டெல்லி, ஜன.17; தமிழ்நாடு அரசியலில் கூட்டணி குறித்த விவாதங்கள் சூடுபிடித்துள்ள நிலையில், காங்கிரஸ் மூத்த தலைவர் ராகுல் காந்தியை தமிழ்நாடு மாநில காங்கிரஸ் நிர்வாகிகள் இன்று (17.01.2026) சந்திக்கின்றனர். வரும் தேர்தலில் திமுகவுடன் தொடர்வதா அல்லது நடிகர் விஜய்யின் தமிழக வெற்றிக் கழகத்துடன் (தவெக) கைகோர்ப்பதா என்பது குறித்து இந்த கூட்டத்தில் முக்கிய முடிவுகள் எடுக்கப்படலாம் என எதிர்பார்க்கப்படுகிறது.
காங்கிரஸ் நிர்வாகிகள் டெல்லி பயணம்
இது குறித்து தமிழ்நாடு காங்கிரஸ் மாநில துணைத் தலைவர் கோபண்ணா வெளியிட்டுள்ள அறிக்கையில், காங்கிரஸ் தலைமையகமான டெல்லி, இந்திரா பவனில் தமிழ்நாடு சட்டப்பேரவைத் தேர்தல் குறித்த ஆயத்தக் கூட்டம் இன்று மாலை 4 மணிக்கு நடைபெறுகிறது; அகில இந்திய காங்கிரஸ் தலைவர் மல்லிகார்ஜூன கார்கே, நாடாளுமன்ற மக்களவை எதிர்க்கட்சித் தலைவர் ராகுல்காந்தி ஆகியோர் இதில் பங்கேற்க உள்ளனர்;
ராகுல் காந்தியை தமிழ்நாடு காங்கிரஸ் நிர்வாகிகள் சந்திக்கின்றனர்
கூட்டத்தில், தமிழ்நாடு காங்கிரஸ் தலைவர் செல்வப்பெருந்தகை, சட்டமன்ற காங்கிரஸ் தலைவர் ராஜேஷ் குமார், தமிழ்நாடு காங்கிரஸ் முன்னாள் தலைவர்கள், அகில இந்திய காங்கிரஸ் செயலாளர்கள், தமிழ்நாட்டைச் சேர்ந்த அகில இந்திய காங்கிரஸ் துணை அமைப்புகளின் தலைவர்கள், முன்னாள் சட்டமன்ற காங்கிரஸ் கட்சித் தலைவர், எம்.பி. எம்.பி.க்கள் மற்றும் எம்.எல்.ஏ.க்கள் மல்லிகார்ஜூன கார்கே மற்றும் ராகுல்காந்தியை சந்திக்க உள்ளனர் என்று கோபண்ணாவின் அறிக்கையில் கூறப்பட்டுள்ளது.
தமிழ்நாடு காங்கிரஸ் தலைவர் செல்வப்பெருந்தகை தலைமையில், கட்சியின் முக்கிய நிர்வாகிகள் மற்றும் மாவட்டத் தலைவர்கள் டெல்லிக்கு விரைந்துள்ளனர். இன்று மதியம் ராகுல் காந்தியைச் சந்திக்கும் அவர்கள், தமிழ்நாட்டின் தற்போதைய அரசியல் சூழல் மற்றும் கட்சியின் பலம் குறித்து விரிவான அறிக்கை அளிக்க உள்ளனர்.
திமுக கூட்டணியில் நீடிப்பதில் சிக்கலா?
கடந்த சில தேர்தல்களாக திமுக தலைமையிலான கூட்டணியில் காங்கிரஸ் அங்கம் வகித்து வருகிறது. இருப்பினும், தொகுதிப் பங்கீடு மற்றும் உள்ளூர் மட்டத்திலான சில மனக்கசப்புகள் காரணமாக, காங்கிரஸ் நிர்வாகிகள் மத்தியில் மாற்றுச் சிந்தனைகள் எழுந்துள்ளதாகக் கூறப்படுகிறது. குறிப்பாக, வரும் சட்டப்பேரவைத் தேர்தலில் கூடுதல் இடங்களைப் பெறுவது குறித்து ராகுல் காந்தியிடம் விவாதிக்கப்பட உள்ளது.
தவெக எனும் புதிய காரணி
நடிகர் விஜய் தொடங்கியுள்ள தமிழக வெற்றிக் கழகம் (TVK), தமிழ்நாடு அரசியலில் ஒரு புதிய அதிர்வலையை ஏற்படுத்தியுள்ளது. விஜய்யின் அரசியல் வருகை இளைஞர்கள் மத்தியில் வரவேற்பைப் பெற்றுள்ள நிலையில், அவருடன் கூட்டணி அமைப்பது எதிர்காலத்திற்குப் பலன் தருமா என்பது குறித்தும் காங்கிரஸ் மேலிடம் ஆலோசித்து வருகிறது. திமுக கூட்டணியில் உரிய அங்கீகாரம் கிடைக்காவிட்டால், ‘தவெக’ ஒரு மாற்றாக இருக்குமா என்பது குறித்து ராகுல் காந்தி கருத்து கேட்க வாய்ப்புள்ளது.
மாவட்ட வாரியான கள நிலவரம்
இந்தச் சந்திப்பின் போது, ஒவ்வொரு மாவட்டத்திலும் காங்கிரஸின் தற்போதைய வாக்கு வங்கி மற்றும் உட்கட்சி விவகாரங்கள் குறித்து ராகுல் காந்தி கேட்டறிய உள்ளார். வரும் சட்டப்பேரவைத் தேர்தலை முன்னிட்டு கட்சியை வலுப்படுத்துவதற்கான செயல் திட்டங்களும் இந்த கூட்டத்தில் வகுக்கப்பட உள்ளன.
திமுகவுடன் நீடிப்பதா? அல்லது தவெக கூட்டணிக்கு நகருவதா?
தமிழ்நாடு அரசியலில் நீண்டகாலத் தோழமைக் கட்சியாக இருக்கும் திமுகவுடன் காங்கிரஸ் நீடிக்குமா அல்லது புதிய வரவான விஜய்யின் தவெக-வை நோக்கி நகருமா என்பது மில்லியன் டாலர் கேள்வியாக உள்ளது. ராகுல் காந்தியுடனான இன்றைய சந்திப்பு, தமிழ்நாட்டில் காங்கிரஸ் கட்சியின் அடுத்தகட்ட அரசியல் நகர்வைத் தீர்மானிக்கும் ஒரு முக்கிய முடிவாக அமையும் என்பதில் சந்தேகமில்லை.