட் தாக்கல் செய்வதுடன், கடந்த ஐந்து ஆண்டுகளில் சுமார் 1.94 லட்சம் கோடி ரூபாயை ஒதுக்கியிருப்பது விவசாயிகளின் முன்னேற்றத்தில் கொண்டுள்ள அக்கறையைக் காட்டுகிறது. இத்தகைய பெரும் நிதி ஒதுக்கீடு மற்றும் திட்டங்கள், வரும் காலங்களில் தமிழக வேளாண் துறையை அடுத்த கட்டத்திற்கு கொண்டு செல்லும் என்பதில் ஐயமில்லை.