குடியரசு தின விழா; கடமைப் பாதையில் இந்திய ராணுவத்தின் பலமும், கலாச்சாரப் பெருமையும்! கண்டுவியந்த ஆயிரக்கணக்கான மக்கள்!

டெல்லி,ஜன.26; இந்தியாவின் 77ஆவது குடியரசு தின விழா, டெல்லியில் உள்ள வரலாற்றுச் சிறப்புமிக்க கடமைப் பாதையில் (Kartavya Path) இன்று (26.01.2026) கோலாகலமாக நடைபெற்றது. நாட்டின் ராணுவ வலிமை, கலாச்சார பன்முகத்தன்மை மற்றும் தற்சார்பு இந்தியாவின் வளர்ச்சியை உலகிற்கு பறைசாற்றும் வகையில் இந்த ஆண்டு கொண்டாட்டங்கள் அமைந்திருந்தன.

தேசியக் கொடியை ஏற்றி வைத்தார் குடியரசுத் தலைவர் முர்மு

குடியரசுத் தலைவர் திரௌபதி முர்மு, பாரம்பரிய சாரட் வண்டியில் (Ceremonial Buggy) கடமைப் பாதைக்கு வருகை தந்தார். அவரைப் பிரதமர் நரேந்திர மோடி வரவேற்றார். அதனைத் தொடர்ந்து, திரௌபதி முர்மு தேசியக் கொடியை ஏற்றி வைத்து மரியாதையை ஏற்றுக் கொண்டார். அப்போது 21 குண்டுகள் முழங்க தேசிய கீதம் இசைக்கப்பட்டது. இந்த ஆண்டு விழாவின் சிறப்பு விருந்தினர்களாக ஐரோப்பிய ஆணையத்தின் தலைவர் உர்சுலா வான் டெர் லேயன் மற்றும் ஐரோப்பிய கவுன்சில் தலைவர் அந்தோனியோ லூயிஸ் சாண்டோஸ் டா காஸ்டா ஆகியோர் பங்கேற்றனர்.

‘வந்தே மாதரம்’ – 150 ஆண்டுகால பாரம்பரியம்

இந்த ஆண்டு குடியரசு தின விழாவின் முக்கிய கருப்பொருளாக ‘வந்தே மாதரம் – 150 ஆண்டுகள்’ மற்றும் ‘தற்சார்பு இந்தியா’ ஆகியவை இருந்தன. தேசியப் பாடலான வந்தே மாதரம் இயற்றப்பட்டு 150 ஆண்டுகள் நிறைவடைவதைக் கொண்டாடும் வகையில், பல்வேறு கலை நிகழ்ச்சிகள் மற்றும் அலங்கார ஊர்திகள் வடிவமைக்கப்பட்டிருந்தன. நாட்டின் 17 மாநிலங்கள் மற்றும் 13 அமைச்சகங்களின் அலங்கார ஊர்திகள் கடமைப் பாதையில் அணிவகுத்து வந்தன.

ராணுவ வலிமை மற்றும் ‘ஆபரேஷன் சிந்தூர்’

இந்திய ராணுவத்தின் நவீன போர் தளவாடங்கள் மற்றும் ஏவுகணை அமைப்புகள் இந்த அணிவகுப்பில் முக்கிய ஈர்ப்பாக இருந்தன. குறிப்பாக, கடந்த ஆண்டு நடைபெற்ற ‘ஆபரேஷன் சிந்தூர்’-ன் வெற்றியை நினைவுகூரும் வகையில் முப்படைகளின் கூட்டு அலங்கார ஊர்தி இடம்பெற்றது. இந்திய விமானப் படையின் ரஃபேல், சுகோய் மற்றும் தேஜஸ் போன்ற போர் விமானங்கள் வான்வெளியில் நிகழ்த்திய சாகசங்கள் பார்வையாளர்களை மெய்சிலிர்க்க வைத்தன.

கலாச்சார அணிவகுப்பு மற்றும் மக்கள் பங்களிப்பு

இந்தியாவின் பல்வேறு மாநிலங்களின் பாரம்பரிய நடனங்கள் மற்றும் இசைக்கருவிகள் முழங்க ‘வேற்றுமையில் ஒற்றுமை’ என்ற தத்துவத்தை விளக்கும் வகையில் 2,500-க்கும் மேற்பட்ட கலைஞர்கள் தங்கள் திறமையை வெளிப்படுத்தினர். பெண் அதிகாரிகளின் தலைமையிலான அணிவகுப்புகள், இந்தியாவின் ‘பெண் சக்தி’ மேலோங்கி நிற்பதை உறுதி செய்தன.

இந்தியா வளர்ந்துவரும் சக்தி – உறுதிப்படுத்திய கொண்டாட்டம்

இந்த 77ஆவது குடியரசு தின விழா, இந்தியா ஒரு வலுவான ஜனநாயக நாடாக மட்டுமல்லாமல், பாதுகாப்பு மற்றும் பொருளாதாரத்தில் உலகளவில் வளர்ந்து வரும் ஒரு சக்தியாக இருப்பதையும் உறுதிப்படுத்தியுள்ளது. ‘வளர்ந்த இந்தியா 2047’ (Viksit Bharat) என்ற இலக்கை நோக்கிய பயணத்தில் இக்கொண்டாட்டங்கள் புதிய உத்வேகத்தை அளித்துள்ளன.