‘வெனிசுலா அதிபரும், அவரது மனைவியும் நாடு கடத்தப்பட்டனர்’ – டிரம்ப் அதிரடி அறிவிப்பு!

வாஷிங்டன்,ஜன.03; வெனிசுலா அதிபர் நிக்கோலஸ் மதுரோ மற்றும் அவரது மனைவியை வெற்றிகரமாகக் கைது செய்து அந்நாட்டை விட்டு வெளியேற்றியதாக அமெரிக்க அதிபர் டொனால்ட் டிரம்ப் அதிரடி அறிவிப்பை வெளியிட்டுள்ளார். இந்தச் சம்பவம் உலக அரசியலில் பெரும் பரபரப்பை ஏற்படுத்தியுள்ளது.

அமெரிக்காவின் அதிரடி நடவடிக்கை

சமீபகாலமாக வெனிசுலா அதிபர் நிக்கோலஸ் மதுரோ மீது அமெரிக்கா பல்வேறு குற்றச்சாட்டுகளை முன்வைத்து வந்தது. குறிப்பாக, அமெரிக்காவிற்குள் போதைப்பொருள் கடத்தப்படுவதற்கு மதுரோ உடந்தையாக இருப்பதாக அதிபர் டிரம்ப் பகிரங்கமாகக் குற்றஞ்சாட்டியிருந்தார்.

இதனைத் தொடர்ந்து, வெனிசுலா கடற்பகுதியில் அமெரிக்கக் கடற்படை தீவிர ரோந்துப் பணியில் ஈடுபட்டு வந்தது. பலமுறை போதைப்பொருள் கடத்தல் கப்பல்களை அமெரிக்கா சுட்டு வீழ்த்தியதால் இரு நாடுகளுக்கும் இடையே போர் பதற்றம் நிலவி வந்தது.

மதுரோ கைது மற்றும் நாடு கடத்தல்

இந்தச் சூழலில், இன்று (03.01.2026) அதிகாலை வெனிசுலா தலைநகர் கராகஸ் (Caracas) பகுதியில் அமெரிக்கப் படைகள் மிகப்பெரிய தாக்குதலை நடத்தின. இது குறித்து டிரம்ப் தனது சமூக வலைதளப் பக்கத்தில் வெளியிட்டுள்ள செய்தியில்:

“வெனிசுலா மற்றும் அதன் தலைவர் நிக்கோலஸ் மதுரோவுக்கு எதிராக அமெரிக்கா மிகப்பெரிய வெற்றிகரமான தாக்குதலை நடத்தியுள்ளது. மதுரோவும் அவரது மனைவியும் கைது செய்யப்பட்டு, வெனிசுலாவிலிருந்து நாடு கடத்தப்பட்டுள்ளனர்,” எனத் தெரிவித்துள்ளார்.

இந்த நடவடிக்கை அமெரிக்க சட்ட அமலாக்கத் துறையுடன் இணைந்து செயல்படுத்தப்பட்டதாக அவர் குறிப்பிட்டுள்ளார்.

வெனிசுலா தரப்பு பதிலடி

இந்தத் தாக்குதலுக்கு வெனிசுலா அரசு கடும் கண்டனம் தெரிவித்துள்ளது. இது ஒரு “கொடூரமான ராணுவ ஆக்கிரமிப்பு” என்றும், ஐக்கிய நாடுகள் சபையின் விதிகளை மீறிய செயல் என்றும் மதுரோவின் ஆதரவாளர்கள் குற்றஞ்சாட்டியுள்ளனர். மேலும், அமெரிக்காவின் இந்த நடவடிக்கையை எதிர்த்துப் போராடுமாறு அந்நாட்டு மக்களுக்கு அழைப்பு விடுக்கப்பட்டுள்ளது.

அமெரிக்காவின் நடவடிக்கையால் லத்தீன் அமெரிக்காவில் மாற்றம்?

டிரம்பின் இந்த அதிரடி அறிவிப்பு லத்தீன் அமெரிக்க நாடுகளில் பெரும் மாற்றத்தை ஏற்படுத்தும் என எதிர்பார்க்கப்படுகிறது. மதுரோ எங்கு கொண்டு செல்லப்பட்டார் என்பது குறித்த அதிகாரப்பூர்வத் தகவல்கள் இன்னும் வெளியாகவில்லை. மார்-ஏ-லாகோவில் (Mar-a-Lago) டிரம்ப் நடத்தவுள்ள செய்தியாளர் சந்திப்பில் இது குறித்த முழு விவரங்கள் தெரியவரும்.