நியூசிலாந்துக்கு எதிரான ஒருநாள் தொடர்; இந்திய அணி அறிவிப்பு – சுப்மன் கில் கேப்டனாக நியமனம்!

டெல்லி, ஜன.04; நியூசிலாந்து கிரிக்கெட் அணி இந்தியாவில் சுற்றுப்பயணம் செய்து 3 போட்டிகள் கொண்ட ஒருநாள் தொடரில் விளையாட உள்ளது. இதற்கான 15 பேர் கொண்ட பலமிக்க இந்திய அணியை கிரிக்கெட் கட்டுப்பாடு வாரியம (BCCI) நேற்று (03.01.2026)அதிகாரப்பூர்வமாக அறிவித்துள்ளது.

கேப்டனாக சுப்மன் கில் மற்றும் முக்கிய மாற்றங்கள்

இந்தத் தொடரில் இந்திய அணியை இளம் வீரர் சுப்மன் கில் வழிநடத்த உள்ளார். காயம் காரணமாக தென் ஆப்பிரிக்காவுக்கு எதிரான ஒருநாள் தொடரைத் தவறவிட்ட கில், தற்போது முழு தகுதியுடன் அணிக்குத் திரும்பியுள்ளார். மேலும், நட்சத்திர வீரர் ஸ்ரேயாஸ் துணை கேப்டனாக நியமிக்கப்பட்டுள்ளார். இருப்பினும், ஸ்ரேயாஸின் பங்களிப்பு அவர் பெங்களூருவில் உள்ள கிரிக்கெட் அகாடமியிடமிருந்து பெறும் உடல்தகுதிச் சான்றிதழைப் பொறுத்தே அமையும் எனத் தெரிவிக்கப்பட்டுள்ளது.

அணியில் இடம்பிடித்த மூத்த வீரர்கள்

அனுபவ வீரர்களான ரோகித் மற்றும் விராட் கோலி ஆகியோர் அணியில் நீடிக்கின்றனர். விக்கெட் கீப்பர்களாக கே.எல். ராகுல் மற்றும் ரிஷப் பன்ட் தேர்வு செய்யப்பட்டுள்ளனர். சமீபகாலமாக பன்ட் குறித்த பல்வேறு ஊகங்கள் நிலவி வந்த நிலையில், தேர்வுக்குழு அவர் மீது மீண்டும் நம்பிக்கை வைத்துள்ளது குறிப்பிடத்தக்கது.

ஹர்திக் பாண்ட்யா மற்றும் பும்ரா இல்லாதது ஏன்?

அணியின் முக்கிய ஆல்-ரவுண்டர் ஹர்திக் பாண்ட்யா மற்றும் வேகப்பந்து வீச்சாளர் ஜஸ்பிரித் பும்ரா ஆகியோருக்கு இந்தத் தொடரில் ஓய்வு அளிக்கப்பட்டுள்ளது. வரவிருக்கும் டி20 உலகக்கோப்பை தொடரை கருத்தில் கொண்டு, இவர்களின் பணிச்சுமையை (Workload Management) குறைக்கும் நோக்கில் இந்த முடிவு எடுக்கப்பட்டுள்ளது. குறிப்பாக, பாண்ட்யா இன்னும் 10 ஓவர்கள் வீசும் அளவுக்கு முழு உடற்தகுதி பெறவில்லை என்பதும் ஒரு காரணமாகக் கூறப்படுகிறது.

இந்திய ஒருநாள் அணி விவரம்: சுப்மன் கில் (கேப்டன்), ரோகித், விராட் கோலி, யஷஸ்வி ஜெய்ஸ்வால், ஸ்ரேயாஸ் (துணை கேப்டன்), கே.எல். ராகுல் (விக்கெட் கீப்பர்), ரிஷப் பன்ட் (விக்கெட் கீப்பர்), ரவீந்திர ஜடேஜா, வாஷிங்டன் சுந்தர், நிதிஷ் குமார், குல்தீப், முகமது சிராஜ், அர்ஷ்தீப் சிங், பிரசித் கிருஷ்ணா, ஹர்ஷித் ராணா

போட்டி அட்டவணை:

முதல் ஒருநாள் போட்டி: ஜனவரி 11 – வதோதரா,

இரண்டாவது ஒருநாள் போட்டி: ஜனவரி 14 – ராஜ்கோட்,

மூன்றாவது ஒருநாள் போட்டி: ஜனவரி 18 – இந்தூர்

டி20 உலகக் கோப்பைக்கு தயாராக உதவும் தொடர்

இளம் வீரர்களின் துடிப்பும், அனுபவ வீரர்களின் நிதானமும் கலந்த ஒரு கலவையாக இந்த அணி அமைந்துள்ளது. சொந்த மண்ணில் நடைபெற உள்ள இந்தத் தொடர், இந்திய அணிக்கு உலகக்கோப்பைத் தயாரிப்புகளுக்கு ஒரு சிறந்த வாய்ப்பாக அமையும் என்பதில் சந்தேகமில்லை.