டெல்லி,பிப்.03; மேற்கு வங்க முதலமைச்சர் மம்தா பானர்ஜி, தேர்தல் ஆணையத்திற்கு எதிராகத் தனது கடும் கண்டனத்தைப் பதிவு செய்துள்ளார். வாக்காளர் பட்டியலில் பெயர் நீக்கம் மற்றும் ‘சிறப்பு தீவிர திருத்த’ (SIR) நடவடிக்கை தொடர்பாகத் தேர்தல் ஆணையரைச் சந்தித்த பிறகு அவர் செய்தியாளர்களிடம் பேசினார்.
தலைமைத் தேர்தல் ஆணையருடன் மம்தா பானர்ஜி சந்திப்பு
திரிணமூல் காங்கிரஸ் தலைவரும், மேற்கு வங்க முதலமைச்சருமான மம்தா பானர்ஜி, டெல்லியில் தலைமை தேர்தல் ஆணையர் ஞானேஷ் குமாரை நேற்று (02.02.2026) சந்தித்தார். அவருடன் 15 பேர் கொண்ட கட்சி நிர்வாகிகளும், தீவிர வாக்காளர் பட்டியல் திருத்தத்தால் பாதிக்கப்பட்ட ஏராளமான பொதுமக்களும் சென்றனர்.
“இவ்வளவு ஆணவமான தலைமைத் தேர்தல் ஆணையரை பார்த்ததில்லை”
தலைமைத் தேர்தல் ஆணையர் உடனான சந்திப்புக்குப் பிறகு செய்தியாளர்களிடம் பேசிய மம்தா பானர்ஜி, ‘‘நான் மிகவும் வருத்தமாக இருக்கிறேன். நான் டெல்லி அரசியலில் நீண்ட காலமாக இருக்கிறேன். 4 முறை அமைச்சராகவும், 7 முறை நாடாளுமன்ற உறுப்பினராகவும் இருந்துள்ளேன்.
இவ்வளவு ஆணவமாகவும் இவ்வளவு பொய் பேசுபவராகவும் இருக்கும் ஒரு தலைமைத் தேர்தல் ஆணையரை நான் பார்த்ததே இல்லை. அவர் எங்களை அவமானப்படுத்தினார். உங்கள் நாற்காலியை நான் மதிக்கிறேன் என்று நான் அவரிடம் சொன்னேன். ஆனால், எந்த நாற்காலியும் யாருக்கும் நிரந்தரமல்ல. ஒரு நாள் நீங்கள் வெளியேறத்தான் வேண்டும்.
பெயர்கள் நீக்கம் மற்றும் பாகுபாடு குற்றச்சாட்டு
பெயர் எழுத்துப்பிழை மற்றும் குடும்பப் பெயர்களில் (Surnames) உள்ள சிறு மாற்றங்களைச் சுட்டிக்காட்டி மேற்குவங்கத்தில் சுமார் 58 லட்சம் வாக்காளர்களின் பெயர்கள் நீக்கப்பட்டுள்ளதாக மம்தா குற்றஞ்சாட்டினார். குறிப்பாக, பட்டியல் இனத்தவர்கள் (SC) மற்றும் சிறுபான்மையினர் இலக்கு வைக்கப்படுவதாகவும் அவர் சாடினார்.
“மேற்கு வங்கத்தில் பானர்ஜி-பந்தோபாத்யாய என பெயர்களில் மாற்றங்கள் இருப்பது வழக்கம். இதை சாக்காக வைத்து பெயர்களை நீக்குவது முறையற்றது. தேர்தல் ஆணையம் என்பது பாஜகவின் ஐடி பிரிவு (IT Cell) போலச் செயல்படுகிறது” என்று மம்தா விமர்சித்தார்.
தேர்தல் ஆணையம் மீது கடும் சாடல்
“தேர்தல் ஆணையம் எங்களுக்கு நீதியை வழங்கவில்லை, மாறாகப் பொய்களின் குப்பையைத்தான் (Garbage of lies) வழங்கியுள்ளது. இது ஒரு ஜனநாயக நாடு தானா?” என்று அவர் கேள்வி எழுப்பினார்.
மேலும், பாஜக ஆளும் அஸ்ஸாம் போன்ற மாநிலங்களில் இத்தகைய நடவடிக்கைகள் ஏன் எடுக்கப்படவில்லை என்றும், கேரளா, தமிழ்நாடு மற்றும் வங்காளம் போன்ற மாநிலங்கள் மட்டும் ஏன் குறிவைக்கப்படுகின்றன என்றும் மம்தா பானர்ஜி வினவினார்.
தேர்தல் ஆணையத்தின் விளக்கம்
மறுபுறம், தேர்தல் ஆணைய வட்டாரங்கள் இந்தக் குற்றச்சாட்டுகளை மறுத்துள்ளன. சட்டத்தின் விதிகளின்படியே அனைத்தும் நடப்பதாக தேர்தல் ஆணையம் தெரிவித்துள்ளது. தேர்தல் பணிகளில் ஈடுபடும் அதிகாரிகளை மிரட்டுவது அல்லது அலுவலகங்களைச் சேதப்படுத்துவது போன்ற செயல்கள் மீது கடும் நடவடிக்கை எடுக்கப்படும் என்றும் ஆணையம் எச்சரித்துள்ளது.
மேற்கு வங்கத்தில் புயலைக் கிளப்பியுள்ள S.I.R விவகாரம்
மேற்கு வங்கத் தேர்தலுக்கு முன்னதாக வாக்காளர் பட்டியல் விவகாரம் பெரும் அரசியல் புயலைக் கிளப்பியுள்ளது. மம்தா பானர்ஜியின் இந்தப் போராட்டம் மற்றும் தேர்தல் ஆணையத்தின் மீதான அவரது நேரடித் தாக்குதல், வரும் நாட்களில் தேசிய அரசியலில் பெரும் தாக்கத்தை ஏற்படுத்தும் என எதிர்பார்க்கப்படுகிறது.