டெல்லி, டிச.16; டெல்லி-ஆக்ரா யமுனா விரைவுச்சாலையில், இன்று அதிகாலை பேருந்துகள் மற்றும் கார்கள் ஒன்றுடன் ஒன்று மோதி தீப்பிடித்து எரிந்ததில், நான்கு பேர் பரிதாபமாக உயிரிழந்தனர். 25 பேர் படுகாயமடைந்தனர்.
பனிமூட்டம் காரணமாக விபத்து நேரிட்டது
உத்தரப் பிரதேச மாநிலம் மதுரா (Mathura) மாவட்டத்தில் உள்ள பால்தியோ அருகே இந்த விபத்து நிகழ்ந்துள்ளது. அதிகாலை சுமார் 4:30 மணியளவில், கடும் பனிமூட்டம் காரணமாக எதிரே வரும் வாகனங்களை காண முடியாத அளவு இருந்தது. இதனால், சாலையில் சென்றுகொண்டிருந்த மூன்று கார்கள் முதலில் ஒன்றுடன் ஒன்று மோதின. இதனைத் தொடர்ந்து பின்னால் வந்த 7 பேருந்துகள் அடுத்தடுத்து அந்த கார்கள் மீது மோதி பயங்கர விபத்து ஏற்பட்டது.
மோதிய வாகனங்கள் தீப்பிடித்து எரிந்தன
மோதிய வேகத்தில் பேருந்துகள் திடீரென தீப்பிடித்து எரியத் தொடங்கின. இந்த தீ விபத்தில் சிக்கி 4 பயணிகள் உடல் கருகி உயிரிழந்தனர். விபத்தில் சிக்கிய வாகனங்களில் இருந்த சுமார் 25 பயணிகள் காயமடைந்தனர்.
காயமடைந்தவர்கள் உடனடியாக அருகிலுள்ள மருத்துவமனைகளுக்கு முதலுதவிக்காக கொண்டு செல்லப்பட்டனர். நல்வாய்ப்பாக, காயமடைந்தவர்களில் யாருடைய நிலைமையும் கவலைக்கிடமாக இல்லை என்று போலீசார் தெரிவித்துள்ளனர்.
மீட்பு பணிகள் துரிதமாக மேற்கொள்ளப்பட்டு அணைக்கப்பட்ட தீ
விபத்து குறித்த தகவல் அறிந்ததும், உள்ளூர் நிர்வாகம் மற்றும் அவசரகால மீட்புக் குழுவினர் சம்பவ இடத்திற்கு விரைந்தனர். சுமார் 11 தீயணைப்பு வாகனங்கள் வரவழைக்கப்பட்டு தீயை அணைக்கும் பணிகள் மேற்கொள்ளப்பட்டன சிறிது நேரத்தில் தீ கட்டுக்குள் கொண்டுவரப்பட்டது.
பனிமூட்டம் காரணமாக தொடர் விபத்துகள்
டெல்லி மற்றும் அதனைச் சுற்றியுள்ள என்.சி.ஆர். பகுதிகளில் கடந்த சில நாட்களாக கடும் பனிமூட்டம் நிலவி வருகிறது. இதன் காரணமாக, பல விரைவுச்சாலைகளில் தொடர் விபத்துகள் அரங்கேறி வருகின்றன. ஹரியானா மற்றும் டெல்லி-மும்பை விரைவுச்சாலைகளிலும் இதே போன்ற விபத்துகள் சமீபத்தில் பதிவாகியுள்ளன என்பது குறிப்பிடத்தக்கது.