சேலம்,பிப்.13; தமிழ்நாடு அரசியலில் ஒரு புயலைக் கிளப்பியுள்ளதாக நம்பப்படும் தமிழக வெற்றிக் கழகத்தின் தலைவர் விஜய், இன்று (13.02.2026) சேலத்தில் நடைபெற்ற நிர்வாகிகள் சந்திப்பில் ஆளுங்கட்சியை கடுமையாகச் சாடிப் பேசினார். தனது அரசியல் பயணம், எதிர்காலத் திட்டம் மற்றும் தற்போதைய ஆட்சியின் அவலங்கள் குறித்து அவர் முன்வைத்த கருத்துகள் இணையத்தில் வைரலாகி வருகின்றன.
மக்களிடம் ஆதரவு பெருகி வருவதாக பேச்சு
கட்சித் தொடங்கிய குறுகிய காலத்திலேயே தமிழக மக்களிடையே 30% ஆதரவைப் பெற்றுள்ளதாக விஜய் பெருமையுடன் சுட்டிக்காட்டினார். “களத்தில் தனியாக நின்று இரண்டே ஆண்டுகளில் ஒரு முதன்மை சக்தியாக நாங்கள் உருவெடுத்துள்ளோம். எங்களை யாராலும் விலைக்கு வாங்க முடியாது,” என்று அவர் ஆணித்தரமாகத் தெரிவித்தார்.
“கொள்ளையடிப்பதில் எங்களுக்கு அனுபவம் இல்லை”
ஆட்சி நடத்த அனுபவம் இல்லை என்று விமர்சிப்பவர்களுக்குப் பதிலளித்த விஜய், “மக்களை நேசிக்கும் மனம் இருந்தால் போதும், ஆட்சி நடத்த அனுபவம் தேவையில்லை. ஆம், எங்களுக்கு கொள்ளையடிப்பதில் அனுபவம் இல்லை. அதிகாரத்தில் இருந்து கொண்டு ஊழல் செய்வதைத் தவிர இவர்களுக்கு வேறு என்ன அனுபவம் இருக்கிறது?” என்று ஆவேசமாக கேள்வி எழுப்பினார்.
சட்டம் ஒழுங்கு குறித்த விமர்சனம்
தமிழ்நாட்டிற்கு முதல்வர் அடிக்கடி சொல்லும் ‘டெல்லிக்கு அவுட் ஆப் கண்ட்ரோல்’ என்ற வாசகத்தைப் பயன்படுத்திய விஜய், “உண்மையில் தமிழ்நாட்டில் சட்டம் ஒழுங்கு தான் இந்த ஆட்சியில் ‘அவுட் ஆப் கண்ட்ரோல்’ ஆக இருக்கிறது” என்று குற்றஞ்சாட்டினார். மேலும், மற்ற கட்சிகளுக்கு அனுமதி கொடுக்கும் அரசு, தான் மக்களைச் சந்திக்க இடம்கொடுக்க மறுப்பதாக வருத்தம் தெரிவித்தார்.
ஊழலுக்கு எதிரான சாட்டையடி
தேர்தல் வரும் நேரத்தில் வீடு வீடாகச் சென்று கனவுகளைக் கேட்பவர்கள், நான்கரை ஆண்டுகளாக என்ன செய்தார்கள்? என்று கேட்ட அவர், ஊழல் மூலம் சேர்த்த பணம் அனைத்தும் விரைவில் குப்பைக்குச் செல்லும் என்று தெரிவித்தார். “இந்த ஊழல் ஆட்சியை மக்கள் விரைவில் குப்பையில் தூக்கிப் போடப்போகிறார்கள்,” என்றும் அவர் எச்சரித்தார்.
வாக்காளர்களுக்கு ஒரு முக்கிய வேண்டுகோள்
வாக்காளர்களுக்கு அறிவுரை வழங்கிய விஜய், “உங்கள் ஓட்டு உங்கள் உரிமை. அவர்கள் கொடுக்கும் பணம் உங்கள் வரிப்பணம் தான். அந்தப் பணத்தை வாங்கிக்கொண்டு, அவர்கள் காதிலேயே நமது சின்னமான விசிலை ஊதி அவர்களை வீட்டுக்கு அனுப்புங்கள். வெறுப்பு அரசியலுக்காக நாம் இங்கு வரவில்லை” என்று உருக்கமாகக் கேட்டுக்கொண்டார்.
நல்லாட்சியை வழங்க நான் தயார்: விஜய்
காமராஜர் மற்றும் எம்.ஜி.ஆர் ஆகியோரின் நற்பெயரை மீட்டெடுக்கும் வகையில் ஒரு நல்லாட்சியை வழங்கத் தான் தயார் என்று விஜய் உறுதி அளித்துள்ளார். 8 கோடி தமிழ் மக்களையும் தனது சொந்தங்களாகக் கருதுவதாகக் கூறியுள்ள அவரது இந்த உரை, வரும் தேர்தலில் ஒரு மிகப்பெரிய மாற்றத்தை ஏற்படுத்துமா? என்பதை பொறுத்திருந்து தான் பார்க்க வேண்டும்.