டெல்லி,ஜன.24; அமெரிக்க அதிபர் டொனால்ட் டிரம்ப்பின் கடுமையான எச்சரிக்கைகளைத் தொடர்ந்து, ஈரான் எதற்கும் தயாராக இருப்பதாக இந்தியாவுக்கான ஈரானின் உயர் தலைவர் பிரதிநிதி அப்துல் மஜீத் ஹக்கீம் இலாஹி தெரிவித்துள்ளார்.
டிரம்ப்பின் மிரட்டலும் ஈரானின் பதிலடியும்
சமீபத்தில் அமெரிக்க அதிபர் டொனால்ட் டிரம்ப், ஈரானிய தலைவர்களிடமிருந்து ஏதேனும் அச்சுறுத்தல் வந்தால், ஈரான் “பூமியிலிருந்து துடைத்தெறியப்படும்” என்று எச்சரித்திருந்தார். இதற்கு பதிலளித்த அப்துல் மஜீத் ஹக்கீம் இலாஹி, “இந்த மிரட்டல்கள் எங்களுக்குப் புதியதல்ல. எதையும் எதிர்கொள்ள ஈரான் தயாராகவே உள்ளது” என்று திட்டவட்டமாகத் தெரிவித்துள்ளார்.
அணு ஆயுதம் ஹராம்: ஈரானின் நிலைப்பாட்ட வெளிப்படுத்தியவர்
ஈரானின் அணுசக்தித் திட்டம் குறித்த கேள்விக்கு பதிலளித்த
அவர், ஈரான் ஒருபோதும் அணு ஆயுதங்களை உருவாக்க விரும்பியதில்லை என்று கூறினார். ஈரானின் உச்ச தலைவர் அயதுல்லா செய்யது அலி காமேனி வழங்கிய மத ரீதியான ஆணை படி, அணு ஆயுதங்களை வைத்திருப்பது ‘ஹராம்’ (மதத்திற்கு எதிரானது) என்று அவர் குறிப்பிட்டார். ஈரானின் அணுசக்தி நடவடிக்கைகள் மருத்துவம், மின்சாரம் மற்றும் மனிதாபிமான தேவைகளுக்காக மட்டுமே பயன்படுத்தப்படுவதாகவும் அவர் விளக்கமளித்தார்.
சர்வதேச அமைப்புகள் மீதான விமர்சனம்
உலகெங்கிலும் உள்ள சில சர்வதேச அமைப்புகள் சக்திவாய்ந்த நாடுகளின் கட்டுப்பாட்டில் இருப்பதாகவும், அவை நடுநிலையாகச் செயல்படுவதில்லை என்றும் இலாஹி விமர்சித்தார். சர்வதேச அமைப்புகள் தங்களின் பொறுப்பை உணர்ந்து, மக்களின் நலனுக்காகச் செயல்பட வேண்டும் என்றும் அவர் வலியுறுத்தினார்.
மத்திய கிழக்கில் அமைதியே இலக்கு
ஈரான் எப்போதும் அமைதியையும் பாதுகாப்பையுமே விரும்புகிறது. ஆனால் சில நாடுகள் இப்பகுதியில் பதற்றத்தை உருவாக்கி வருகின்றன. இது ஒட்டுமொத்த மத்திய கிழக்கு நாடுகளையும் பாதிக்கும் என்று அவர் எச்சரித்தார். மேலும், ஈரானில் நடந்த போராட்டங்களின் போது இணையத்தளம் முடக்கப்பட்டதற்கு விளக்கம் அளித்த அவர், சமூக அமைதியைப் பாதுகாப்பதற்காகவே இந்த நடவடிக்கை எடுக்கப்பட்டதாகக் கூறினார்.
சர்வதேச அளவில் முக்கியத்துவம் பெறும் ஈரானின் தெளிவான பதில்
அமெரிக்கா மற்றும் ஈரான் இடையே பதற்றம் அதிகரித்து வரும் நிலையில், ஈரானின் இந்தத் தெளிவான பதில் சர்வதேச அரசியலில் முக்கியத்துவம் பெறுகிறது. அச்சுறுத்தல்களுக்குப் பணியாமல், தனது மதக் கோட்பாடுகள் மற்றும் அமைதி கொள்கைகளில் உறுதியாக இருப்பதாக ஈரான் மீண்டும் உலகிற்கு உணர்த்தியுள்ளது.