கொழும்பு,பிப்.20; டி20 உலகக் கோப்பைத் தொடரின் விறுவிறுப்பான லீக் ஆட்டத்தில், ஆப்பிரிக்க அணியான ஜிம்பாப்வே, பலம் வாய்ந்த இலங்கை அணியை 6 விக்கெட் வித்தியாசத்தில் வீழ்த்தி வரலாற்றுச் சாதனை படைத்துள்ளது. கொழும்பில் நேற்று (19.02.2026) நடைபெற்ற இந்த ஆட்டத்தில் ஜிம்பாப்வே அணியின் துணிச்சலான ஆட்டம் ரசிகர்களை வியப்பில் ஆழ்த்தியது.
வலுவான ஸ்கோரை எட்டிய இலங்கை
இப்போட்டியில் டாஸ் வென்று முதலில் பேட்டிங் செய்த இலங்கை அணி, நிர்ணயிக்கப்பட்ட 20 ஓவர்களில் 7 விக்கெட் இழப்பிற்கு 178 ரன்கள் குவித்தது. தொடக்க வீரர் பதும் நிசாங்கா அபாரமாக விளையாடி 41 பந்துகளில் 62 ரன்கள் எடுத்தார். அவருக்கு பக்கபலமாக பவன் ரத்நாயக்க 25 பந்துகளில் 44 ரன்கள் எடுத்து அதிரடி காட்டினார். ஜிம்பாப்வே பந்துவீச்சாளர்களில் கிரீமர், முசரபானி மற்றும் பிராட் எவன்ஸ் தலா 2 விக்கெட்டுகளைக் கைப்பற்றினர்.
ஜிம்பாப்வேயின் அதிரடி பதில்
179 ரன்கள் என்ற கடினமான இலக்கை நோக்கிப் பயணித்த ஜிம்பாப்வே அணிக்கு பிரையன் பென்னட் மற்றும் தாடிவானாஷே மருமானி ஜோடி சிறப்பான தொடக்கத்தை அளித்தது. பிரையன் பென்னட் கடைசிவரை ஆட்டமிழக்காமல் 48 பந்துகளில் 63 ரன்கள் எடுத்து அணியின் வெற்றியை உறுதி செய்தார்.
மத்திய வரிசையில் களமிறங்கிய கேப்டன் சிக்கந்தர் ராசா, தனது அனுபவ ஆட்டத்தை வெளிப்படுத்தி 26 பந்துகளில் 45 ரன்கள் குவித்தார். ஆட்டத்தின் கடைசி ஓவரில் டோனி முயோங்கா அடித்த சிக்ஸர் ஜிம்பாப்வே அணி வெற்றிக்கோட்டைத் தொட வைத்தது. 19.3 ஓவர்களில் ஜிம்பாப்வே 4 விக்கெட்டுகளை மட்டும் இழந்து 182 ரன்கள் எடுத்து வெற்றி பெற்றது.
சிக்கந்தர் ராசாவுக்கு ஆட்டநாயகன் விருது
முக்கியமான கட்டத்தில் அதிரடியாக விளையாடி ரன்களைச் சேர்த்த ஜிம்பாப்வே கேப்டன் சிக்கந்தர் ராசா ஆட்டநாயகனாகத் தேர்ந்தெடுக்கப்பட்டார். இந்த வெற்றியின் மூலம் ஜிம்பாப்வே அணி குரூப் பி பிரிவில் முதலிடத்தைப் பிடித்து தோல்வியே அடையாமல் சூப்பர் 8 சுற்றுக்குத் முன்னேறி உள்ளது.
இலங்கையை சொந்த மண்ணில் சாய்த்த ஜிம்பாப்வே!
இலங்கை போன்ற ஒரு அனுபவம் வாய்ந்த அணியை அதன் சொந்த மண்ணிலேயே வீழ்த்தியது ஜிம்பாப்வே கிரிக்கெட்டின் எழுச்சியைக் காட்டுகிறது. இந்த வெற்றி அந்த அணிக்கு சூப்பர் 8 சுற்றில் மிகப்பெரிய நம்பிக்கையைத் தரும் என்பதில் சந்தேகமில்லை. அதேசமயம், இலங்கை அணி தனது பந்துவீச்சு மற்றும் பீல்டிங்கில் உள்ள குறைகளை நிவர்த்தி செய்ய வேண்டிய கட்டாயத்தில் உள்ளது.