பாட்னா,ஜன.14; பீகார் அரசியலில் தற்போதைய பேசுபொருளாக மாறியிருப்பது ராஷ்ட்ரிய ஜனதா தள தலைவர் லாலு பிரசாத்தின் மூத்த மகன் தேஜ் பிரதாப், பாஜக தலைவரும் பீகார் துணை முதலமைச்சருமான விஜய் குமார் சின்ஹா நடத்திய விருந்தில் பங்கேற்றதுதான். இது பீகாரின் அரசியல் களத்தில் புதிய விவாதங்களைக் கிளப்பியுள்ளது.
மகர சங்கராந்தி விருந்தும் அரசியல் முக்கியத்துவமும்
பீகாரில் ‘தகி-சூரா’ (தயிர்-அவல்) விருந்து என்பது வெறும் உணவு சார்ந்தது மட்டுமல்ல, அது ஒரு அரசியல் சந்திப்பு தளமாகவும் பார்க்கப்படுகிறது. இன்றைய தினம் மகர சங்கராந்தியை முன்னிட்டு துணை முதலமைச்சர் விஜய் குமார் சின்ஹா ஒரு பிரமாண்ட விருந்தை ஏற்பாடு செய்திருந்தார்.
இந்த விருந்தில் முதலமைச்சர் நிதிஷ் குமார், மற்றொரு துணை முதலமைச்சர் சாம்ராட் சௌத்ரி மற்றும் பல தேசிய ஜனநாயகக் கூட்டணி தலைவர்கள் கலந்து கொண்டனர். ஆனால், அனைவரின் கவனத்தையும் ஈர்த்தது அங்கு வந்திருந்த தேஜ் பிரதாப்தான்.
ஆர்ஜேடி-யிலிருந்து நீக்கமும் சொந்தக் கட்சித் தொடக்கமும்
கடந்த ஆண்டு மே மாதம், தனது தந்தை லாலு பிரசாத்தால் ஆர்ஜேடி கட்சியிலிருந்து தேஜ் பிரதாப் நீக்கப்பட்டார். அவரது “பொறுப்பற்ற செயல்களுக்காக” குடும்ப உறவுகளும் துண்டிக்கப்பட்ட நிலையில், அவர் ‘ஜனசக்தி ஜனதா தளம்’ (JJD) என்ற புதிய கட்சியைத் தொடங்கினார். சமீபத்தில் நடந்த சட்டமன்றத் தேர்தலில் தோல்வியடைந்திருந்தாலும், அவர் தொடர்ந்து அரசியலில் இயங்கிவருகிறார்.
கூட்டணி மாற்றம்? தேஜ் பிரதாப்பின் பதில்
துணை முதலமைச்சர் உடனான சந்திப்பு குறித்து செய்தியாளர்கள் கேட்டபோது, “எங்கள் அரசியல் சித்தாந்தங்கள் வேறாக இருக்கலாம், ஆனால் நமது பண்பாட்டு கலாச்சாரம் ஒன்றுதான். மற்ற விஷயங்கள் குறித்து சரியான நேரத்தில் உங்களுக்குத் தெரியவரும்” என சூசகமாகப் பதிலளித்தார்.
இதேபோல், தேசிய ஜனநாயகக் கூட்டணியில் இணைவீர்களா? என்ற கேள்விக்கு, “காலம் வரும்போது தெரியவரும்” என்று விஜய் குமார் சின்ஹாவும் பதிலளித்தது அரசியல் வட்டாரத்தில் சலசலப்பை ஏற்படுத்தியுள்ளது.
பீகார் அரசியலில் அடுத்த நகர்வு என்ன?
தேஜ் பிரதாப் தனது சகோதரர் தேஜஸ்வி மற்றும் தந்தையிடமிருந்து விலகி, ஆளும் பாஜக -ஐக்கிய ஜனதா தளக் கூட்டணியுடன் நெருக்கம் காட்டுவது பீகார் அரசியலில் ஒரு புதிய திருப்பமாகப் பார்க்கப்படுகிறது. வரும் நாட்களில் அவர் அதிகாரப்பூர்வமாக தேசிய ஜனநாயகக் கூட்டணியில் இணைவாரா என்பதைப் பொறுத்திருந்துதான் பார்க்க வேண்டும்.