அகமதாபாத்,மார்ச்.07; அகமதாபாத்தில் நியூசிலாந்துக்கு எதிரான டி20 உலகக்கோப்பை இறுதிப்போட்டி நாளை (மார்ச் 8, ஞாயிறு) நடைபெறவுள்ள நிலையில், இந்திய அணியைச் சுற்றி சில சுவாரஸ்யமான மற்றும் வியப்பான தகவல்கள் வெளியாகியுள்ளன. 2023 ஒருநாள் உலகக்கோப்பை தோல்வியின் வடுக்கள் இன்னும் ஆறாத நிலையில், இந்திய அணி இந்த முறை எந்த ரிஸ்க்கும் எடுக்க விரும்பவில்லை என்பது தெரிகிறது.
பழைய நினைவுகளும் புது மாற்றங்களும்
கடந்த 2023-ஆம் ஆண்டு இதே அகமதாபாத் மைதானத்தில் ஆஸ்திரேலியாவுக்கு எதிரான இறுதிப்போட்டியில் இந்தியா தோல்வியைத் தழுவியது. அந்த கசப்பான நினைவுகளைத் தவிர்க்க, இம்முறை இந்திய அணி தங்கும் ஹோட்டலை மாற்றியுள்ளது. கடந்த முறை ‘ஐடிசி நர்மதா’ (ITC Narmada) ஹோட்டலில் தங்கியிருந்த இந்திய அணி, இம்முறை ‘தாஜ் ஸ்கைலைன்’ (Taj Skyline) ஹோட்டலுக்கு மாறியுள்ளது.
டிரெஸ்ஸிங் ரூம் மாற்றம்: அதிர்ஷ்டத்தைத் தேடும் இந்தியா?
மிகவும் வியப்பான தகவல் என்னவென்றால், இந்திய அணி சொந்த மைதானமாக இருந்தும் ‘ஹோம் டிரெஸ்ஸிங் ரூமை’ (Home Dressing Room) தவிர்த்துவிட்டு, எதிரணிகளுக்கான ‘விசிட்டர்ஸ் டிரெஸ்ஸிங் ரூமை’ (Visitors’ Dressing Room) பயன்படுத்தத் திட்டமிட்டுள்ளதாகக் கூறப்படுகிறது. கடந்த முறை ஹோம் டிரெஸ்ஸிங் ரூமைப் பயன்படுத்தியபோது தோல்வி அடைந்ததால், இந்த முறை அந்த ‘சென்டிமென்ட்’ ராசியில்லாததாகக் கருதப்படுகிறது.
இது மூடநம்பிக்கையா அல்லது திட்டமிடலா?
பிரபல கிரிக்கெட் பத்திரிகையாளர் விமல் குமார் இது குறித்துக் கூறுகையில், இந்திய அணி வீரர்கள் மற்றும் நிர்வாகம் தற்போது மிகவும் கவனமாக இருப்பதாகவும், கடந்த காலத் தோல்விகளுடன் தொடர்புடைய எதையும் செய்ய அவர்கள் தயாராக இல்லை என்றும் தெரிவித்துள்ளார். இதற்கு முன்பாக சந்திர கிரகணத்தின் போது பயிற்சியைத் தள்ளி வைத்ததும் இத்தகைய நம்பிக்கைகளின் ஒரு பகுதியாகவே பார்க்கப்படுகிறது.
இருப்பினும், ஹோட்டல் மாற்றத்திற்கு ஐசிசி-யின் (ICC) விதிமுறைகளும் ஒரு காரணமாகச் சொல்லப்படுகிறது. முதலில் இறுதிப்போட்டிக்குத் தகுதி பெற்ற நியூசிலாந்து அணிக்கு ஐடிசி நர்மதா ஹோட்டல் ஒதுக்கப்பட்டதால், இந்தியா தாஜ் ஹோட்டலுக்குச் செல்ல வேண்டிய சூழல் உருவானதாகவும் தகவல்கள் தெரிவிக்கின்றன.
மனவலிமையும் நேர்மறை எண்ணங்களும் மிகவும் முக்கியம்!
விளையாட்டில் திறமை எவ்வளவு முக்கியமோ, அதே அளவு மனவலிமையும் நேர்மறை எண்ணங்களும் முக்கியம். அது ‘சென்டிமென்ட்’ ஆக இருந்தாலும் சரி அல்லது புதிய வியூகமாக இருந்தாலும் சரி, இந்திய ரசிகர்கள் எதிர்பார்ப்பது ஒன்றே ஒன்றுதான் – 2023-ல் நழுவிய உலகக்கோப்பை கனவு இம்முறை அகமதாபாத்தில் நனவாக வேண்டும் என்பதுதான்.