ஆஸ்திரேலிய முன்னாள் கிரிக்கெட் வீரர் டேமியன் மார்ட்டின் மருத்துவமனையில் அனுமதி: மூளைக்காய்ச்சல் நோயுடன் போராட்டம்!

குயின்ஸ்லாந்து,டிச.31; ஆஸ்திரேலிய கிரிக்கெட் உலகின் மிகச்சிறந்த பேட்ஸ்மேன்களில் ஒருவரான டேமியன் மார்ட்டின் (Damien Martyn), மூளைக்காய்ச்சல் (Meningitis) பாதிப்பு காரணமாக குயின்ஸ்லாந்தில் உள்ள மருத்துவமனையில் அனுமதிக்கப்பட்டுள்ளார். தற்போது அவர் தீவிர சிகிச்சை பிரிவில் (Induced Coma) அனுமதிக்கப்பட்டுள்ள செய்தி ரசிகர்களிடையே பெரும் கவலையை ஏற்படுத்தியுள்ளது.

டேமியன் மார்ட்டினுக்கு திடீர் உடல்நலக்குறைவு

கடந்த 26ஆம் தேதியன்று, மார்ட்டின் திடீரென உடல்நலக்குறைவால் பாதிக்கப்பட்டார். ஆரம்பத்தில் ஓய்வெடுக்கச் சென்ற அவர், நிலைமை மோசமடைந்ததைத் தொடர்ந்து உடனடியாக குயின்ஸ்லாந்து மருத்துவமனையில் அனுமதிக்கப்பட்டார். மருத்துவர்களின் தீவிர கண்காணிப்பில் உள்ள அவர், தற்போது செயற்கையாக தூண்டப்பட்ட கோமா நிலையில் (Induced Coma) சிகிச்சை பெற்று வருகிறார்.

கிரிக்கெட் உலகம் பிரார்த்தனை

இந்த செய்தியை டேமியன் மார்டினின் நெருங்கிய நண்பரும் சக வீரருமான ஆடம் கில்கிறிஸ்ட் உறுதிப்படுத்தினார். மார்ட்டினின் குடும்பத்தினர் சார்பாக பேசிய அவர், “அவருக்கு மிகச்சிறந்த சிகிச்சை வழங்கப்பட்டு வருகிறது. உலகின் பல்வேறு இடங்களிலிருந்தும் வரும் அன்பும் பிரார்த்தனைகளும் மார்ட்டினின் குடும்பத்தினருக்கு பெரும் பலமாக இருக்கிறது” என்று தெரிவித்துள்ளார்.

இந்திய நட்சத்திரங்களான விவிஎஸ் லட்சுமணன், ரவிச்சந்திரன் அஷ்வின் மற்றும் ஆஸ்திரேலியாவின் டேரன் லீமன் போன்ற பல வீரர்கள் மார்ட்டின் விரைவில் குணமடைய தங்கள் சமூக வலைதளங்களில் பதிவிட்டுள்ளனர்.

மூளைக்காய்ச்சல் (Meningitis) என்றால் என்ன?

மெனிஞ்சைடிஸ் என்பது மூளை மற்றும் தண்டுவடத்தைப் பாதுகாக்கும் சவ்வுகளில் ஏற்படும் வீக்கம் அல்லது தொற்று ஆகும். இது மிகவும் ஆபத்தானது என்பதால், மருத்துவர்கள் டேமியன் மார்ட்டினைத் தீவிரமாக கண்காணித்து வருகின்றனர். மார்ட்டின் மீண்டும் பழைய நிலைக்குத் திரும்புவார் என மருத்துவர்கள் நம்பிக்கை தெரிவித்துள்ளனர்.

மார்ட்டினின் மகத்தான கிரிக்கெட் பயணம்

டெஸ்ட் போட்டிகள்: 67 போட்டிகளில் விளையாடி 4,406 ரன்கள் (சராசரி 46.37, 13 சதங்கள்).

ஒருநாள் போட்டிகள்: 208 போட்டிகளில் 5,346 ரன்கள்.

2003 உலகக்கோப்பை: இந்தியா உடனான இறுதிப்போட்டியில் ஆட்டமிழக்காமல் 88 ரன்கள் குவித்து ஆஸ்திரேலியாவின் வெற்றிக்கு முக்கியக் காரணமாக இருந்தார்.

சிறப்பு: தனது நேர்த்தியான ஷாட்களுக்குப் பெயர் பெற்ற மார்ட்டின், 2004-05ல் ‘ஆஸ்திரேலியாவின் சிறந்த டெஸ்ட் வீரர்’ விருதையும் வென்றவர்.

ஆஸ்திரேலியாவின் பொற்கால கிரிக்கெட் அணியில் ஒரு தூணாக விளங்கிய டேமியன் மார்ட்டின், தனது கிரிக்கெட் வாழ்க்கையில் பல கடினமான பந்துவீச்சாளர்களை எதிர்கொண்டுள்ளார். அதே உறுதியுடன் இந்த உடல்நலப் போராட்டத்திலும் அவர் வெற்றி பெற்று மீண்டும் நலமுடன் திரும்புவார் என்று உலகம் முழுவதும் உள்ள கிரிக்கெட் ரசிகர்கள் வேண்டி வருகின்றனர்.