ரயில்வே வேலைக்கு நிலம் லஞ்சமாகப் பெற்ற வழக்கு: லல்லு பிரசாத் மீது குற்றச்சாட்டுகளைப் பதிவு செய்தது டெல்லி நீதிமன்றம்

டெல்லி,ஜன.09; பீகார் முன்னாள் முதலமைச்சரும், ராஷ்ட்ரிய ஜனதா தள தலைவருமான லல்லு பிரசாத் மற்றும் அவரது குடும்பத்தினர் மீது தொடரப்பட்ட “வேலைக்கு நிலம்” (Land-for-jobs scam) மோசடி வழக்கில் டெல்லி நீதிமன்றம் இன்று (09.01/2026) முக்கிய உத்தரவை பிறப்பித்துள்ளது.

நில மோசடி வழக்கின் பின்னணி?

2004 முதல் 2009 வரையிலான காலக்கட்டத்தில் லல்லு பிரசாத் ரயில்வே அமைச்சராக இருந்தபோது, இந்திய ரயில்வேயின் ‘குரூப்-டி’ (Group-D) பணியிடங்களில் ஆட்களை நியமனம் செய்ய, அவர்களிடமிருந்து மிகக் குறைந்த விலைக்கு நிலங்களைப் பெற்றதாகக் குற்றம் சாட்டப்பட்டது. இந்த முறைகேடு தொடர்பாக மத்திய புலனாய்வு அமைப்பு (CBI) விசாரணை நடத்தி வந்தது.

நீதிமன்றத்தின் அதிரடி கருத்துகள்

இந்த வழக்கை விசாரித்த டெல்லி ரூஸ் அவென்யூ நீதிமன்றத்தின் சிறப்பு நீதிபதி விஷால் கோக்னே, லல்லு பிரசாத் மற்றும் அவரது குடும்பத்தினர் ஒரு “குற்றவியல் சிண்டிகேட்” (Criminal Syndicate) போல செயல்பட்டதாகக் குறிப்பிட்டுள்ளார்.

நீதிமன்றம் தனது உத்தரவில் பின்வருவனவற்றைச் சுட்டிக்காட்டியது:

அதிகார துஷ்பிரயோகம்: பொதுத்துறை வேலைவாய்ப்புகளைத் தனது குடும்பத்திற்காக நிலங்களைச் சொத்துகளாக மாற்றுவதற்கான கருவியாக லல்லு பிரசாத் பயன்படுத்தியுள்ளார்.

தனிப்பட்ட ஆதிக்கம்: ரயில்வே அமைச்சகத்தைத் தனது “சொந்த உடைமை” (Personal Fiefdom) போல லல்லு கையாண்டதாக நீதிபதி விமர்சித்தார்.

சதித்திட்டம்: இந்த மோசடியில் லல்லு பிரசாத் மட்டுமின்றி அவரது மனைவி ராப்ரி தேவி, மகன்கள் தேஜஸ்வி, தேஜ் பிரதாப் மற்றும் மகள் மிசா பாரதி ஆகியோருக்கும் தொடர்பு இருப்பதாகக் கூறி குற்றச்சாட்டுகள் பதிவு செய்யப்பட்டுள்ளன.

விடுவிக்கப்பட்டவர்கள் மற்றும் விசாரணை நிலை

இந்த வழக்கில் சிபிஐ தாக்கல் செய்த குற்றப்பத்திரிகையில் மொத்தம் 103 பேர் சேர்க்கப்பட்டிருந்தனர். அவர்களில் 5 பேர் ஏற்கனவே இறந்துவிட்டனர். மீதமுள்ளவர்களில் 52 பேரை நீதிமன்றம் இன்று விடுவித்துள்ளது. இதில் போதிய ஆதாரம் இல்லாத ரயில்வே அதிகாரிகள் மற்றும் வேலைக்காக நிலம் தராத நபர்கள் அடங்குவர்.

இருப்பினும், லல்லு பிரசாத் உட்பட முக்கியக் குற்றவாளிகள் 41 பேர் மீது ஊழல் தடுப்புச் சட்டம் மற்றும் இந்தியத் தண்டனைச் சட்டத்தின் கீழ் (சதித்திட்டம் மற்றும் ஏமாற்றுதல்) வழக்குத் தொடர நீதிமன்றம் அனுமதி அளித்துள்ளது.

அரசியல் உள்நோக்கம் கொண்டது – லாலு தரப்பு குற்றச்சாட்டு

லல்லு பிரசாத் தரப்பில் இந்த வழக்கு அரசியல் உள்நோக்கம் கொண்டது என்று வாதிடப்பட்டாலும், நீதிமன்றம் குற்றச்சாட்டுகளைப் பதிவு செய்திருப்பது அவருக்குப் பெரும் பின்னடைவாகக் கருதப்படுகிறது. இந்த வழக்கின் அடுத்தகட்ட விசாரணை வரும் 23ஆம் தேதி நடைபெறவுள்ளது. அப்போது குற்றம் சாட்டப்பட்டவர்கள் அதிகாரப்பூர்வமாகத் தங்கள் மீதான குற்றச்சாட்டுகளை ஒப்புக்கொள்கிறார்களா அல்லது மறுக்கிறார்களா என்பது தெரியவரும்.