டெஹ்ரான்,மார்ச்.06; மத்திய கிழக்கில் போர் பதற்றம் அதிகரித்து வரும் நிலையில், ஈரானின் அடுத்த உச்ச தலைவரைத் தேர்ந்தெடுக்கும் செயல்பாட்டில் அமெரிக்கா முக்கியப் பங்காற்ற வேண்டும் என்று அதிபர் டொனால்ட் டிரம்ப் அதிரடியாகத் தெரிவித்துள்ளார். சமீபத்தில் ஈரான் மீது அமெரிக்கா மற்றும் இஸ்ரேல் நடத்திய தாக்குதலில் உச்ச தலைவர் அயதுல்லா அலி கமேனி கொல்லப்பட்டதைத் தொடர்ந்து இந்த விவாதம் எழுந்துள்ளது.
கமேனியின் மகனுக்கு டிரம்ப் எதிர்ப்பு
ஊடகவியலாளர் சந்திப்பில் பேசிய டிரம்ப், கமேனியின் மகனான 56 வயது மொஜ்தாபா கமேனியை ஈரானின் அடுத்த தலைவராக ஏற்பதற்கில்லை என்று திட்டவட்டமாகத் தெரிவித்தார். அவரை ஒரு “திறமையற்றவர்” (Lightweight) என்று குறிப்பிட்ட டிரம்ப், பழைய கொள்கைகளையே கடைப்பிடிக்கும் ஒருவரைத் தலைவராக அமர்த்தினால், மீண்டும் ஐந்து ஆண்டுகளில் ஒரு போர் உருவாகும் சூழல் ஏற்படும் என்று எச்சரித்துள்ளார்.
வெனிசுலா பாணியில் மாற்றம்
வெனிசுலாவில் நிக்கோலஸ் மதுரோவுக்குப் பிறகு டெல்சி ரோட்ரிக்ஸை அங்கீகரித்ததைப் போல, ஈரானிலும் அமைதி மற்றும் நல்லிணக்கத்தைக் கொண்டுவரும் ஒரு தலைவரைத் தேர்ந்தெடுப்பதில் அமெரிக்கா நேரடியாக ஈடுபட வேண்டும் என்று அவர் வலியுறுத்தினார். “ஈரானிய மக்கள் தங்கள் நாட்டை மீட்டெடுக்க நாங்கள் உதவ விரும்புகிறோம்” என்றும் அவர் கூறினார்.
ஈரானின் தற்போதைய நிலை
தற்போது ஈரானில் புதிய தலைவரைத் தேர்ந்தெடுப்பதற்கான அதிகாரப்பூர்வ அறிவிப்புகள் இன்னும் வெளியாகவில்லை. இருப்பினும், கமேனியின் மகனான மொஜ்தாபாவே முன்னிலையில் இருப்பதாகக் கருதப்படுகிறது. ஆனால், இஸ்ரேல் மற்றும் அமெரிக்காவின் தொடர் தாக்குதல்கள் ஈரானின் ராணுவ மற்றும் தலைமைத்துவ கட்டமைப்பைச் சிதைத்துள்ளதால், அடுத்த கட்ட நகர்வு பெரும் எதிர்பார்ப்பை ஏற்படுத்தியுள்ளது.
ஈரான் விவகாரம்; எல்லை மீறும் அமெரிக்காவின் தலையீடு
ஈரானின் உள்நாட்டு விவகாரங்களில் அமெரிக்கா இவ்வளவு வெளிப்படையாகத் தலையிட விரும்புவது சர்வதேச அரசியலில் பெரும் பரபரப்பை ஏற்படுத்தியுள்ளது. அமெரிக்கா எல்லை மீறுவதாக குற்றச்சாட்டு எழுந்துள்ளது. போரை நிறுத்தி அமைதியை நிலைநாட்ட விரும்பும் டிரம்பின் இந்த முடிவு, மத்திய கிழக்கு நாடுகளின் எதிர்காலத்தை எப்படி மாற்றப்போகிறது என்பதைப் பொறுத்திருந்துதான் பார்க்க வேண்டும்.