பழனி,மார்ச்.23; தமிழ்நாடு அரசியல் களம் சட்டப்பேரவைத் தேர்தலை நோக்கி சூடுபிடிக்கத் தொடங்கியுள்ளது. இந்த சூழலில், நடிகர் விஜய்யின் தமிழக வெற்றிக் கழகம் குறித்து புதுச்சேரியைச் சேர்ந்த லட்சிய ஜனநாயக கட்சியின் தலைவர் ஜோஸ் சார்லஸ் மார்ட்டின் தெரிவித்துள்ள கருத்துகள் பெரும் பரபரப்பை ஏற்படுத்தியுள்ளன.
பழனியில் சிறப்பு வழிபாடு
தேசிய ஜனநாயகக் கூட்டணியில் இடம்பெற்றுள்ள லட்சிய ஜனநாயக கட்சியின் நிறுவனத் தலைவர் ஜோஸ் சார்லஸ் மார்ட்டின், நேற்று (மார்ச் 22, ஞாயிறு) பழனிக்கு வருகை தந்தார். திருஆவினன்குடி குழந்தை வேலாயுதசுவாமி கோவிலில் தனது வேட்புமனுவை வைத்து சிறப்பு பூஜை செய்த அவர், முருகப்பெருமானை வழிபட்டு தியானத்தில் ஈடுபட்டார். வழிபாட்டிற்குப் பிறகு செய்தியாளர்களைச் சந்தித்த அவர், தற்போதைய அரசியல் சூழல் குறித்து பல்வேறு கருத்துக்களைப் பகிர்ந்து கொண்டார்.
தவெக-க்குள் திமுக உளவாளிகள் ஊடுருவல்?
செய்தியாளர் சந்திப்பில் விஜய்யின் தவெக குறித்து பேசிய மார்ட்டின், அக்கட்சியின் செயல்பாடுகளில் வெளிப்படைத்தன்மை இல்லை எனக் குற்றஞ்சாட்டினார்.
“தமிழக வெற்றிக் கழகம் ஏதேனும் ஒரு வலுவான கூட்டணியில் இணைந்திருக்க வேண்டும்; ஆனால், விஜய்யைச் சுற்றியுள்ள குழு அவரைச் சரியான பாதையில் வழிநடத்தவில்லை; முக்கியமாக, திமுக-வின் உளவாளிகள் தவெக-விற்குள் ஊடுருவியுள்ளனர்.”
விஜய்யைத் தனிமைப்படுத்தத் திட்டமா?
தவெக ஏன் இன்னும் கூட்டணி குறித்து முடிவெடுக்கவில்லை என்ற கேள்விக்கு பதிலளித்த அவர், “திமுக-வின் அஜெண்டாவே விஜய்யைத் தனித்துப் போட்டியிட வைத்து, அவரைத் தோற்கடிப்பதுதான்; இதற்காகவே தவெக-வுக்குள் புகுந்துள்ள உளவாளிகள் அவரை எந்தக் கூட்டணியிலும் சேர விடாமல் தடுத்து வருகின்றனர்” என்று அதிரடியாகத் தெரிவித்தார்.
புதுச்சேரி அரசியல் நிலவரம்
புதுச்சேரி அரசியலைப் பொறுத்தவரை, என். ரங்கசாமி தலைமையில் பாஜக, அதிமுக மற்றும் லட்சிய ஜனநாயக கட்சிகள் அடங்கிய கூட்டணி மிகவும் தெளிவாக இருப்பதாகவும், அங்கு மாற்றத்தைக் கொண்டுவரத் தீவிரமாகப் பணியாற்றி வருவதாகவும் அவர் குறிப்பிட்டார்.
ஜோஸ் மார்ட்டினின் குற்றச்சாட்டால் அதிரும் தவெக
நடிகர் விஜய்யின் அரசியல் வருகை தமிழ்நாடு அரசியலில் பெரிய எதிர்பார்ப்பை ஏற்படுத்தியுள்ள நிலையில், “உளவாளிகள் ஊடுருவல்” என்ற ஜோஸ் சார்லஸ் மார்ட்டினின் குற்றச்சாட்டு தவெக தொண்டர்களிடையே அதிர்ச்சியை ஏற்படுத்தியுள்ளது; தேர்தலில் விஜய் தனித்துப் போட்டியிடுவாரா அல்லது கூட்டணி அமைப்பாரா என்பது வரும் நாட்களில் தான் தெரியவரும்.