சென்னை,பிப்.22; தமிழ்நாட்டில் வரவிருக்கும் தேர்தலை முன்னிட்டு, வாக்காளர் பட்டியலில் திருத்தங்கள் செய்யும் பணிகள் தீவிரமாக நடைபெற்று வந்தன. தற்போது அந்தப் பணிகள் நிறைவடைந்து, இறுதி வாக்காளர் பட்டியல் நாளை (23.02.2026) வெளியாக உள்ளது.
சிறப்பு தீவிர திருத்தப்பணி (SIR) நிறைவு
தமிழ்நாட்டில் வாக்காளர் பட்டியல் சிறப்பு தீவிர திருத்தப் பணிகள் (Special Intensive Revision – SIR) கடந்த ஆண்டு நவம்பர் 4-ஆம் தேதி தொடங்கியது. இதன் ஒரு பகுதியாக வெளியிடப்பட்ட வரைவு வாக்காளர் பட்டியலில், பல்வேறு காரணங்களுக்காக சுமார் 97.37 லட்சம் பெயர்கள் நீக்கப்பட்டன. இதனால், முன்பு 6.41 கோடியாக இருந்த வாக்காளர்களின் எண்ணிக்கை 5.44 கோடியாகக் குறைந்தது.
பெயர்கள் நீக்கப்பட்டதற்கான காரணங்கள்
வாக்காளர் பட்டியலில் இருந்து நீக்கப்பட்ட 97.37 லட்சம் பேரில்:
உயிரிழந்தவர்கள்: 26,95,672 பேர்.
நிரந்தரமாக இடம் பெயர்ந்தோர்: 66,44,881 பேர்.
இரட்டைப் பதிவு வாக்காளர்கள்: 3,98,278 பேர்.
இந்த பெயர் நீக்க நடவடிக்கைகள் வாக்காளர் பட்டியலைத் தூய்மைப்படுத்தும் நோக்கில் மேற்கொள்ளப்பட்டன.
புதிய விண்ணப்பங்கள் மற்றும் சரிபார்ப்பு
வரைவுப் பட்டியல் வெளியான பிறகு, டிசம்பர் 19 முதல் பிப்ரவரி 10 வரை பெயர் சேர்க்கை, நீக்கம் மற்றும் திருத்தங்களுக்கு அவகாசம் வழங்கப்பட்டது.
பெயர் சேர்க்க 17.10 லட்சம் பேரும், திருத்தம் கோரி 5.51 லட்சம் பேரும் என மொத்தம் 34.75 லட்சம் பேர் விண்ணப்பித்திருந்தனர்.
இணையதளம் வாயிலாக மட்டும் 10.28 லட்சம் விண்ணப்பங்கள் பெறப்பட்டன.
இந்த விண்ணப்பங்களை வாக்காளர் பதிவு அலுவலர்கள் கள ஆய்வு செய்து சரிபார்க்கும் பணி கடந்த 10-ஆம் தேதி நிறைவடைந்தது.
நாளை வெளியாகிறது இறுதி வாக்காளர் பட்டியல்
தமிழ்நாட்டின் இறுதி வாக்காளர் பட்டியல் நாளை (23-02-2026, திங்கட்கிழமை) வெளியிடப்படுகிறது. மாவட்ட அளவில் காலை 10 மணிக்கு மேல் அந்தந்த மாவட்ட தேர்தல் அதிகாரிகளால் பட்டியல் வெளியிடப்படும். அதனைத் தொடர்ந்து, தமிழ்நாடு தலைமை தேர்தல் அதிகாரி அர்ச்சனா பட்நாயக், மாநிலம் முழுவதுமான ஒருங்கிணைந்த தரவுகளை வெளியிடுவார்.
தற்போதைய நிலவரப்படி, தமிழ்நாட்டில் மொத்த வாக்காளர்களின் எண்ணிக்கை சுமார் 5.65 கோடி அளவில் இருக்கும் என்று எதிர்பார்க்கப்படுகிறது.
பெயர் உள்ளதா என்பதை அறிந்துகொள்ள விரிவான ஏற்பாடுகள்
ஜனநாயகக் கடமையை ஆற்ற வாக்காளர் பட்டியலில் பெயர் இருப்பது மிக அவசியமாகும். நாளை வெளியாகும் இறுதிப் பட்டியலில் உங்கள் பெயர் இடம்பெற்றுள்ளதா என்பதை அதிகாரப்பூர்வ இணையதளம் அல்லது அந்தந்த வாக்குச்சாவடி மையங்களில் சரிபார்த்துக் கொள்ளலாம். வாக்காளர் பட்டியல் திருத்தப்பணிகள் நிறைவடைந்துள்ள நிலையில், தேர்தல் களம் தமிழ்நாட்டில் சூடுபிடிக்கத் தொடங்கியுள்ளது.