ஆக்லாந்து, ஜன.05; ஆஸ்திரேலிய ஓபன் டென்னிஸ் தொடர் தொடங்க உள்ள நிலையில், அமெரிக்காவின் ஜாம்பவான் வீனஸ் வில்லியம்ஸ் மீண்டும் களமிறங்கத் தயாராகி வருகிறார். 45 வயதிலும் தனது விடாமுயற்சியால் புதிய வரலாறு படைக்கத் துடிக்கிறார், வீனஸ் வில்லியம்ஸ்.
ஆஸ்திரேலிய ஓபனில் புதிய சாதனை
7 முறை கிராண்ட் ஸ்லாம் சாம்பியன் பட்டம் வென்ற வீனஸ் வில்லியம்ஸ், இந்த ஆண்டு ஆஸ்திரேலிய ஓபனில் பங்கேற்பதன் மூலம் ஒரு புதிய சாதனையைப் படைக்க உள்ளார். இத்தொடரின் பிரதான சுற்றில் (Main Draw) விளையாடும் மிகவும் வயதான வீராங்கனை என்ற பெருமையை அவர் பெறுகிறார். இதற்கு முன் ஜப்பானின் கிமிகோ டேட் (Kimiko Date) தனது 44 வயதில் விளையாடியதே சாதனையாக இருந்தது.
“இன்னும் எனக்குள் அந்த நெருப்பு இருக்கிறது”
ஆக்லாந்தில் செய்தியாளர்களிடம் பேசிய வீனஸ், “நான் இவ்வளவு தூரம் பயணம் செய்து வருவது விளையாடுவதற்காக மட்டும் அல்ல, எனக்குள் இன்னும் அந்த வெற்றித் தாகம் (Fire) இருக்கிறது” என்று கூறினார். மேலும், டென்னிஸ் விளையாடுவது தன்னை உடற்தகுதியுடன் வைத்திருக்க உதவுவதாகவும், சவால்களை எதிர்கொள்வதே ஒரு சாம்பியனின் குணம் என்றும் அவர் நெகிழ்ச்சியுடன் குறிப்பிட்டார்.
நீண்ட இடைவேளைக்குப் பின் மீண்டெழுதல்
கடந்த 2021ஆம் ஆண்டுக்குப் பிறகு முதல்முறையாக மெல்போர்ன் பூங்காவில் வீனஸ் விளையாட உள்ளார். இடையில் காயம் மற்றும் உடல்நலக் குறைபாடுகள் காரணமாக 16 மாதங்கள் ஓய்வில் இருந்த அவர், கடந்த ஆண்டு அமெரிக்க ஓபனில் மீண்டும் தனது ஆட்டத்தைத் தொடங்கினார்.
தற்போது ஆஸ்திரேலிய ஓபனுக்கு முன்னதாக ஆக்லாந்து மற்றும் ஹோபார்ட் ஆகிய இடங்களில் நடைபெறும் பயிற்சி ஆட்டங்களில் அவர் பங்கேற்கிறார்.
வயது என்பது வெறும் எண்கள்தான் என்பதை நிரூபிக்க முனைப்பு
டென்னிஸ் உலகின் முடிசூடா ராணியாக விளங்கிய வீனஸ் வில்லியம்ஸ், வயது என்பது வெறும் எண்கள்தான் என்பதை மீண்டும் நிரூபித்து வருகிறார். அனுபவம் வாய்ந்த வீராங்கனையாக அவர் இந்தத் தொடரில் எந்த அளவிற்கு சாதிக்கப் போகிறார் என்பதைப் பார்க்க ஒட்டுமொத்த விளையாட்டு உலகமே ஆவலுடன் காத்திருக்கிறது.