டென்னிஸ் உலகின் ஜாம்பவான் நோவக் ஜோகோவிச், தான் இணை நிறுவனராக இருந்து உருவாக்கிய தொழில்முறை டென்னிஸ் வீரர்கள் சங்கத்திலிருந்து (PTPA) விலகுவதாக அறிவித்து விளையாட்டு உலகில் பெரும் பரபரப்பை ஏற்படுத்தியுள்ளார்.
ஜோகோவிச்சின் திடீர் விலகலுக்கான காரணம் என்ன?
கடந்த 2020-ஆம் ஆண்டு அமெரிக்க ஓபன் போட்டியின் போது, கனடா வீரர் வாசெக் போஸ்பிசிலுடன் (Vasek Pospisil) இணைந்து ஜோகோவிச் PTPA (Professional Tennis Players Association) அமைப்பைத் தொடங்கினார். வீரர்களின் உரிமைகளுக்காகவும், வெளிப்படையான நிர்வாகத்திற்காகவும் இந்த அமைப்பு உருவாக்கப்பட்டது.
தற்போது இந்த அமைப்பிலிருந்து விலகியது குறித்து ஜோகோவிச் தனது எக்ஸ் தளத்தில் பதிவிட்டுள்ளதாவது:
“மிகவும் ஆலோசித்த பிறகு, PTPA அமைப்பிலிருந்து முழுமையாக விலக முடிவு செய்துள்ளேன். இந்த அமைப்பின் தற்போதைய செயல்பாடுகள், நிர்வாகம் மற்றும் வெளிப்படைத்தன்மை ஆகியவை எனது கொள்கைகளுடன் ஒத்துப்போகவில்லை. எனது குரலும் பிம்பமும் அங்கு பிரதிநிதித்துவப்படுத்தப்படும் விதம் எனக்குத் திருப்தி அளிக்கவில்லை” என்று தெரிவித்துள்ளார்.
PTPA-வின் நோக்கமும் தற்போதைய சர்ச்சையும்
டென்னிஸ் வீரர்கள் ஒரு சுதந்திரமான ஒப்பந்ததாரர்களாக இருப்பதால், அவர்களுக்கென்று ஒரு வலுவான சங்கம் தேவை என்ற நோக்கத்தில் இது தொடங்கப்பட்டது. கடந்த மார்ச் மாதம், இந்த அமைப்பு டென்னிஸ் ஆளும் அமைப்புகளுக்கு எதிராக சட்டப்படி வழக்குத் தொடர்ந்தது. வீரர்களுக்குக் குறைந்த பரிசுத்தொகை வழங்கப்படுவதாகவும், அவர்களின் நலன்கள் புறக்கணிக்கப்படுவதாகவும் அந்த வழக்கில் குற்றஞ்சாட்டப்பட்டது.
தான் தொடங்கிய அமைப்ப திசை மாறிச் செல்வதாக அதிருப்தி
இருப்பினும், இந்த வழக்கில் ஜோகோவிச் ஒரு வாதியாகச் சேர்க்கப்படவில்லை. “மற்ற வீரர்களும் முன்வந்து பொறுப்பேற்க வேண்டும்” என்று அவர் அப்போது குறிப்பிட்டிருந்தார். தற்போது, அந்த அமைப்பின் திசைமாற்றம் காரணமாக அவர் அதிலிருந்து விலகியுள்ளார்.
ஜோகோவிச்சின் அடுத்த திட்டம்
தனது 38 வயதிலும் 24 கிராண்ட்ஸ்லாம் பட்டங்களை வென்று சாதனை படைத்துள்ள ஜோகோவிச், இனி வரும் காலங்களில் தனது முழு கவனத்தையும் டென்னிஸ் விளையாட்டு மற்றும் குடும்பத்தின் மீது செலுத்தப்போவதாகத் தெரிவித்துள்ளார்.
ஜனவரி 12ஆம் தேதி தொடங்கும் அடிலெய்டு ஏடிபி (Adelaide ATP) தொடரில் பங்கேற்க உள்ள அவர், அதன்பின் ஆஸ்திரேலிய ஓபன் தொடரில் தனது 25-வது கிராண்ட்ஸ்லாம் பட்டத்தை வெல்லும் முனைப்பில் களமிறங்க உள்ளார்.
டென்னிஸ் வீரர்கள் தொடங்கிய அமைப்பிலிருந்து நிறுவனரே விலகல்?
டென்னிஸ் வீரர்களின் குரலாக ஒலிக்கத் தொடங்கப்பட்ட PTPA-விலிருந்து அதன் நிறுவனரே விலகியது டென்னிஸ் வட்டாரத்தில் விவாதங்களை எழுப்பியுள்ளது. இருப்பினும், தனது நேர்மை மற்றும் கொள்கைகளுக்கு முக்கியத்துவம் அளிக்கும் ஜோகோவிச்சின் இந்த முடிவு, அவர் ஆடுகளத்திற்கு உள்ளேயும் வெளியேயும் ஒரு தனித்துவமான தலைவர் என்பதை மீண்டும் நிரூபித்துள்ளது.