புளோரிடா,டிச.30; அமெரிக்க அதிபர் டொனால்ட் டிரம்ப் மற்றும் ரஷ்ய அதிபர் விளாடிமிர் புதின் இடையிலான சமீபத்திய தொலைபேசி உரையாடல் உலக அரசியலில் பெரும் பரபரப்பை ஏற்படுத்தியுள்ளது. ரஷ்ய அதிபரின் இல்லத்தை இலக்கு வைத்து உக்ரைன் ட்ரோன் தாக்குதல் நடத்தியதாக கூறப்படும் விவகாரம் குறித்து டிரம்ப் தனது அதிருப்தியை வெளிப்படுத்தியுள்ளார்.
டிரம்ப் – புதின் உரையாடல்; நடந்தது என்ன?
புளோரிடாவில் உள்ள தனது மார்-ஏ-லகோ இல்லத்தில் இஸ்ரேல் பிரதமர் பெஞ்சமின் நெதன்யாகுவை சந்திப்பதற்கு முன்னதாக டிரம்ப் செய்தியாளர்களிடம் பேசினார். அப்போது, ரஷ்ய அதிபர் புதினுடன் தான் பேசியதை உறுதிப்படுத்தினார்.
“இன்று அதிகாலை (29.12.2025) அதிபர் புதின் என்னிடம் பேசினார். தனது இல்லத்தின் மீது ட்ரோன் தாக்குதல் நடத்தப்பட்டதாக அவர் தெரிவித்தார். இது நல்லதல்ல, இந்தச் செய்தியால் நான் மிகவும் கோபமடைந்துள்ளேன்” என்று டிரம்ப் கூறினார். இருப்பினும், இந்தத் தாக்குதல் குறித்து தனக்கு முழுமையான தகவல்கள் இல்லை என்றும், இது உண்மையா என்பது குறித்து இன்னும் உறுதிப்படுத்தப்படவில்லை என்றும் அவர் குறிப்பிட்டார்.
உக்ரைனின் மறுப்பு மற்றும் ரஷ்யாவின் குற்றச்சாட்டு
ரஷ்ய வெளியுறவுத்துறை அமைச்சர் செர்ஜி லாவ்ரோவ் கூறுகையில், மாஸ்கோவிற்கு மேற்கே உள்ள நோவ்கோரோட் (Novgorod) பகுதியில் உள்ள புதினின் இல்லத்தை இலக்கு வைத்து டிசம்பர் 28 மற்றும் 29 ஆகிய தேதிகளில் உக்ரைன் ட்ரோன்களை ஏவியதாகக் குற்றம் சாட்டினார். மொத்தம் 91 ட்ரோன்கள் ஏவப்பட்டதாகவும், அவை அனைத்தும் ரஷ்ய வான் பாதுகாப்புப் படையினரால் இடைமறிக்கப்பட்டதாகவும் ரஷ்யா தெரிவித்துள்ளது.
மறுபுறம், உக்ரைன் இந்தக் குற்றச்சாட்டுகளை முற்றிலுமாக மறுத்துள்ளது. ரஷ்யாவின் இந்தத் தகவல்கள் ஆதாரமற்றவை என்று உக்ரைன் தரப்பு விளக்கம் அளித்துள்ளது.
அமைதிப் பேச்சுவார்த்தையில் சிக்கலா?
கடந்த 24 மணிநேரத்தில் டிரம்ப் மற்றும் புதின் இடையே இது இரண்டாவது முறை நடந்த பேச்சுவார்த்தையாகும். இதற்கு முந்தைய நாள் டிரம்ப் உக்ரைன் அதிபர் ஜெலென்ஸ்கியுடன் பேசியிருந்தார்.
“நாங்கள் சில முக்கியமான மற்றும் கடினமான சிக்கல்களைக் கையாண்டு வருகிறோம். இந்தப் பிரச்சினைகளுக்குத் தீர்வு காணப்பட்டால், அமைதி திரும்புவதற்கான வாய்ப்புகள் உள்ளன” என்று டிரம்ப் நம்பிக்கை தெரிவித்தார். ஜெலென்ஸ்கியுடனான சந்திப்பிற்குப் பிறகு, போர் முடிவுக்கு வருவதற்கான வாய்ப்புகள் நெருங்கிவிட்டதாகவும் அவர் குறிப்பிட்டிருந்தார்.
போரை முடிவுக்கு கொண்டுவர டிரம்ப் எடுக்கும் முயற்சிகள் பலனைத்தருமா?
ரஷ்யா-உக்ரைன் போரை முடிவுக்குக் கொண்டுவர டிரம்ப் தீவிர முயற்சி எடுத்து வரும் நிலையில், புதின் இல்லத்தின் மீதான இந்த ட்ரோன் தாக்குதல் புகார் பெரும் பின்னடைவாகப் பார்க்கப்படுகிறது. ஒருவேளை இந்தத் தாக்குதல் உறுதி செய்யப்பட்டால், இரு நாடுகளுக்கும் இடையிலான பதற்றம் மேலும் அதிகரிக்கும் என்பதில் சந்தேகமில்லை. உலக நாடுகள் அனைத்தும் டிரம்பின் அடுத்தகட்ட நகர்வுகளை உன்னிப்பாக கவனித்து வருகின்றன.