இந்தியாவில் முதல்முறையாக 3 கோடி சப்ஸ்கிரைபர்கள் என்ற மாபெரும் சாதனையை எட்டிய குக்கிங் யூடியூப் சேனல் என்ற பெருமை வில்லேஜ் குக்கிங் சேனல் குழுவினருக்கு now!
2018ல் புதுக்கோட்டை மாவட்டம் அறந்தாங்கி அருகே உள்ள சின்ன வீரமங்கலம் கிராமத்தை சேர்ந்த ஆறு பேரான சுப்பிரமணியன், அய்யனார், பெரியதம்பி, முருகேசன், முத்துமாணிக்கம், தமிழ்ச்செல்வன் ஆகியோரின் முயற்சியால் இந்த சேனல் தொடங்கப்பட்டது.
அந்த காலத்தில் கிராமத்தில் இணைய வசதி குறைவு. மரம் மேலே ஏறி, உயரமான இடங்களில் நின்று வீடியோக்களைப் பதிவேற்ற வேண்டிய சூழல். முதல் 8 மாதங்களில் 55 வீடியோக்கள் போட்டும் பெரிய வரவேற்பு இல்லை.
ஆனால், அவர்கள் மனமுடங்கவில்லை. சிறிது நாட்கள் நிறுத்தி பிரச்சனை எது என்று ஆய்வு செய்து, மக்களின் விருப்பத்துக்கு ஏற்ப உள்ளடக்கத்தை மாற்றினர். வீடியோக்களின் தரத்தின் மீதும் கவனம் செலுத்தினர்.
கிராமிய உணவுகளை இயல்பாக காட்டும் ஈசல், நண்டு ரசம், நத்தை கறி போன்ற வீடியோக்கள் மக்கள் மனதை கவர தொடங்கின. குறிப்பாக கரையான் வீடியோ அவர்களின் அனைத்து தடைகளையும் உடைத்து வைரலானது. பெரியதம்பி சொன்ன “இன்னைக்கு ஒரு புடி” என்ற வசனம் பட்டி தொட்டி எங்கும் பிரபலமானது.
2021 சட்டப்பேரவைத் தேர்தல் நேரத்தில் ராகுல்காந்தி கூட இவர்களோடு கலந்து கொண்டார். அதற்கு சில நாட்களில் 1 கோடி சப்ஸ்கிரைபர்களை எட்டினர். ரசிகர்களின் கருத்துகளை ஏற்று திருத்தம் செய்ததற்காக மக்கள் இவர்களை மனதார பாராட்டினர்.
ஒரு வீடியோ upload ஆக 7 மணி நேரம் முதல் 24 மணி நேரம் காத்திருந்த குழு, ஏழு ஆண்டுகளில் இமாலய அளவுக்கு உயர்ந்த சாதனையை எட்டியுள்ளது.
இன்று YouTube உலக தரவரிசையில் சிறந்த உணவு சேனல்களில் 4வது இடம் வில்லேஜ் குக்கிங் சேனலுக்கே. முன்னிலை 3 சேனல்கள் உணவு விமர்சனங்களையும் சேர்த்து பதிவிடுகின்றன. முழுக்க முழுக்க உணவு சமைக்கும் வீடியோக்களை மட்டும் பதிவிடும் சேனல் வில்லேஜ் குக்கிங் சேனல்தான்.
இன்று உலக நாடுகள் முழுவதும் பயணம் செய்து, அமெரிக்காவில் உள்ளவர்களிடமும் வாழ்த்துகள் வாங்கும் அளவுக்கு உயர்ந்துள்ளனர். தன்னம்பிக்கையுடன் உழைத்தால் சாதனை நிச்சயம் என்பதற்கான உயிரோட்டமான உதாரணம் இவர்களே.