மும்பை, ஜன.02; இந்திய கிரிக்கெட் அணியின் ஜாம்பவான்களான விராட் கோலி மற்றும் ரோகித் ஆகியோரின் ஒருநாள் போட்டி (ODI) எதிர்காலம் குறித்த விவாதங்கள் தற்போது சூடுபிடித்துள்ளன. டெஸ்ட் மற்றும் டி20 போட்டிகளில் இருந்து ஓய்வு பெற்றுள்ள நிலையில், அவர்கள் ஒருநாள் போட்டிகளில் மட்டும் கவனம் செலுத்தி வருகின்றனர்.
முத்தரப்பு தொடர்களின் அவசியம்
இந்திய அணியின் முன்னாள் ஆல்-ரவுண்டர் இர்ஃபான் பதான், கிரிக்கெட் கட்டுப்பாடு வாரியத்திற்கு (BCCI) ஒரு சுவாரஸ்யமான ஆலோசனையை வழங்கியுள்ளார். 2027ஆம் ஆண்டு ஒருநாள் உலகக் கோப்பைக்கு கோலி மற்றும் ரோகித் தங்களை தயார்படுத்திக் கொள்ள வேண்டுமானால், அவர்களுக்கு அதிக போட்டிகள் தேவை என்று அவர் கூறியுள்ளார்.
கிரிக்கெட் வாரியத்திற்கு இர்ஃபான் விடுக்கும் கோரிக்கை
தற்போது ஒரு தொடரில் வெறும் 3 ஒருநாள் போட்டிகள் மட்டுமே நடத்தப்படுகின்றன. இதற்கு பதிலாக 5 போட்டிகள் கொண்ட தொடர்களாகவோ அல்லது முத்தரப்பு (Triangular) மற்றும் நான்கு நாடுகள் பங்கேற்கும் தொடர்களாகவோ நடத்தப்பட வேண்டும் என்று அவர் வலியுறுத்தியுள்ளார்.
உள்நாட்டு கிரிக்கெட்டில் கவனம்
சர்வதேச போட்டிகள் இல்லாத நேரங்களில், இந்த மூத்த வீரர்கள் இருவரும் விஜய் ஹசாரே கோப்பை போன்ற உள்நாட்டு ஒருநாள் போட்டிகளில் விளையாட வேண்டும் என்று பதான் அறிவுறுத்தியுள்ளார். இதன் மூலம் அவர்கள் ஆட்டத் திறனை (Match Fitness) குறையாமல் பார்த்துக்கொள்ள முடியும். கடந்த வாரம் கூட இவர்கள் இருவரும் தங்களது மாநில அணிகளுக்காக விஜய் ஹசாரே தொடரில் விளையாடியது குறிப்பிடத்தக்கது.
ரசிகர்களின் எதிர்பார்ப்பு
விராட் மற்றும் ரோகித் ஆகிய இருவரும் ஒருநாள் போட்டிகளில் களமிறங்கும்போது மைதானங்களில் கூட்டம் அலைமோதுகிறது. இவர்களின் வருகையே ஒருநாள் கிரிக்கெட் மீதான ஆர்வத்தை மீண்டும் அதிகரித்துள்ளதாக கிரிக்கெட் விமர்சகர்கள் கருதுகின்றனர். எனவே, அவர்களின் அனுபவத்தை வரும் உலகக் கோப்பை வரை சரியாகப் பயன்படுத்திக் கொள்வதே இந்திய அணிக்கு லாபகரமாக இருக்கும்.
இர்ஃபானின் கோரிக்கைக்கு செவிமடுக்குமா கிரிக்கெட் வாரியம்?
2027 உலகக் கோப்பை இன்னும் நீண்ட தூரத்தில் இருந்தாலும், கோலி மற்றும் ரோகித் போன்ற வீரர்களுக்கு முறையான பயிற்சி மற்றும் தொடர்ச்சியான போட்டிகள் வழங்குவது அவசியம். கிரிக்கெட் கட்டுபாடு வாரியம் இர்ஃபான் பதானின் ஆலோசனையை ஏற்று முத்தரப்பு தொடர்களை மீண்டும் கொண்டு வருமா என்பதை பொறுத்திருந்துதான் பார்க்க வேண்டும்.