சென்னை,ஜன.08; சென்னையின் அடையாளங்களில் ஒன்றான புத்தகக் காட்சி இந்த ஆண்டு மிக முக்கியமான மாற்றத்துடன் தொடங்குகிறது. தென்னிந்திய புத்தக விற்பனையாளர்கள் மற்றும் பதிப்பாளர்கள் சங்கம் (BAPASI) சார்பில் நடத்தப்படும் 49-வது சென்னை புத்தகக் காட்சி, இன்று (08.01.2026) நந்தனம் ஒய்எம்சிஏ மைதானத்தில் தொடங்க உள்ளது.
2026-ன் சிறப்பு: நுழைவுக் கட்டணம் இல்லை
வழக்கமாக புத்தகக் காட்சிக்கு வரும் பார்வையாளர்களிடம் ₹10 நுழைவுக் கட்டணம் வசூலிக்கப்படும். ஆனால், இந்த ஆண்டு புத்தக ஆர்வலர்களை ஊக்குவிக்கும் வகையில் அனுமதி முற்றிலும் இலவசம் என அறிவிக்கப்பட்டுள்ளது. இதனை முதலமைச்சர் மு.க.ஸ்டாலின் மாலை 6 மணிக்கு அதிகாரப்பூர்வமாக தொடங்கி வைக்கிறார்.
புத்தகக் காட்சியின் முக்கிய அம்சங்கள்
ஆயிரத்திற்கும் மேற்பட்ட அரங்குகள்: இந்த முறை மொத்தம் 1,000-க்கும் மேற்பட்ட ஸ்டால்கள் அமைக்கப்பட்டுள்ளன. இதில் 428 தமிழ் அரங்குகள், 256 ஆங்கில அரங்குகள் மற்றும் 24 பொதுப் பிரிவினர் அரங்குகள் இடம்பெறுகின்றன.
அரசுத் துறை பங்களிப்பு: தமிழ்நாடு பாடநூல் கழகம், இந்து சமய அறநிலையத் துறை உள்ளிட்ட பல்வேறு அரசுத் துறைகளும் தங்களது பிரத்யேக அரங்குகளை அமைத்துள்ளன.
சிறப்பு வசதிகள்: பார்வையாளர்களின் வசதிக்காக இலவச வைஃபை (Wi-Fi), நடமாடும் ஏடிஎம் (ATM), குடிநீர் வசதி, பாலூட்டும் தாய்மார்களுக்கான தனி அறைகள் மற்றும் முதியவர்களுக்கான சக்கர நாற்காலி வசதிகள் செய்யப்பட்டுள்ளன.
போக்குவரத்து வசதி: சைதாப்பேட்டை மெட்ரோ மற்றும் பேருந்து நிலையங்களில் இருந்து புத்தகக் காட்சி நடைபெறும் இடத்திற்கு பார்வையாளர்களை அழைத்துச் செல்ல சிறப்பு மினி பேருந்துகள் இயக்கப்பட உள்ளன.
சென்னை வாசிக்கிறது (Chennai Reads) நிகழ்வு
ஜனவரி 12-ம் தேதி ‘சென்னை வாசிக்கிறது’ என்ற சிறப்பு நிகழ்வு நடைபெற உள்ளது. இதில் சுமார் 3,000 பள்ளி மாணவர்கள் கலந்து கொண்டு வாசிப்புப் பழக்கத்தை முன்னெடுத்துச் செல்லும் வகையில் ஒன்றாக அமர்ந்து புத்தகங்களை வாசிக்க உள்ளனர்.
அனைத்து நாட்களிலும் காலை 11-இரவு 8.30 மணி வரை…!
சென்னையின் இலக்கியத் திருவிழாவாகக் கருதப்படும் இந்த புத்தகக் காட்சி ஜனவரி 21-ம் தேதி வரை நடைபெறுகிறது. தினமும் காலை 11 மணி முதல் இரவு 8:30 மணி வரை பொதுமக்கள் இந்த புத்தகக் கடலில் மூழ்கி தங்களுக்குப் பிடித்தமான படைப்புகளைத் தேடிப் படிக்கலாம்.