சென்னை,பிப்.02; தமிழ்நாடு அரசியல் களம் ஏப்ரல் மாதம் நடைபெறவிருக்கும் சட்டப்பேரவைத் தேர்தலை நோக்கி விறுவிறுப்பாக நகர்ந்து வருகிறது. இதில் தொடக்கம் முதலே தனித்துவமான பாதையில் பயணிக்கும் நாம் தமிழர் கட்சி (NTK), வரவிருக்கும் தேர்தலில் தனது பலத்தை நிரூபிக்கத் தயாராகிவிட்டது. திருச்சியில் நடைபெறவுள்ள பிரமாண்ட மாநாட்டில் 234 தொகுதி வேட்பாளர்களையும் ஒரே மேடையில் சீமான் அறிமுகப்படுத்த உள்ளார்.
மாநில கட்சி அந்தஸ்தும் சீமானின் அதிரடியும்
கடந்த 2024 நாடாளுமன்றத் தேர்தலில் 8.2 சதவீத வாக்குகளைப் பெற்று, தேர்தல் ஆணையத்தால் மாநில கட்சி என்ற அங்கீகாரத்தை நாம் தமிழர் கட்சி பெற்றுள்ளது. கட்சி தொடங்கிய 15 ஆண்டுகளில் கிடைத்துள்ள இந்த மைல்கல், அக்கட்சித் தொண்டர்களிடையே பெரும் உற்சாகத்தை ஏற்படுத்தியுள்ளது. மற்ற கட்சிகள் கூட்டணிப் பேச்சுவார்த்தையில் மும்முரமாக இருக்க, சீமான் “தனித்துப்போட்டி” என்ற தனது கொள்கையில் உறுதியாக உள்ளார்.
திருச்சியில் மாற்றத்தை விரும்பும் மக்களின் மாநாடு
வருகிற 21ஆம் தேதி (சனிக்கிழமை) திருச்சியில் “மாற்றத்தை விரும்பும் மக்களின் மாநாடு – 2026” பிரமாண்டமாக நடைபெறவுள்ளது. இந்த மாநாட்டின் சிறப்பம்சமாக:
தமிழகத்தின் 234 தொகுதிகளுக்கான வேட்பாளர்களும் அதிகாரப்பூர்வமாக அறிவிக்கப்படுவார்கள்.
பெண்களுக்கு 50 சதவீத இடஒதுக்கீடு (117 தொகுதிகள்) வழங்கப்பட உள்ளது.
முதன்முறையாக மாற்றுத்திறனாளிகள் மற்றும் மூன்றாம் பாலினத்தவருக்கும் தேர்தலில் போட்டியிட வாய்ப்பு வழங்கப்படும் என எதிர்பார்க்கப்படுகிறது.
சீமான் எங்கே போட்டி? காரைக்குடியா?
நாம் தமிழர் கட்சியின் தலைமை ஒருங்கிணைப்பாளர் சீமான் எங்கு போட்டியிடுவார் என்பதே தற்போதைய ஹாட் டாபிக். 2016-ல் கடலூர் மற்றும் 2021-ல் திருவொற்றியூர் தொகுதிகளில் போட்டியிட்ட அவர், இந்த முறை சிவகங்கை மாவட்டத்தின் காரைக்குடி தொகுதியில் களம் காண்பார் என அரசியல் வட்டாரங்கள் தெரிவிக்கின்றன. இது குறித்து அவரிடம் கேட்டபோது, “இன்னும் சில நாட்களில் மாநாட்டில் தெரியவரும்” என ரகசியம் காத்துள்ளார்.
வளர்ந்து வரும் வாக்கு சதவீதம் (2016 – 2024)
நாம் தமிழர் கட்சியின் தேர்தல் வளர்ச்சி விகிதம் மற்ற கட்சிகளை உற்றுநோக்க வைத்துள்ளது:
2016 (சட்டமன்ற தேர்தல்): 1.07%
2019 (நாடாளுமன்ற தேர்தல்): 3.9%
2021 (சட்டமன்ற தேர்தல்): 6.58%
2024 (நாடாளுமன்ற தேர்தல்): 8.2%
‘தனி வழி’ என தனித்துக் களம்காணும் சீமான்!
திராவிட மற்றும் தேசிய கட்சிகளுக்கு மாற்றாக “தனி வழி” காணும் சீமானின் இந்த 2026 தேர்தல் வியூகம் எந்தளவுக்கு கைகொடுக்கும் என்பதை திருச்சி மாநாடு பிரதிபலிக்கும். 234 வேட்பாளர்களையும் முன்கூட்டியே அறிவிப்பதன் மூலம், களப்பணிகளில் மற்ற கட்சிகளை விட ஒரு படி முன்னிலையில் இருக்க நாம் தமிழர் கட்சி திட்டமிட்டுள்ளது.