டாக்கா,ஜன.04; இந்திய கிரிக்கெட் கட்டுப்பாட்டு வாரியம் (BCCI) மற்றும் கொல்கத்தா நைட் ரைடர்ஸ் (KKR) அணி இணைந்து எடுத்த ஒரு முக்கிய முடிவைத் தொடர்ந்து, வரும் டி20 உலகக்கோப்பையில் வங்கதேச அணியின் பங்கேற்பு குறித்து பெரும் கேள்விக்குறி எழுந்துள்ளது.
முஸ்தஃபிசுர் ரஹ்மானை விடுவித்த கொல்கத்தா நைட் ரைடர்ஸ்
சமீபத்தில் நடைபெற்ற ஐபிஎல் ஏலத்தில் வங்கதேச வேகப்பந்து வீச்சாளர் முஸ்தஃபிசுர் ரஹ்மானை ரூ.9.20 கோடிக்கு கொல்கத்தா அணி ஏலத்தில் எடுத்தது. இருப்பினும், வங்கதேசத்தில் நிலவும் அரசியல் சூழல் மற்றும் இந்து சிறுபான்மையினருக்கு எதிரான வன்முறை சம்பவங்கள் காரணமாக, அவரை அணியிலிருந்து விடுவிக்குமாறு கிரிக்கெட் கட்டுப்பாடு வாரியம் (BCCI) உத்தரவிட்டது. இதனைத் தொடர்ந்து, கே.கே.ஆர் அணி அதிகாரப்பூர்வமாக அவரை விடுவித்துள்ளது.
டி20 உலகக்கோப்பை போட்டிகளை மாற்றக் கோரும் வங்கதேசம்
முஸ்தஃபிசுர் ரஹ்மான் மீதான இந்த நடவடிக்கையைத் தொடர்ந்து, வங்கதேச கிரிக்கெட் வாரியம் (BCB) தனது வீரர்களின் பாதுகாப்பு குறித்து கவலை தெரிவித்துள்ளது. இதன் காரணமாக, வரும் பிப்ரவரியில் இந்தியாவில் நடைபெறவுள்ள டி20 உலகக்கோப்பை போட்டிகளில், வங்கதேச அணி விளையாடும் இடங்களை (Venues) மாற்றக் கோரி சர்வதேச கிரிக்கெட் கவுன்சிலை (ICC) அணுக முடிவு செய்துள்ளது.
பாகிஸ்தான் அணி தனது போட்டிகளை இலங்கையில் விளையாடுவது போல, வங்கதேசமும் தனது லீக் போட்டிகளை இந்தியாவிற்கு வெளியே நடத்தக் கோரி விண்ணப்பிக்க உள்ளதாகத் தகவல்கள் தெரிவிக்கின்றன.
இந்திய கிரிக்கெட் கட்டுப்பாடு வாரியத்தின் நிலைப்பாடு என்ன?
இது குறித்து கருத்து தெரிவித்துள்ள கிரிக்கெட் கட்டுப்பாடு வாரியத் தலைவர் மிதுன் மன்ஹாஸ், “தற்போது எடுக்கப்பட்டுள்ள முடிவு ஐபிஎல் தொடருக்கு மட்டுமே பொருந்தும். உலகக்கோப்பை போட்டிகளில் வங்கதேசத்தின் பங்கேற்பு குறித்து இன்னும் எந்த விவாதமும் நடத்தப்படவில்லை. பாதுகாப்பு மற்றும் அரசு ஆலோசனைகளின் அடிப்படையில் எதிர்காலத்தில் முடிவுகள் அறிவிக்கப்படும்” என்று தெரிவித்துள்ளார்.
இந்திய அணியின் வங்கதேச பயணம் ரத்து?
இந்த அரசியல் பதற்றங்களுக்கு மத்தியில், வரும் செப்டம்பரில் இந்திய அணி வங்கதேசத்திற்குச் சென்று விளையாட திட்டமிடப்பட்டிருந்த ஒருநாள் மற்றும் டி20 தொடர்களும் தற்போது நிறுத்தி வைக்கப்பட்டுள்ளன. இந்திய அரசின் அனுமதி இன்றி இந்திய அணி அங்கு செல்ல வாய்ப்பில்லை என்பதால் இத்தொடர் ரத்தாகக்கூடும் எனத் தெரிகிறது.
விளையாட்டும் அரசியலும் தனித்தனியே பார்க்கப்பட வேண்டும்!
விளையாட்டும் அரசியலும் தனித்தனியாகப் பார்க்கப்பட வேண்டும் என்று ஒரு தரப்பினர் கூறினாலும், நாட்டின் பாதுகாப்பு மற்றும் மக்களின் உணர்வுகளுக்கு மதிப்பளித்தே இந்திய கிரிக்கெட் கட்டுப்பாடு வாரியம் இந்த முடிவை எடுத்துள்ளதாகத் தெரிகிறது. முஸ்தஃபிசுர் ரஹ்மானின் நீக்கம் மற்றும் உலகக்கோப்பை இடமாற்றக் கோரிக்கை ஆகியவை வரும் நாட்களில் கிரிக்கெட் உலகில் பெரும் மாற்றங்களை ஏற்படுத்தும் என எதிர்பார்க்கப்படுகிறது.