சென்னை,ஜன.23; நடிகர் விஜய் நடித்துள்ள ‘ஜனநாயகன்’ திரைப்படத்தின் தணிக்கை சான்றிதழ் தொடர்பான வழக்கில், சென்னை உயர்நீதிமன்றம் வரும் 27ஆம் தேதி தீர்ப்பு வழங்க உள்ளது. இதனால் ரசிகர்கள் மற்றும் திரையுலகினர் மத்தியில் பெரும் எதிர்பார்ப்பு ஏற்பட்டுள்ளது.
வழக்கின் பின்னணி என்ன?
விஜய் நடித்த ‘ஜனநாயகன்’ திரைப்படத்திற்கு தணிக்கை சான்றிதழ் வழங்க தணிக்கை வாரியம் மறுப்பு தெரிவித்தது. மேலும், படத்தை மறுஆய்வு செய்ய வேண்டும் என்றும் பரிந்துரைத்தது. தணிக்கை வாரியத்தின் இந்த முடிவை எதிர்த்து படத்தை தயாரித்துள்ள கே.வி.என். நிறுவனம் சென்னை உயர்நீதிமன்றத்தில் வழக்கு தொடர்ந்தது
இந்த வழக்கை விசாரித்த தனி நீதிபதி, தணிக்கை வாரியத்தின் மறுஆய்வு பரிந்துரையை ரத்து செய்ததோடு, படத்திற்கு உடனடியாக சான்றிதழ் வழங்க உத்தரவிட்டார்.
தணிக்கை வாரியத்தின் மேல்முறையீடு
தனி நீதிபதியின் உத்தரவை எதிர்த்து மத்திய தணிக்கை வாரியம் சென்னை உயர்நீதிமன்றத்தில் மேல்முறையீடு செய்தது. இந்த மேல்முறையீட்டு மனுவை தலைமை நீதிபதி எம்.எம்.ஸ்ரீவத்சவா மற்றும் நீதிபதி ஜி.அருள்முருகன் ஆகியோர் அடங்கிய அமர்வு விசாரித்தது.
தணிக்கை வாரிய வாதம்: தணிக்கை உறுப்பினரின் புகாரின் பேரிலேயே மறுஆய்வு முடிவு எடுக்கப்பட்டது என்றும், இதில் சட்ட விதிமீறல்கள் எதுவும் இல்லை என்றும் வாதிடப்பட்டது.
தயாரிப்பு தரப்பு வாதம்: குறிப்பிட்ட காட்சிகளை நீக்கிய பிறகும், மீண்டும் அதே காட்சிகளைச் சுட்டிக்காட்டி புகார் அளிப்பது ஏற்கத்தக்கதல்ல. படத்தின் வெளியீடு தள்ளிப்போவதால் தயாரிப்பாளருக்குப் பெரும் இழப்பு ஏற்பட்டுள்ளதாகத் தெரிவிக்கப்பட்டது.
வரும் 27ஆம் தேதி தீர்ப்பளிக்கிறது உயர்நீதிமன்றம்
இருதரப்பு வாதங்களையும் கேட்ட நீதிபதிகள், தீர்ப்பைத்
தேதி குறிப்பிடாமல் தள்ளிவைத்திருந்தனர். தற்போது இந்த வழக்கில் வரும் 27ஆம் தேதி (செவ்வாய்க்கிழமை) தீர்ப்பு வழங்கப்படும் என அறிவிக்கப்பட்டுள்ளது.
படம் எப்போது வெளியாகும் என ரசிகர்கள் எதிர்பார்ப்பு!
நீதிமன்றத்தின் இந்தத் தீர்ப்பு ‘ஜனநாயகன்’ படம் வெளியாகும் தேதியைத் தீர்மானிக்கும் முக்கிய காரணியாக அமையும். தனி நீதிபதியின் உத்தரவு உறுதி செய்யப்படுமா அல்லது தணிக்கை வாரியத்தின் மேல்முறையீடு ஏற்கப்படுமா என்பது அன்றைய தினம் தெரியவரும். ஒருவேளை தீர்ப்பு சாதகமாக அமைந்தால், படம் விரைவில் திரைக்கு வரும் என எதிர்பார்க்கப்படுகிறது.
நடிகர் விஜய் அரசியலில் தடம் பதித்துள்ள நிலையில், அவர் நடிப்பில் உருவாகியுள்ள இந்தப் படத்தின் மீதான எதிர்பார்ப்பு மக்களிடையே உச்சத்தில் உள்ளது.