உலகக் கோப்பை கால்பந்து; பல்வேறு புற அழுத்தங்களுக்கு மத்தியில் நியூசிலாந்தை எதிர்கொள்ளும் ஈரான் அணி!

லாஸ் ஏஞ்சல்ஸ் ,ஜூன்.15; உலகக் கோப்பை (FIFA World Cup 2026) கால்பந்து தொடர் உலகெங்கும் உள்ள கால்பந்து ரசிகர்களை உற்சாகத்தில் ஆழ்த்தியுள்ள நிலையில், களத்திற்கு வெளியே நடக்கும் அரசியல் சர்ச்சைகள் விளையாட்டு உலகை உலுக்கி வருகின்றன.

இந்தச் சூழ்நிலையில், அமெரிக்காவில் நியூசிலாந்து அணிக்கு எதிரான தங்களது முதல் போட்டிக்கு முன்பாக, ஈரான் கால்பந்து அணியின் தலைமைப் பயிற்சியாளர் அமீர் காலேனோய் (Amir Ghalenoei) உலகக் கோப்பைக்கு ஆயத்தமாதல் மற்றும் அரசியல் அழுத்தங்கள் குறித்து மிக முக்கியமான கருத்துகளைப் பகிர்ந்துள்ளார்.

அரசியல் பதற்றங்கள், விசா சிக்கல்கள்: ஈரான் அணி சந்தித்த சவால்கள்

அமெரிக்கா, மெக்சிகோ மற்றும் கனடா ஆகிய நாடுகள் இணைந்து நடத்தி வரும் இந்த உலகக் கோப்பை தொடரில், ஈரான் அணி ஆரம்பம் முதலே பல நிர்வாக ரீதியான மற்றும் அரசியல் ரீதியான சவால்களை எதிர்கொண்டு வருகிறது. கடந்த சில மாதங்களாக அமெரிக்கா மற்றும் ஈரான் நாடுகளுக்கு இடையே நீடித்து வரும் ராணுவ மற்றும் தூதரக மோதல்கள் காரணமாக, ஈரான் அணியின் சில முக்கிய ஆதரவு ஊழியர்களுக்கு (Support Staff) விசா வழங்க அமெரிக்கா மறுப்பு தெரிவித்தது.

இதன் காரணமாக, ஈரான் அணி முதலில் திட்டமிட்டபடி அமெரிக்காவில் தங்களது பயிற்சி முகாமை அமைக்க முடியாமல் போனது. கடைசி நேரத்தில் அவர்கள் மெக்சிகோவின் டிஜுவானா (Tijuana) நகருக்குத் தங்களது பயிற்சி முகாமை மாற்ற வேண்டிய கட்டாயத்திற்குத் ஆளாக்கப்பட்டனர். இது அணியின் ஆயத்தப்பணிகளை பாதித்துள்ளதாக பயிற்சியாளர் ஒப்புக்கொண்டுள்ளார். “நாங்கள் உலகக் கோப்பைக்கு தாமதமாகவே வந்து சேர்ந்தோம். புதிய சூழலுக்குப் பழக எங்களுக்குப் போதிய நேரம் கிடைக்கவில்லை. எங்களது பயிற்சி முகாம் இரண்டு முறை மாற்றப்பட்டது. முதலில் அமெரிக்காவில் இருக்க வேண்டியது, பின்னர் மெக்சிகோவிற்கு மாற்றப்பட்டது. இது நிச்சயமாக எங்களைப் பாதித்துள்ளது,” என்று அமீர் காலேனோய் செய்தியாளர் சந்திப்பில் தெரிவித்தார்.

“நாங்கள் ஈரானிய மக்களின் பிரதிநிதிகள்” – அமீர் காலேனோய்

களத்திற்கு வெளியே என்ன சர்ச்சைகள் நடந்தாலும், தங்களது கவனம் முழுவதும் விளையாட்டின் மீது மட்டுமே இருப்பதாக ஈரான் பயிற்சியாளர் தெளிவுபடுத்தியுள்ளார். லாஸ் ஏஞ்சல்ஸ் நகரில் (ஜூன் 16, இந்திய நேரப்படி காலை 6.30 மணி) நியூசிலாந்துக்கு எதிரான ஆட்டத்திற்கு முன்னதாகப் பேசிய அவர்,”நாங்கள் இங்கு ஒரு நல்ல, தரமான போட்டியை விளையாட வந்துள்ளோம். எங்களைச் சுற்றி நடக்கும் எந்த ஒரு வதந்திகளுக்கும், விளம்பரங்களுக்கும் நாங்கள் முக்கியத்துவம் கொடுப்பதில்லை. பொதுவாக அனைத்து அணிகளுக்கும் சில பிரச்னைகள் இருக்கும். பல நாடுகளில் கால்பந்தோடு தொடர்பில்லாத பல விஷயங்கள் நடக்கின்றன. ஆனால், நாங்கள் அரசியல்வாதிகள் அல்ல… கால்பந்து என்பது அரசியலில் இருந்து தனித்து இருக்க வேண்டிய ஒன்று.

