கலிபோர்னியா, டிச.13; அமெரிக்க அதிபர் டொனால்ட் டிரம்ப் புதிதாக H-1B விசாக்களுக்கு $1,00,000 (சுமார் 85 லட்சம் ரூபாய்) கட்டணம் விதித்ததை எதிர்த்து, கலிபோர்னியா உள்ளிட்ட 20 அமெரிக்க மாகாணங்கள் நீதிமன்றத்தில் வழக்கு தொடர்ந்துள்ளன.
H-1B விசா கட்டண வழக்கின் பின்னணி
கடந்த செப்டம்பர் மாதம், அதிபர் டிரம்ப் புதிய உத்தரவு ஒன்றை பிறப்பித்தார். அதன்படி, புதிதாக H-1B விசா விண்ணப்பிக்கும் நிறுவனங்கள் ஒரு ஊழியருக்கு $1,00,000 கட்டணம் செலுத்த வேண்டும் என்று அறிவிக்கப்பட்டது. அமெரிக்கர்களின் வேலைவாய்ப்பைப் பாதுகாக்கவும், விசா முறைகேடுகளைத் தடுக்கவும் இந்த நடவடிக்கை எடுக்கப்பட்டதாகக் கூறப்பட்டது.
வழக்கமாக H-1B விசாக்களுக்கான கட்டணம் $2,000 முதல் $5,000 வரை மட்டுமே இருக்கும் நிலையில், இந்தத் திடீர் உயர்வு பல மடங்கு அதிகமாகும். இதனை எதிரத்து கலிபோர்னியா அட்டர்னி ஜெனரல் ராப் போண்டா (Rob Bonta) தலைமையில் 19 இதர மாகாணங்கள் இணைந்து பாஸ்டன் ஃபெடரல் நீதிமன்றத்தில் வெள்ளிக்கிழமை (டிசம்பர் 12,2025) வழக்கு தொடர்ந்துள்ளன.
H-1B விசா கட்டண உயர்வு எதிர்ப்பிற்கான காரணங்கள்
இந்தக் கட்டண உயர்வு சட்டவிரோதமானது என்றும், இது அமெரிக்கப் பொருளாதாரத்திற்குப் பெரும் பாதிப்பை ஏற்படுத்தும் என்றும் மாகாணங்கள் குற்றஞ்சாட்டியுள்ளன.
அதிகார வரம்பு மீறல்: விசா கட்டணங்களை நிர்ணயிக்கும் அதிகாரம் நாடாளுமன்றத்திற்கு (Congress) மட்டுமே உள்ளது என்றும், அதிபருக்குத் தன்னிச்சையாக இவ்வளவு பெரிய தொகையை நிர்ணயிக்க அதிகாரம் இல்லை என்றும் வாதிடப்படுகிறது.
நிதிச்சுமை: கல்வி நிலையங்கள், மருத்துவமனைகள் மற்றும் அரசு சார்ந்த நிறுவனங்கள் வெளிநாட்டு நிபுணர்களைப் பணியில் அமர்த்த இந்தக் கட்டணம் பெரும் தடையாக இருக்கும். இதனால் அத்தியாவசிய சேவைகள் பாதிக்கப்படும் அபாயம் உள்ளது.
H-1B விசா கட்டண உயர்வு; தொழில்துறையில் தாக்கம்
H-1B விசா என்பது தொழில்நுட்பம், மருத்துவம் மற்றும் பொறியியல் போன்ற துறைகளில் நிபுணத்துவம் வாய்ந்த வெளிநாட்டு ஊழியர்களைப் பணியில் அமர்த்த அமெரிக்க நிறுவனங்களுக்கு உதவும் ஒரு முக்கியமான விசா முறையாகும்.
தொழில்நுட்பத் துறை: கூகுள், ஆப்பிள் போன்ற சிலிக்கான் வேலி நிறுவனங்கள் இந்த விசா முறையை அதிகம் நம்பியுள்ளன. புதிய கட்டண உயர்வு இத்துறையை வெகுவாகப் பாதிக்கும்.
மருத்துவம் மற்றும் கல்வி: அமெரிக்காவில் ஏற்கனவே மருத்துவர்கள் மற்றும் செவிலியர் பற்றாக்குறை நிலவுகிறது. இந்தக் கட்டண உயர்வால் வெளிநாட்டு மருத்துவர்களைப் பணிக்கு எடுப்பது கடினமாகும் என்பதால், சுகாதாரத் துறை கடுமையாகப் பாதிக்கப்படும் என்று அஞ்சப்படுகிறது.
நிர்வாகத்தின் பதில் மற்றும் பிற வழக்குகள்
வெள்ளை மாளிகை இந்த நடவடிக்கையை நியாயப்படுத்தியுள்ளது. விசா முறையைத் தவறாகப் பயன்படுத்துவதைத் தடுக்கவும், அமெரிக்கர்களுக்கு முன்னுரிமை அளிக்கவும் இது அவசியம் என்று நிர்வாகம் தரப்பில் கூறப்படுகிறது.
ஏற்கனவே, அமெரிக்க வர்த்தக சபை (U.S. Chamber of Commerce) மற்றும் பல்வேறு வணிக அமைப்புகள் இந்தக் கட்டண உயர்வை எதிர்த்துத் தனித்தனியாக வழக்கு தொடர்ந்துள்ளன என்பது குறிப்பிடத்தக்கது.
H1BVisa, எச்1பி விசா, TrumpVisaFee, டிரம்ப் விசா கட்டணம், ImmigrationLawsuit, சட்டரீதியாக வழக்கு, CaliforniavsTrump, கலிபோர்னியா வழக்கு