கொல்கத்தா,ஜூன்.02; மேற்கு வங்கத்தில் தேர்தல் முடிந்து புதிய அரசு பதவியேற்றுவிட்ட பின்னரும், அம்மாநில அரசியல் களத்தில் சூடு இன்னும் குறையவில்லை. திரிணாமுல் காங்கிரஸ் (TMC) கட்சியை உடைக்க பாரதிய ஜனதா காவல்துறையைப் பயன்படுத்துவதாக முன்னாள் முதலமைச்சர் மம்தா பானர்ஜி குற்றஞ்சாட்டியுள்ளார். கொல்கத்தாவில் இன்று (ஜூன் 02, செவ்வாய்) தர்ணா போராட்டம் நடத்த காவல்துறை அனுமதி மறுத்ததைத் தொடர்ந்து அவர் இந்த ஆவேசமான கருத்தை வெளியிட்டுள்ளார்.
காவல்துறை தடையும் மம்தாவின் சவாலும்
கொல்கத்தாவின் ராணி ராஷ்மோனி அவென்யூவில் இன்று (ஜூன் 02, செவ்வாய்) போராட்டம் நடத்த திரிணாமுல் காங்கிரசுக்கு காவல்துறை அனுமதி மறுத்தது. இது குறித்து முகநூலில் (Facebook) வீடியோ ஒன்றை வெளியிட்ட மம்தா பானர்ஜி, “காவல்துறையின் அனுமதி இல்லாமலோ, ஒலிபெருக்கி மற்றும் மேடை இல்லாமலோ திரிணாமுல் காங்கிரஸ் திட்டமிட்டபடி இன்றைய தினம் போராட்டம் நடத்தும். கொல்கத்தாவில் எங்களை அனுமதிக்காவிட்டால், நாங்கள் டெல்லியில் போராடுவோம்” என்று சவால் விடுத்தார். மேலும், “வேண்டுமானால் என்னைக் கைது செய்யுங்கள், நான் தயாராக இருக்கிறேன்” என்றும் அவர் கூறினார்.
கட்சியை உடைக்க முயற்சிப்பதாக குற்றச்சாட்டு
மத்திய அரசு மற்றும் பாஜக மீது அடுக்கடுக்கான குற்றச்சாட்டுகளை முன்வைத்த மம்தா பானர்ஜி, ஏற்கனவே 10,000-க்கும் மேற்பட்ட திரிணாமுல் காங்கிரஸ் தொண்டர்கள் கைது செய்யப்பட்டுள்ளதாக விமர்சித்தார். “மக்களாட்சி முறையில் எங்களை இங்கு போராட விடாவிட்டால், டெல்லிக்குச் சென்று போராடுவோம். அங்கு ‘இந்தியா’ (INDIA) கூட்டணிக் கூட்டமும் நடைபெற உள்ளது,” என்று கூறியிருந்தார்.
மேலும், திரிணாமுல் காங்கிரஸ் தலைவர்களை மிரட்டவும், கட்சியை உடைக்கவும் அமலாக்கத்துறை (ED) மற்றும் சிபிஐ (CBI) போன்ற மத்திய முகமைகள் பயன்படுத்தப்படுவதாகவும், தலைவர்களின் குழந்தைகளுக்குக் கூட அச்சுறுத்தல் விடுக்கப்படுவதாகவும் மம்தா பானர்ஜி குற்றஞ்சாட்டினார்.
தேர்தல் முறைகேடு புகார்கள்
மத்திய அரசு மேற்கு வங்கத்தை மட்டுமே குறிவைப்பதாகக் கூறிய மம்தா பானர்ஜி, மின்னணு வாக்குப்பதிவு இயந்திரங்கள் (EVM) ஹேக் செய்யப்பட்டதாகவும், சுமார் 177 தொகுதிகளில் முறைகேடுகள் நடந்ததாகவும் குற்றஞ்சாட்டினார். “நானே இதில் பாதிக்கப்பட்டவள். நான் 13,000 வாக்குகள் வித்தியாசத்தில் முன்னிலையில் இருந்தபோது, வாக்கு எண்ணும் மையத்திலிருந்து வலுக்கட்டாயமாக வெளியேற்றப்பட்டேன்” என்று தனது ஆதங்கத்தை வெளிப்படுத்தினார்.
தீவிரமடைகிறது திரிணாமூல் காங்கிரஸ்-பாஜக மோதல்
மேற்கு வங்கத்தில் நிலவும் இந்த அரசியல் பதற்றம், திரிணாமுல் காங்கிரஸ் மற்றும் பாஜக இடையேயான மோதலை மேலும் தீவிரப்படுத்தியுள்ளது. வரும் 7ஆம் தேதியன்று கோடை விடுமுறைக்குப் பிறகு கொல்கத்தா உயர் நீதிமன்றம் மீண்டும் செயல்படத் தொடங்கும்போது, இந்த அத்துமீறல்களுக்கு எதிராக சட்டப்பூர்வமாகப் போராட உள்ளதாக மம்தா பானர்ஜி தெரிவித்துள்ளார்.
தற்காலிகமாகச் சிலர் கட்சியை விட்டு விலகினாலும், திரிணாமுல் காங்கிரஸ் இந்த நெருக்கடியிலிருந்து இன்னும் வலிமையோடு மீண்டு வரும் என்று மம்தா பானர்ஜி நம்பிக்கை தெரிவித்துள்ளார்.