திரைப்படத் தயாரிப்பாளர் ஆகாஷ் பாஸ்கரன் தொடுத்த நீதிமன்ற அவமதிப்பு வழுக்கல், சென்னை உயர் நீதிமன்ற உத்தரவை மீறி செயல்பட்டதாகக் கூறப்படும் அமலாக்கத்துறை உதவி இயக்குநர் விகாஷ் குமார் நீதிமன்றத்தில் நிபந்தனையற்ற மன்னிப்பு கோரியதையடுத்து, இந்த வழக்கு முடித்து வைக்கப்பட்டுள்ளது
டாஸ்மாக் முறைகேடு, அமலாக்கத்துறை சோதனை சம்பவம்
தமிழக மதுபான விற்பனைக் கழகமான டாஸ்மாக் நிர்வாகத்தில் சுமார் ரூ.1,000 கோடிக்கும் அதிகமான பண மோசடி மற்றும் ஊழல் நடைபெற்றதாகக் கூறப்படும் வழக்கில், அமலாக்கத்துறை விசாரணை நடத்தியது.
சோதனை: இந்த விசாரணையின் ஒரு பகுதியாக, கடந்த மார்ச் மாதம் டாஸ்மாக் தலைமை அலுவலகத்தில் சோதனை நடத்தப்பட்டதைத் தொடர்ந்து, திரைப்படத் தயாரிப்பாளர் ஆகாஷ் பாஸ்கரன் மற்றும் தொழிலதிபர் விக்ரம் ரவீந்திரன் ஆகியோருக்குச் சொந்தமான இடங்களிலும் அமலாக்கத்துறை அதிகாரிகள் சோதனை நடத்தினர்.
நீதிமன்றத்தை நாடிய ஆகாஷ் பாஸ்கரன்
அமலாக்கத்துறையின் இந்த நடவடிக்கைகளை எதிர்த்து ஆகாஷ் பாஸ்கரன்மற்றும் விக்ரம் ரவீந்திரன் ஆகியோர் சென்னை உயர் நீதிமன்றத்தில் தனித்தனியாக மனுக்கள் தாக்கல் செய்தனர். அமலாக்கத்துறைக்கு இடங்களை பூட்டி சீல் வைக்க அதிகாரம் இல்லை என அவர்கள் தங்கள் மனுவில் குறிப்பிட்டனர்.
உயர் நீதிமன்ற உத்தரவு (ஜூன் 2025): இந்த மனுக்களை விசாரித்த நீதிபதிகள் எம்.எஸ். ரமேஷ் மற்றும் வி. லட்சுமி நாராயணன் ஆகியோர் அடங்கிய அமர்வு, அமலாக்கத்துறைக்கு எதிராக முக்கிய உத்தரவுகளைப் பிறப்பித்தது.
ஆகாஷ் பாஸ்கரன் மீது நடவடிக்கை எடுக்க இடைக்காலத்தடை
ஆகாஷ் பாஸ்கரனுக்கு எதிராக மேல் நடவடிக்கை எதுவும் எடுக்க இடைக்காலத் தடை விதித்தது. பறிமுதல் செய்யப்பட்ட ஆவணங்கள் மற்றும் பொருட்களைத் திருப்பித் தர உத்தரவிட்டது. சீல் வைக்கப்பட்ட இடங்களின் சீலை அகற்றவும் உத்தரவிட்டது. அமலாக்கத்துறையின் நடவடிக்கைகள் முற்றிலும் அதிகார வரம்பற்றவை என்றும் நீதிமன்றம் கருத்துத் தெரிவித்தது.
உச்ச நீதிமன்றம் வரை சென்ற போராட்டம்
உயர் நீதிமன்றம் இடைக்காலத் தடை விதித்த பிறகும், அமலாக்கத்துறை அதிகாரிகள், குறிப்பாக உதவி இயக்குநர் விகாஷ் குமார், ஆகாஷ் பாஸ்கரனுக்கு சம்மன் அனுப்பியதாகவும், விசாரணை நடவடிக்கைகள் தொடர்வதாகவும் கூறி ஆகாஷ் பாஸ்கரன் தரப்பில் மீண்டும் உயர் நீதிமன்றத்தில் நீதிமன்ற அவமதிப்பு வழக்கு தாக்கல் செய்யப்பட்டது.
உயர் நீதிமன்றத்தின் அதிருப்தி: தடை உத்தரவு பிறப்பிக்கப்பட்ட போதும், சம்மன் அனுப்பிய அமலாக்கத்துறை அதிகாரிகளின் நடவடிக்கைக்கு நீதிபதிகள் கடும் அதிருப்தி தெரிவித்தனர்.
உயர் நீதிமன்றத்தில் உத்தரவில் தலையிட உச்ச நீதிமன்றம் மறுத்தது
அதிகாரிகளுக்கு சம்மன்: நீதிமன்ற உத்தரவை மீறிய அமலாக்கத்துறை உதவி இயக்குநர் விகாஷ் குமார் மற்றும் பி.எம்.எல்.ஏ (PMLA) தீர்ப்பாயத்தின் தலைவர், பதிவாளர் உள்ளிட்டோர் நீதிமன்றத்தில் நேரில் ஆஜராக உயர் நீதிமன்றம் உத்தரவிட்டது.
உயர் நீதிமன்றத்தின் இந்த உத்தரவை எதிர்த்து அமலாக்கத்துறை உச்ச நீதிமன்றத்தில் மேல்முறையீடு செய்தது. ஆனால், ஆகாஷ் பாஸ்கரன் விவகாரத்தில் உயர் நீதிமன்றத்தின் உத்தரவில் தலையிட உச்ச நீதிமன்றம் மறுத்து, அமலாக்கத்துறையின் மனுவைத் தள்ளுபடி செய்தது.