“மேலும், தங்களது அணியின் நோக்கம் உள்நாட்டிலும், வெளிநாடுகளிலும் வாழும் ஒட்டுமொத்த ஈரானிய மக்களைப் பெருமைப்படுத்துவது மட்டுமே என்றும் அவர் குறிப்பிட்டார். “நாங்கள் ஈரானுக்குள் இருக்கும் மக்களையும், உலகெங்கும் வாழும் ஈரானிய வம்சாவளியினரையும் மட்டுமே பிரதிநிதித்துவப்படுத்துகிறோம். கஷ்ட காலங்களை வாய்ப்புகளாக மாற்றுவதுதான் ஈரானியர்களின் குணம்,” என்றும் அவர் நம்பிக்கையுடன் கூறினார்.

அமைதி ஒப்பந்தமும் ரசிகர்களின் எதிர்ப்பும்

சுவாரஸ்யமான விஷயமாக, இந்தச் செய்தியாளர் சந்திப்பு நடப்பதற்குச் சரியாக ஒரு மணி நேரத்திற்கு முன்புதான், அமெரிக்கா மற்றும் ஈரான் நாடுகளுக்கு இடையே அனைத்துப் பிரிவுகளிலும் ராணுவ நடவடிக்கைகளை உடனடியாகவும் நிரந்தரமாகவும் முடிவுக்குக் கொண்டுவரும் ஒரு அமைதி ஒப்பந்தம் அறிவிக்கப்பட்டது.

இருப்பினும், லாஸ் ஏஞ்சல்ஸ் மைதானத்திற்கு வெளியே ஈரானின் தற்போதைய ஆட்சிக்கு எதிராக அந்நாட்டு வம்சாவளி மக்கள் போராட்டம் நடத்தத் திட்டமிட்டுள்ளனர். மைதானத்தில் அரசுக்கு எதிரான பேனர்கள் காட்டப்பட்டால், ஈரான் வீரர்கள் மைதானத்தை விட்டு வெளியேறக்கூடும் என்ற அச்சமும் நிலவுகிறது.

ஃபிஃபா-வின் அமைதிச் செய்தி பாதிக்கப்படுகிறதா? தாரேமி கேள்வி

ஈரான் அணியின் நட்சத்திர வீரரான மெஹ்தி தாரேமி (Mehdi Taremi), இந்த அரசியல் பதற்றங்கள் விளையாட்டின் அழகைக் கெடுப்பதாகக் கவலை தெரிவித்துள்ளார்.

அனைவருக்குமான பாதிப்பு: விசா மற்றும் எல்லைக் கட்டுப்பாட்டுப் பிரச்னைகளால் ஈரான் மட்டுமின்றி, சோமாலிய நடுவர் ஓமர் அர்தன் (Omar Artan) மற்றும் பல சர்வதேச ரசிகர்களும் அமெரிக்காவிற்குள் நுழைய அனுமதி மறுக்கப்பட்டுள்ளதை அவர் சுட்டிக்காட்டினார்.

அமைதிக்கான தூது: “உலகக் கோப்பையின் முதல் நாளில் இருந்தே இந்த அழுத்தத்தை என்னால் உணர முடிகிறது. பதற்றங்கள் இருக்கும்போது, கால்பந்து வழங்கும் முழுமையான மகிழ்ச்சியையும், அமைதிக்கான ஃபிஃபா-வின் செய்தியையும் நம்மால் அனுபவிக்க முடிவதில்லை,” என்று தாரேமி வருத்தத்துடன் பகிர்ந்துள்ளார்.

சவால்களைத் தாண்டி ஈரான் சாதனை படைக்குமா?

ஃபிஃபா உலகக் கோப்பை வரலாற்றில் ஈரான் அணி இதுவரை குரூப் சுற்றைத் தாண்டி அடுத்த சுற்றுக்கு (Knockout Rounds) முன்னேறியதே இல்லை. இந்த முறை அவர்கள் பெல்ஜியம், எகிப்து மற்றும் நியூசிலாந்து ஆகிய அணிகள் இடம்பெற்றுள்ள கடினமான ‘குரூப் ஜி’ (Group G) பிரிவில் உள்ளனர்.

களத்திற்கு வெளியேயான அரசியல் போர்கள், விசா குளறுபடிகள் மற்றும் பயிற்சி முகாம் மாற்றங்கள் போன்ற பலத்த சவால்களுக்கு மத்தியிலும், “எல்லாம் அந்த எல்லாம் வல்ல இறைவனின் கைகளில் உள்ளது” என்று ஈரான் அணி தங்களது முழுத் திறனையும் வெளிப்படுத்தக் களமிறங்குகிறது. அரசியல் தடைகளைத் தாண்டி, ஈரான் அணி இந்த உலகக் கோப்பையில் தனது முதல் வரலாற்றுச் சாதனையைப் படைக்குமா என்பதைப் பொறுத்திருந்து பார்ப்போம்!