டெல்லி,ஜன.10; நடிகர் விஜய் நடித்துள்ள ‘ஜனநாயகன்’ திரைப்படத்தின் தணிக்கை சான்றிதழ் தொடர்பான சட்டப் போராட்டம் தற்போது உச்சநீதிமன்றத்தை எட்டியுள்ளது. சென்னை உயர்நீதிமன்றத்தின் இடைக்காலத் தடையை எதிர்த்து தயாரிப்பு நிறுவனம் இந்த அதிரடி முடிவை எடுத்துள்ளது.
தணிக்கை வாரியத்தின் பிடிவாதமும் தனி நீதிபதியின் உத்தரவும்
ஜனநாயகன் படத்தைப் பார்த்த தணிக்கை குழு உறுப்பினர்கள் முதலில் ‘யு/ஏ’ சான்றிதழ் வழங்க பரிந்துரை செய்திருந்தனர். இருப்பினும், ஒரு உறுப்பினர் அளித்த புகாரின் அடிப்படையில், தணிக்கை வாரியத் தலைவர் இப்படத்தை மறுஆய்வு குழுவிற்கு அனுப்பினார்.
இதை எதிர்த்து தயாரிப்பு நிறுவனமான கே.வி.என். புரொடக்சன்ஸ் சென்னை உயர்நீதிமன்றத்தில் வழக்கு தொடர்ந்தது. வழக்கை விசாரித்த தனி நீதிபதி பி.டி.ஆஷா, “தணிக்கை சான்றிதழ் வழங்க பரிந்துரைக்கப்பட்ட பின், அதை மறுஆய்வுக்கு அனுப்ப தலைவருக்கு அதிகாரம் இல்லை” எனக் கூறி, உடனடியாக சான்றிதழ் வழங்க உத்தரவிட்டார்.
உயர்நீதிமன்ற அமர்வின் இடைக்காலத் தடை
தனி நீதிபதியின் இந்த அதிரடி உத்தரவை எதிர்த்து, தணிக்கை வாரியம் உடனடியாக உயர்நீதிமன்றத்தின் இரு நீதிபதிகள் கொண்ட அமர்வில் மேல்முறையீடு செய்தது. இந்த அவசர வழக்கை விசாரித்த தலைமை நீதிபதி அமர்வு, தனி நீதிபதி வழங்கிய உத்தரவிற்கு இடைக்காலத் தடை விதித்தது. மேலும், முறையான பதில் மனு தாக்கல் செய்யாமல் அவசர கதியில் தீர்ப்பு வழங்கப்பட்டதாகக் கூறி, வழக்கை ஜனவரி 21-ம் தேதிக்கு ஒத்திவைத்தது.
உச்சநீதிமன்றத்தில் மேல்முறையீடு
சென்னை உயர்நீதிமன்ற அமர்வின் இந்த தடையால், திட்டமிட்டபடி படத்தை வெளியிட முடியாத சூழல் ஏற்பட்டது. இதனால் அதிருப்தியடைந்த தயாரிப்பு நிறுவனம், தற்போது உச்சநீதிமன்றத்தில் மேல்முறையீடு செய்துள்ளது. இந்த மனுவைத் திங்கட்கிழமை அன்று அவசர வழக்காக விசாரிக்க வேண்டும் என்றும் கோரிக்கை விடுக்கப்பட்டுள்ளது.
ஜனநாயகனுக்கு சிக்கல்; விஜய் ரசிகர்கள் கவலை
திரைப்படம் வெளியாவதில் ஏற்பட்டுள்ள இந்த சட்டச் சிக்கல் விஜய் ரசிகர்களிடையே பெரும் கவலையை ஏற்படுத்தியுள்ளது. தணிக்கை வாரியத்தின் செயல்பாடு உள்நோக்கம் கொண்டது எனத் தயாரிப்பு தரப்பு வாதிடும் நிலையில், உச்சநீதிமன்றம் வழங்கப்போகும் தீர்ப்பு ‘ஜனநாயகன்’ படத்தின் எதிர்காலத்தைத் தீர்மானிக்கும்.