தேசிய புலனாய்வு முகமை ஜம்மு காஷ்மீரின் பஹல்காமில் நடந்த பயங்கரவாத தாக்குதல் தொடர்பாக, சமீபத்தில் ஜம்முவில் உள்ள சிறப்பு நீதிமன்றத்தில் 1,597 பக்கங்கள் கொண்ட பிரம்மாண்ட குற்றப்பத்திரிகையைத் தாக்கல் செய்துள்ளது. சுமார் எட்டு மாதங்களாக மேற்கொள்ளப்பட்ட நுணுக்கமான அறிவியல் பூர்வ விசாரணையின் முடிவில், இந்தத் தாக்குதலுக்கான சதித்திட்டம் பாகிஸ்தானில் இருந்து பின்னப்பட்டதை தேசிய புலனாய்வு முகமை உறுதிப்படுத்தியுள்ளது.
லஷ்கர்-இ-தொய்பா மற்றும் அதன் களையான ‘தி ரெசிஸ்டன்ஸ் ஃபிரண்ட்’ ஆகிய பயங்கரவாத அமைப்புகளைச் சேர்ந்த ஏழு பேர் மீது இந்தக் குற்றச்சாட்டுகள் சுமத்தப்பட்டுள்ளன. இந்தச் சதித்திட்டத்தின் முக்கிய சூத்திரதாரி மற்றும் பயங்கரவாதியாக பாகிஸ்தானைச் சேர்ந்த சஜித் ஜாட் என்பவர் குற்றஞ்சாட்டப்பட்டுள்ளார். இவரின் அசல் பெயர் ஹபிபுல்லா மாலிக் ஆகும்.
பாகிஸ்தான் ஆதரவு சதித்திட்டம்
பாகிஸ்தான் தொடர்ந்து இந்தியாவுக்கு எதிராகப் பயங்கரவாதத்தை ஊக்குவித்து வருவதை அறிக்கை சுட்டிக்காட்டியுள்ளது. இந்தப் பஹல்காம் தாக்குதல், இந்திய இறையாண்மைக்கு எதிராகப் போர் தொடுக்கும் நோக்கில் திட்டமிடப்பட்டுள்ளது. இத்தாக்குதலில் 25 சுற்றுலாப் பயணிகளும் ஒரு உள்ளூர் பொதுமக்களும் கொல்லப்பட்டனர்.
குற்றம் சாட்டப்பட்டவர்களின் விவரம்
குற்றப்பத்திரிகையில் பெயரிடப்பட்டவர்களில், மூன்று பாகிஸ்தானிய பயங்கரவாதிகள் ஜூலை 2025-ல் ஸ்ரீநகரின் டச்சி்காமில் நடந்த ‘ஆபரேஷன் மகாதேவ்’ நடவடிக்கையின் போது பாதுகாப்புப் படையினரால் சுட்டுக் கொல்லப்பட்டனர்.
இவர்களுடன், பயங்கரவாதிகளுக்கு அடைக்கலம் கொடுத்து உதவியதாக இரண்டு உள்ளூர்வாசிகள் மீதும் குற்றம் சாட்டப்பட்டுள்ளது. அவர்கள் பர்வேஸ் அஹ்மத் மற்றும் பஷீர் அஹ்மத் ஜோதத் ஆவர். இந்த உள்ளூர்வாசிகளின் வாக்குமூலத்தின் அடிப்படையில், தாக்குதலில் ஈடுபட்டவர்கள் லஷ்கர்-இ-தொய்பாவுடன் தொடர்புடைய பாகிஸ்தானியர்கள் என்பது உறுதிப்படுத்தப்பட்டது.
தாக்குதல் தொடர்பான ஆவணங்களை வெளியிட்டது NIA
தடை செய்யப்பட்ட லஷ்கர்-இ-தொய்பா மற்றும் அமைப்புகள் சட்டரீதியான நிறுவனங்களாகவே இந்தத் தாக்குதலைத் திட்டமிட்டு, அதற்கு வசதி செய்து, செயல்படுத்தியதற்கான ஆதாரங்களை தேசிய புலனாய்வு முகமை திரட்டியுள்ளது.
குற்றம் சாட்டப்பட்டவர்கள் மீது பாரதிய நியாய சன்ஹிதா, 2023, ஆயுதச் சட்டம், 1959 மற்றும் சட்டவிரோத நடவடிக்கைகள் (தடுப்பு) சட்டம், 1967 ஆகியவற்றின் கீழ் ‘இந்தியாவுக்கு எதிராகப் போர் தொடுத்தல்’ உள்ளிட்ட கடுமையான பிரிவுகளில் வழக்கு பதிவு செய்யப்பட்டுள்ளது.