சேலம்,டிச.29; தமிழ்நாடு அரசியலில் 2026 சட்டப்பேரவைத் தேர்தல் களம் இப்போதே சூடுபிடிக்கத் தொடங்கிவிட்டது. குறிப்பாக, பாட்டாளி மக்கள் கட்சியில் ஏற்பட்டுள்ள உட்கட்சி மோதலும், டாக்டர் ராமதாஸ் மற்றும் அன்புமணி ஆகியோருக்கு இடையேயான அரசியல் நிலைப்பாடுகளும் புதிய விவாதங்களை கிளப்பியுள்ளன. தற்போதைய சூழலில் டாக்டர் ராமதாஸ் தரப்பு, விஜய்யின் தமிழக வெற்றிக் கழகத்துடன் கூட்டணி அமைக்க வாய்ப்புள்ளதா என்ற கேள்வி எழுந்துள்ளது.
பாமகவில் தந்தை – மகன் இடையே மோதல்?
சமீபகாலமாக பாமகவில் டாக்டர் ராமதாஸ் மற்றும் அவரது மகன் அன்புமணி ஆகியோருக்கு இடையே கட்சியை வழிநடத்துவது மற்றும் கூட்டணி வைப்பதில் கருத்து வேறுபாடுகள் நிலவி வருகின்றன. கட்சிக்கு யார் தலைமை என்பது தொடர்பாக வழக்கு விசாரணை டெல்லி உயர் நீதிமன்றத்தில் நடைபெற்றுவருகிறது. இதுபோன்ற சூழலில், அன்புமணி பாஜக கூடணியை ஆதரிக்கும் நிலையில், டாக்டர் ராமதாஸ் தரப்பு மாற்று அரசியல் பாதையை நோக்கி நகர்வதாகத் தெரிகிறது.
ஸ்ரீகாந்தியின் அதிரடி பேச்சு; பாஜகவுக்கு கல்தாவா?
சேலத்தில் இன்று (29.12.2025) நடைபெற்ற பாமக பொதுக்குழு கூட்டத்தில் ராமதாஸின் மகளும், அக்கட்சியின் செயல் தலைவருமான ஸ்ரீகாந்தி பேசிய பேச்சு அரசியல் வட்டாரத்தில் பெரும் பரபரப்பை ஏற்படுத்தியுள்ளது. அன்புமணி தரப்பை “ஆர்எஸ்எஸ்-ன் அடிமைகள்” என்று விமர்சித்த அவர், ஜி.கே.மணி உள்ளிட்ட நிர்வாகிகளை அன்புமணி தரப்பு விமர்சிப்பதையும் சுட்டிக்காட்டினார்.
அன்புமணி தரப்பை பாஜகவின் ஆதரவாளர்களாகச் சித்தரிப்பதன் மூலம், டாக்டர் ராமதாஸ் தரப்பு வரும் தேர்தலில் பாஜகவுடன் கூட்டணி அமைக்கப் போவதில்லை என்பது ஓரளவுக்கு உறுதியாகியுள்ளது.
2026 வியூகம்; ஆட்சி மாற்றம் மற்றும் ஆட்சியில் பங்கு
ஸ்ரீகாந்தியின் பேச்சில் மிக முக்கியமான விஷயமாகப் பார்க்கப்படுவது, “2026-ல் ஆட்சி மாற்றம் வேண்டும்” மற்றும் “ஆட்சியில் பங்கு வேண்டும்” என்பதுதான்.
திமுக எதிர்ப்பு: ஆட்சி மாற்றம் வேண்டும் என்று கூறுவதன் மூலம் திமுக கூட்டணியை மருத்துவர் ராமதாஸ் நிராகரிக்கிறார்.
ஆட்சியில் பங்கு: திமுக ஒருபோதும் தனது ஆட்சியில் கூட்டணிக் கட்சிகளுக்குப் பங்கு தர சம்மதிக்காது என்பது வெளிப்படையானது.
தவெக – பாமக கூட்டணி அமையுமா?
இந்தச் சூழலில் தான் தமிழக வெற்றிக் கழகம் முக்கியத்துவம் பெறுகிறது. நடிகர் விஜய் தனது கட்சியின் முதல் மாநாட்டிலேயே “ஆட்சியில் பங்கு” என்ற வாக்குறுதியை வழங்கினார்.
தொகுதி பங்கீடு: ஸ்ரீகாந்தி தனது பேச்சில் “25 எம்.எல்.ஏ-க்களுடன் சட்டப்பேரவைக்கு செல்வோம்” என்று குறிப்பிட்டுள்ளார். திமுகவோ அல்லது அதிமுகவோ பாமகவின் ஒரு பிரிவுக்கு இத்தனை இடங்களை ஒதுக்குவது கடினம்.
ஒத்த கருத்து: தவெக தற்போதைக்கு ஆட்சியில் பங்கு தரத் தயாராக இருக்கும் ஒரே கட்சி என்பதால், டாக்டர் ராமதாஸ் தரப்பு தவெக-வை நோக்கி நகர அதிக வாய்ப்புள்ளதாக அரசியல் விமர்சகர்கள் கருதுகின்றனர்.
டாக்டர் ராமதாஸ் வகுத்துள்ள 2026 தேர்தல் வியூகம் பாமகவை ஒரு தவிர்க்க முடியாத சக்தியாக மாற்றும் என அவரது ஆதரவாளர்கள் நம்புகின்றனர். அன்புமணியின் பாஜக ஆதரவு நிலைப்பாட்டிற்கு மாறாக, தவெக-வுடன் டாக்டர் ராமதாஸ் கைகோர்த்தால், அது தமிழக தேர்தல் களத்தில் ஒரு புதிய திருப்பத்தை ஏற்படுத்தும் என்பதில் சந்தேகமில்லை.