சென்னை,மே.23: கோவையில் 10 வயது சிறுமி கடத்தப்பட்டு படுகொலை செய்யப்பட்ட கொடூர சம்பவம் தமிழ்நாடு முழுவதும் பெரும் அதிர்வலைகளை ஏற்படுத்தியுள்ளது. இந்த மிருகத்தனமான செயலில் ஈடுபட்டவர்களுக்கு சட்டத்தின் முன் கடுமையான மற்றும் விரைவான தண்டனை பெற்றுத்தர வேண்டும் என்று சட்டப்பேரவை எதிர்க்கட்சித் தலைவர் உதயநிதி ஸ்டாலின் வலியுறுத்தியுள்ளார்.
கோவை சிறுமி கொலை: நெஞ்சை உலுக்கும் கொடூரம்
கோவையில் கடந்த சில தினங்களுக்கு முன்பு 10 வயது சிறுமி ஒருவர் மர்ம நபர்களால் கடத்தப்பட்டு, பின்னர் கொடூரமான முறையில் கொலை செய்யப்பட்டார். இந்த செய்தி வெளியானதில் இருந்து தமிழ்நாடு மக்கள் மற்றும் சமூக வலைத்தளங்களில், கொடுஞ்செயலில் ஈடுபட்டவர்களுக்கு கடுமையான தணடனை வழங்க வலியுறுத்தி “நீதி வேண்டும்” என்ற குரல்கள் வலுத்து வருகின்றன. இந்த கொடூர சம்பவத்தைக் கண்டித்து கோவை மக்கள் விடிய விடிய போராட்டத்தில் ஈடுபட்டு தங்களது எதிர்ப்பைப் பதிவு செய்து வருகின்றனர்.
“பாதிக்கப்பட்ட குடும்பத்திற்கு திமுக துணையாக நிற்கும்” – உதயநிதி
இந்த சம்பவம் குறித்து தனது எக்ஸ் சமூக ஊடகப் பக்கத்தில் ஆழ்ந்த வேதனையைத் தெரிவித்துள்ள எதிர்க்கட்சித் தலைவர் உதயநிதி ஸ்டாலின், “கோவையில் 10 வயது சிறுமி கடத்திக் கொலை செய்யப்பட்டுள்ள சம்பவம் பெரும் அதிர்ச்சியையும், வேதனையையும் ஏற்படுத்தி இருக்கிறது; இந்த கொலை சம்பவத்துக்கு உண்மையான நீதி வேண்டும் என்ற குரல், எல்லா பக்கமும் ஒலிக்கிறது. இந்த இக்கட்டான நேரத்தில், சிறுமியின் பெற்றோருக்கு எனது ஆறுதலைத் தெரிவிப்பதோடு, திமுக எப்போதும் அவர்களுக்கு துணையாக நிற்கும்” என உறுதியளிப்பதாகக் குறிப்பிட்டுள்ளார்.
தமிழ்நாட்டில் சட்டம் ஒழுங்கு கேள்விக்குறியா?
புதிய அரசு பொறுப்பேற்ற இந்த குறுகிய காலத்தில் மாநிலத்தின் சட்டம் ஒழுங்கு நிலைமை கவலைக்கிடமாக இருப்பதாக உதயநிதி ஸ்டாலின் சுட்டிக்காட்டியுள்ளார்.
அவர் தனது பதிவில், “புதிய அரசு பொறுப்பேற்றதிலிருந்து, கடந்த 12 நாட்களில் பாலியல் வன்கொடுமை, கஞ்சா கடத்தல், ரௌடிகள் தாக்குதல், ஆளுங்கட்சியினரின் அத்துமீறிய அராஜகம் மற்றும் தற்போது கோவையில் சிறுமி கடத்தி கொலை செய்யப்பட்டது உள்ளிட்ட 30-க்கும் மேற்பட்ட பெரிய குற்றச் சம்பவங்கள் செய்திகளாக வந்த வண்ணம் உள்ளன. இது ஒட்டுமொத்த மாநிலத்தின் சட்டம் ஒழுங்கையும் கேள்விக்குறியாக்கியுள்ளது” என்று குற்றஞ்சாட்டியுள்ளார்.
முதலமைச்சருக்கு விடுக்கப்பட்ட கோரிக்கை
இனிவரும் காலங்களில் இதுபோன்றதொரு கொடூரமான சம்பவம் தமிழ்நாட்டில் எங்கும் எப்போதும் நிகழாமல் இருப்பதை அரசு உறுதி செய்ய வேண்டும் என உதயநிதி கேட்டுக்கொண்டுள்ளார். மேலும், தமிழ்நாட்டு மக்களின் சார்பாக சட்டம் ஒழுங்கைப் பாதுகாப்பதற்கு முதலமைச்சர் தனது முதல் முக்கியத்துவத்தை (First Priority) வழங்க வேண்டும் என்றும் உதயநிதி ஸ்டாலின் தனது எக்ஸ் தள பதிவின் வாயிலாக வலியுறுத்தியுள்ளார்.
சிறுமிக்கு நேர்ந்த கொடூரம் சமூகப் பாதுகாப்புக்கு அச்சுறுத்தல்
கோவையில் சிறுமிக்கு நேர்ந்த இந்த கொடூரம் ஒட்டுமொத்த சமூகத்தின் பாதுகாப்பையே அச்சுறுத்துவதாக அமைந்துள்ளது. எதிர்க்கட்சித் தலைவர் உதயநிதி ஸ்டாலின் சுட்டிக்காட்டியுள்ளது போல, குற்றமிழைத்தவர்களுக்கு வழங்கப்படும் விரைவான மற்றும் கடுமையான தண்டனை மட்டுமே இதுபோன்ற குற்றங்களில் ஈடுபட நினைப்பவர்களுக்கு ஒரு பாடமாக அமையும்.
தமிழ்நாடு அரசு இந்த வழக்கில் தனி கவனம் செலுத்தி, கொடுஞ்செயலில் ஈடுபட்டவர்களை விரைந்து கூண்டில் ஏற்றி, பாதிக்கப்பட்ட குடும்பத்திற்கு உரிய நீதியைத் பெற்றுத் தர வேண்டும் என்பதே ஒட்டுமொத்த பொதுமக்களின் எதிர்பார்ப்பாகும்.