சென்னையின் பொதுப்போக்குவரத்தில் மிக முக்கியமான அங்கமாக விளங்கும் பறக்கும் இரயில் (MRTS) திட்டத்தை, சென்னை மெட்ரோ ரயில் நிறுவனத்திடம் ஒப்படைப்பதற்கான புரிந்துணர்வு ஒப்பந்தம் (MoU) விரைவில் கையெழுத்தாக உள்ளது. இதன் மூலம் சென்னையின் போக்குவரத்து உள்கட்டமைப்பில் ஒரு புதிய மாற்றம் ஏற்படப் போகிறது.
பறக்கும் ரயில் சேவையை மெட்ரோ நிர்வாகத்திடம் ஒப்படைப்பது ஏன்?
தற்போது சென்னை கடற்கரை முதல் வேளச்சேரி வரையிலான பறக்கும் ரயில் சேவை தெற்கு ரயில்வேயால் நிர்வகிக்கப்பட்டு வருகிறது. இருப்பினும், மெட்ரோ ரயில்களுடன் ஒப்பிடும்போது, பறக்கும் ரயில் நிலையங்களில் பராமரிப்பு குறைபாடு, பாதுகாப்பு குறித்த அச்சம் மற்றும் போதிய வசதிகள் இல்லாமை போன்ற புகார்கள் நீண்டகாலமாக இருந்து வருகின்றன.
இரண்டு வெவ்வேறு அமைப்புகள் (மெட்ரோ மற்றும் பறக்கும் ரயில்) வெவ்வேறு தரத்துடன் செயல்படுவதால், பயணிகளுக்கு ஒரு ஒருங்கிணைந்த பயண அனுபவம் கிடைப்பதில்லை. இதனைச் சரிசெய்யவே, பறக்கும் ரயில் சேவையை மெட்ரோவுடன் இணைக்கத் தமிழ்நாடு அரசு முடிவு செய்தது.
புரிந்துணர்வு ஒப்பந்தத்தின் முக்கிய அம்சங்கள்
ரயில்வே அமைச்சகமும், தமிழக அரசும் இணைந்து மேற்கொள்ளவுள்ள இந்தப் புரிந்துணர்வு ஒப்பந்தத்தில் பின்வரும் மாற்றங்கள் எதிர்பார்க்கப்படுகின்றன:
பறக்கும் இரயில் நிலையங்களின் பராமரிப்பு, பாதுகாப்பு மற்றும் டிக்கெட் வழங்கும் முறைகள் மெட்ரோ நிர்வாகத்தின் கீழ் வரும். நிலையங்களைத் தூய்மைப்படுத்துதல், மின்விளக்கு வசதிகள் மற்றும் லிப்ட்/எஸ்கலேட்டர் வசதிகளை மேம்படுத்துதல். மெட்ரோ நிலையங்களைப் போலவே, பறக்கும் ரயில் நிலையங்களிலும் கடைகள் மற்றும் வணிக வளாகங்களை உருவாக்கி வருவாயைப் பெருக்குதல்.
பயணிகளுக்குக் கிடைக்கப்போகும் நன்மைகள்
இந்த நிர்வாக மாற்றத்தால் பொதுமக்கள் பல்வேறு நன்மைகளைப் பெறுவார்கள்.ஒற்றை டிக்கெட் முறை: மெட்ரோ மற்றும் பறக்கும் ரயில் இரண்டிற்கும் ஒரே டிக்கெட் அல்லது ஸ்மார்ட் கார்டைப் பயன்படுத்தும் வசதி நடைமுறைக்கு வரும். மேம்படுத்தப்பட்ட பாதுகாப்பு: நிலையங்களில் சிசிடிவி கேமராக்கள் மற்றும் கூடுதல் பாதுகாப்புப் பணியாளர்கள் நியமிக்கப்படுவார்கள்.
பயணிகளின் வசதிகள் மேம்படும் எனத்தகவல்
இணைப்பு வசதி: வேளச்சேரி முதல் புனித தோமையார் மலை (St.Thomas Mount) வரையிலான இணைப்புப் பணிகள் முடிவடையும் நிலையில், மெட்ரோவின் இரண்டாம் கட்டப் பணிகளுடன் இது முழுமையாக ஒருங்கிணைக்கப்படும்.
தெற்கு ரயில்வேயிடமிருந்து சொத்துகளைப் பிரிப்பது மற்றும் ஊழியர்களின் பணிநிலை குறித்த பேச்சுவார்த்தைகள் முடிந்துவிட்டன. இன்னும் சில வாரங்களில் அதிகாரப்பூர்வமாக ஒப்பந்தம் கையெழுத்தானதும், முதற்கட்டமாக நிலையங்களைப் புதுப்பிக்கும் பணிகள் தொடங்கும் என எதிர்பார்க்கப்படுகிறது.