டெல்லி,பிப்.05; நாடாளுமன்றத்தின் பட்ஜெட் கூட்டத்தொடரில் ஒரு முக்கிய திருப்பமாக, 2004-ஆம் ஆண்டிற்குப் பிறகு முதன்முறையாக, பிரதமரின் பதிலுரை இல்லாமலேயே குடியரசுத் தலைவரின் உரைக்கு நன்றி தெரிவிக்கும் தீர்மானம் மக்களவையில் இன்று (05.02.2026) நிறைவேற்றப்பட்டது.
எதிர்க்கட்சிகளின் அமளி மற்றும் முழக்கங்கள்
பட்ஜெட் கூட்டத்தொடரின் ஒரு பகுதியாக, கடந்த மாதம் 28ஆம் தேதியன்று நாடாளுமன்றத்தின் இரு அவைகளின் கூட்டுக் கூட்டத்தில் குடியரசுத் தலைவர் திரௌபதி முர்மு ஆற்றிய உரைக்கு நன்றி தெரிவிக்கும் தீர்மானம் இன்று (05.02.2026) மக்களவையில் எடுத்துக்கொள்ளப்பட்டது. பொதுவாக, இந்தத் தீர்மானத்தின் மீதான விவாதத்திற்குப் பிறகு பிரதமர் பதிலளிப்பது மரபு. ஆனால், இன்று எதிர்க்கட்சிகளின் கடும் அமளி மற்றும் முழக்கங்களுக்கு இடையே இந்தத் தீர்மானம் குரல் வாக்கெடுப்பு மூலம் நிறைவேற்றப்பட்டது.
ராகுல் காந்தி பேச அனுமதி மறுப்பு எனப் புகார்
இந்த விவாதத்தின் போது, மக்களவை எதிர்க்கட்சித் தலைவர் ராகுல் காந்தி பேசுவதற்கு உரிய வாய்ப்பு வழங்கப்படவில்லை என்று ‘இந்தியா’ கூட்டணி எம்.பி.க்கள் குற்றஞ்சாட்டினர். குறிப்பாக, 2020-ல் இந்தியா-சீனா எல்லை மோதல் தொடர்பாக முன்னாள் ராணுவ தளபதி எம்.எம். நரவனே எழுதிய வெளியிடப்படாத சுயசரிதை பற்றி ராகுல் காந்தி பேசுவதற்குத் அனுமதி மறுப்பதாகக் கூற எதிர்க்கட்சியினர் முழக்கங்களை எழுப்பினர்.
22 ஆண்டுகளுக்குப் பிறகு நடக்கும் நிகழ்வு
இதற்கு முன் 2004-ஆம் ஆண்டு, அப்போதைய பிரதமர் மன்மோகன் சிங் பதிலளிக்க முடியாத நிலையில் இதேபோன்ற சூழல் ஏற்பட்டது. அதன் பிறகு இப்போதுதான் 22 ஆண்டுகளுக்குப் பின் பிரதமரின் உரை இன்றி இந்தத் தீர்மானம் நிறைவேற்றப்பட்டுள்ளது. எதிர்க்கட்சிகளின் தொடர் இடையூறுகளால் சபையை நடத்த முடியாத சூழல் ஏற்பட்டதாக அரசுத் தரப்பு குற்றஞ்சாட்டியுள்ளது.
மோதல் போக்கால் சிதையும் நாடாளுமன்ற மரபுகள்
மக்களாட்சி தத்துவத்தில் நாடாளுமன்ற விவாதங்கள் மிக முக்கியமானவை. ஆனால், ஆளுங்கட்சிக்கும் எதிர்க்கட்சிக்கும் இடையே நிலவும் மோதல் போக்கு, நாடாளுமன்ற மரபுகளைச் சிதைப்பதாக அரசியல் விமர்சகர்கள் கவலை தெரிவிக்கின்றனர். பிரதமரின் பதிலுரை இல்லாமலேயே ஒரு முக்கிய தீர்மானம் நிறைவேற்றப்பட்டது இந்திய நாடாளுமன்ற வரலாற்றில் ஒரு விரும்பத்தகாத நிகழ்வாகப் பதிவாகியுள்ளது.