டெல்லி,ஜன.02; இந்திய அரசியலில் எப்போதுமே மதம் சார்ந்த விவகாரங்கள் பெரும் தாக்கத்தை ஏற்படுத்தும் என்று கருதப்படும் நிலையில், மேற்கு வங்க முன்னாள் பாஜக தலைவர் திலீப் கோஷ் தெரிவித்துள்ள கருத்துகள் அரசியல் வட்டாரத்தில் பெரும் பரபரப்பை ஏற்படுத்தியுள்ளது.
டெல்லியில் மத்திய உள்துறை அமைச்சர் அமித் ஷாவை சந்தித்த பின்னர் திலீப் கோஷ் செய்தியாளர்களுக்குப் பேட்டியளித்தார். அப்போது அவர்,”கோவில் மற்றும் மசூதி தொடர்பான விவகாரங்கள் தேர்தல் முடிவுகளைப் பாதிப்பதில்லை” என்று தெரிவித்துள்ளார். இதற்கு உதாரணமாக, 2024 மக்களவைத் தேர்தலில் அயோத்தி ராமர் கோவில் கட்டப்பட்ட போதிலும், ஃபைசாபாத் தொகுதியில் பாஜக தோல்வியடைந்ததை அவர் சுட்டிக்காட்டினார்.
மம்தா பானர்ஜிக்கு விடுத்த எச்சரிக்கை
மேற்கு வங்க முதலமைச்சர் மம்தா பானர்ஜி கோயில்களைக் கட்டுவதன் மூலம் 2026 சட்டப்பேரவைத் தேர்தலில் வெற்றி பெற்றுவிடலாம் என்று நினைத்தால் அது “தவறான கணக்கு” என்றும் திலீப் கோஷ் விமர்சித்துள்ளார். அரசியலில் வெறும் ஆன்மிகம் மட்டும் வெற்றியைத் தந்துவிடாது என்பதை அவர் தனது பேச்சின் மூலம் வலியுறுத்தியுள்ளார்.
கட்சிக்குள் நிலவும் பூசல்கள் மற்றும் புறக்கணிப்பு
கட்சியில் தான் ஓரங்கட்டப்படுவது குறித்து வெளிப்படையாகப் பேசிய கோஷ், “அடிப்படையற்ற மற்றும் உள்நோக்கம் கொண்ட சில காரணங்களால் நான் தனிமைப்படுத்தப்பட்டேன். இதை நான் கட்சியின் தலைமைக்கும் தெரிவித்துள்ளேன்,” என்று கூறினார். மேலும், சமீபத்தில் கட்சியில் இணைந்தவர்கள் தங்களது அடையாளத்தை நிரூபிக்க வேண்டும் என்றும், பழைய நிர்வாகிகளின் முக்கியத்துவத்தை குறைத்து மதிப்பிடக் கூடாது என்றும் அவர் மறைமுகமாகச் சாடினார்.
2026 சட்டப்பேரவைத் தேர்தல் திட்டம்
2026 ஆம் ஆண்டு நடைபெறவுள்ள மேற்கு வங்க சட்டப்பேரவைத் தேர்தலில் தனது சொந்தத் தொகுதியான கரக்பூரில் போட்டியிட விரும்புவதாகவும், அதற்காக வரும் சனிக்கிழமை முதல் மூன்று நாட்கள் அங்கு பரப்புரையில் ஈடுபட அனுமதி கோரியுள்ளதாகவும் திலீப் கோஷ் தெரிவித்துள்ளார்.
மதத்தைப்பேசி தேர்தலில் வென்ற பாஜகவின் மனநிலையில் மாற்றமா?
பாஜகவின் முக்கியத் தலைவர்களில் ஒருவரான திலீப் கோஷின் இந்த கருத்துகள், மதம் சார்ந்த அரசியலை மட்டுமே நம்பி தேர்தல் களம் இருக்கக்கூடாது என்பதையும், மக்களின் அன்றாடத் தேவைகளே வெற்றியைத் தீர்மானிக்கும் என்பதையும் உணர்த்துகிறது. இது வரும் தேர்தலில் பாஜகவின் வியூகத்தில் மாற்றத்தை ஏற்படுத்துமா என்பதைப் பொறுத்திருந்து தான் பார்க்க வேண்டும்.