கொல்கத்தா,மே.11; மேற்கு வங்க அரசியலில் பெரும் பரபரப்பை ஏற்படுத்தும் வகையில், திரிணாமுல் காங்கிரஸ் (TMC) கட்சியிலிருந்து இடைநீக்கம் செய்யப்பட்ட செய்தித் தொடர்பாளர் ரிஜு தத்தா, முதலமைச்சர் சுவேந்து அதிகாரியைப் பாராட்டியும், மம்தா பானர்ஜி தலைமையிலான கட்சி நிர்வாகத்தைக் கடுமையாக விமர்சித்தும் பேசியுள்ளார்.
சுவேந்து அதிகாரியின் நிதானம்: ரிஜு தத்தா பாராட்டு
மேற்கு வங்கத் தேர்தல் முடிவுகளுக்குப் பிறகு, பாஜக தலைவர் சுவேந்து அதிகாரியின் உதவியாளர் கொல்லப்பட்ட சம்பவத்தைத் தொடர்ந்து பெரிய அளவிலான வன்முறை வெடிக்காமல் தடுத்ததாக ரிஜு தத்தா குறிப்பிட்டார்.
“சுவேந்து அதிகாரி குறைந்தபட்சம் 5,000 திரிணாமுல் காங்கிரஸ் தொண்டர்களின் உயிரைக் காப்பாற்றியுள்ளார். கடந்த 6ஆம் தேதிய சுவேந்துவின் உதவியாளர் சுட்டுக் கொல்லப்பட்டபோது, அவர் பழிவாங்க அழைப்பு விடுத்திருந்தால் அன்று இரவே ஆயிரக்கணக்கான திரிணாமூல் காங்கிரஸ் தொண்டர்கள் கொல்லப்பட்டிருப்பார்கள். ஆனால் அவர் அமைதி காக்குமாறு தொண்டர்களைக் கேட்டுக்கொண்டார்” என ரிஜூ தத்தா தெரிவித்தார்.
மம்தா மற்றும் அபிஷேக் பானர்ஜி மீது விமர்சனம்
திரிணாமுல் காங்கிரஸ் கட்சியில் ஒழுங்கு நடவடிக்கை காரணமாக 6 ஆண்டுகள் இடைநீக்கம் செய்யப்பட்டுள்ள ரிஜு தத்தா, கட்சியின் தற்போதைய தோல்விக்கு மம்தா பானர்ஜி மற்றும் அபிஷேக் பானர்ஜி ஆகியோரே பொறுப்பேற்க வேண்டும் என்று கூறினார். வெளிநாட்டு ஆலோசனைக் குழுக்களின் (I-PAC) தலையீடு கட்சியைச் சீரழித்துவிட்டதாக அவர் குற்றஞ்சாட்டினார்.
மேலும், “இந்தியாவின் சிறந்த 10 அரசியல்வாதிகளில் ஒருவராக மம்தா பானர்ஜி இருக்கலாம், ஆனால் மேற்கு வங்க முதலமைச்சர் நாற்காலியில் அமர தகுதியான ஒரே நபர் சுவேந்து அதிகாரி மட்டுமே” என்று கூறி அதிர வைத்துள்ளார்.
திரிணாமுல் காங்கிரஸில் நிலவும் உட்கட்சி மோதல்
தேர்தல் தோல்விக்குப் பிறகு திரிணாமுல் காங்கிரஸில் பல தலைவர்கள் வெளிப்படையாக அதிருப்தி தெரிவித்து வருகின்றனர். ஏற்கனவே மனோஜ் திவாரி மற்றும் அதின் கோஷ் போன்ற தலைவர்கள் கட்சியின் தலைமை மற்றும் செயல்பாடுகள் குறித்து விமர்சனங்களை முன்வைத்துள்ளனர்.
கட்சியின் இந்த வீழ்ச்சிக்கு அபிஷேக் பானர்ஜியின் அரசியல் மேலாண்மை முறையே காரணம் என மூத்த தலைவர்கள் சிலர் கருதுகின்றனர். இருப்பினும், திரிணாமுல் காங்கிரஸ் தரப்பில் இத்தகைய கருத்துகள் தனிநபர்களின் சொந்தக் கருத்து என்றும், கட்சிக்கும் இதற்கும் சம்பந்தமில்லை என்றும் விளக்கம் அளிக்கப்பட்டுள்ளது.
தேர்தல் தோல்வியால் திரிணாமூல் காங்கிரசில் விரிசல்
மேற்கு வங்க அரசியலில் ஏற்பட்டுள்ள இந்த மாற்றம், திரிணாமுல் காங்கிரஸ் கட்சிக்குள் இருக்கும் விரிசலை வெளிச்சம் போட்டுக்காட்டுகிறது. சுவேந்து அதிகாரியின் புதிய அரசியல் பயணம் மற்றும் திரிணாமுல் காங்கிரஸின் உட்கட்சிப் பூசல்கள் அம்மாநில அரசியலில் வரும் காலங்களில் பெரும் மாற்றங்களை ஏற்படுத்தும் என எதிர்பார்க்கப்படுகிறது.