அடிலெய்டு, டிச.17; ஆஷஸ் தொடரின் மூன்றாவது டெஸ்ட் போட்டியில், ஆஸ்திரேலிய வீரர் அலெக்ஸ் கேரி தனது சதத்தைப் பூர்த்தி செய்தபோது, மைதானத்தில் இருந்த அவரது மனைவி எலோயிஸ் ஆனந்தக் கண்ணீரில் மூழ்கினார். இந்த உணர்ச்சிகரமான தருணம் தற்போது சமூக வலைதளங்களில் வைரலாகி வருகிறது.
தந்தையின் நினைவாக ஒரு வரலாற்று சதம்!
அடிலெய்டு ஓவல் மைதானத்தில் நடைபெற்று வரும் இங்கிலாந்துக்கு எதிரான மூன்றாவது ஆஷஸ் டெஸ்ட் போட்டியில், அலெக்ஸ் கேரி அபாரமாக விளையாடி 106 ரன்களைக் குவித்தார். இது டெஸ்ட் கிரிக்கெட்டில் அவரது மூன்றாவது சதமாகும், ஆனால் ஆஷஸ் தொடரில் அவர் அடிக்கும் முதல் சதம் இது என்பது குறிப்பிடத்தக்கது.
சதத்தைப் பூர்த்தி செய்தவுடன், கேரி தனது பேட்டை உயர்த்தி வானத்தைப் பார்த்து கையசைத்தார். கடந்த செப்டம்பர் மாதம் லுகேமியா (Leukemia) புற்றுநோயால் காலமான தனது தந்தை கார்டன் கேரிக்கு இந்த வரலாற்றுச் சாதனையை அவர் அர்ப்பணித்தார்.
நெகிழ்ச்சியில் ஆழ்த்திய குடும்பத்தின் ஆதரவு
அலெக்ஸ் கேரி மைதானத்தில் கொண்டாட்டத்தில் ஈடுபட்டிருந்தபோது, பார்வையாளர் பகுதியில் அமர்ந்திருந்த அவரது மனைவி எலோயிஸ் உணர்ச்சிவசப்பட்டு அழுத காட்சி அனைவரையும் நெகிழச் செய்தது. தனது தந்தையின் மறைவுக்குப் பிறகு கேரி விளையாடும் முதல் பெரிய இன்னிங்ஸ் இது என்பதால், குடும்பத்தினர் அனைவருக்கும் இது ஒரு முக்கியமான தருணமாக அமைந்தது.
இது குறித்துப் பேசிய கேரி, “எனது கிரிக்கெட் வாழ்க்கையில் தந்தை மிகப்பெரிய பங்கு வகித்தார். அவர் ஒரு பயிற்சியாளராகவும் வழிகாட்டியாகவும் இருந்தார். இந்த தருணத்தில் அவர் என்னுடன் இல்லையென்றாலும், அவரது ஆசீர்வாதம் என்னுடன் இருப்பதை உணர்கிறேன்” என்று உருக்கமாகத் தெரிவித்தார்.
3ஆவது டெஸ்ட்டில் வலுவான நிலையில் ஆஸ்திரேலிய அணி
கேரியின் இந்த சிறப்பான ஆட்டம் மற்றும் உஸ்மான் கவாஜாவின் (82 ரன்கள்) நிதானமான பேட்டிங் உதவியுடன் ஆஸ்திரேலியா முதல் நாள் ஆட்ட நேர முடிவில் 8 விக்கெட் இழப்பிற்கு 326 ரன்கள் எடுத்துள்ளது. 5 போட்டிகள் கொண்ட இந்தத் தொடரில் ஏற்கனவே 2-0 என முன்னிலை வகிக்கும் ஆஸ்திரேலியா, இந்த போட்டியிலும் வெற்றி பெற்று தொடரைக் கைப்பற்றும் முனைப்பில் உள்ளது.