சென்னை,மார்ச்.26; தமிழ்நாடு சட்டப்பேரவைத் தேர்தல் களம் தற்போது சூடுபிடிக்கத் தொடங்கியுள்ளது. கூட்டணிப் பேச்சுவார்த்தைகள், தொகுதிப் பங்கீடுகள் முடிந்து வேட்பாளர் பட்டியல்கள் வெளியாகிக் கொண்டிருக்கும் நிலையில், தலைநகர் சென்னையில் அதிமுக எடுக்கப்போகும் ஒரு முக்கிய முடிவு அரசியல் வட்டாரங்களில் பெரும் எதிர்பார்ப்பை ஏற்படுத்தியுள்ளது.
சென்னையில் அதிமுகவின் வியூகம்
கடந்த 2021 தேர்தல் சென்னையில் ஒரு தொகுதியில் கூட வெற்றி பெற்றிராத அதிமுக இம்முறை வெற்றிக்கனியை பறிக்க கட்சியின் பொதுச்செயலாளர் எடப்பாடி பழனிசாமி தீவிரமாக உள்ளார். குறிப்பாக, பெண்கள் மற்றும் இளைஞர்களின் வாக்குகளைக் கவரும் வகையில் வேட்பாளர் தேர்வில் சில அதிரடி மாற்றங்களைச் செய்ய அதிமுக தலைமை திட்டமிட்டுள்ளதாகத் தெரிகிறது.
3 பெண் வேட்பாளர்கள்: ஒரு அதிரடித் திட்டம்
சென்னையில் திரு.வி.க. நகர், ஆயிரம் விளக்கு மற்றும் அண்ணா நகர் ஆகிய மூன்று தொகுதிகளில் பெண் வேட்பாளர்கள் களமிறக்கப்பட வாய்ப்பிருப்பதாகப் பேசப்படுகிறது.
ஆயிரம் விளக்கு தொகுதியில் முன்னாள் அமைச்சர் பா.வளர்மதியும், அண்ணா நகரில் கோகுல இந்திராவும் போட்டியிட இருப்பதாக தகவல் வெளியாகி உள்ளது. அதேபோன்று திரு.வி.க.நகர் தொகுதியில் ஆம்ஸ்ட்ராங்கின் மனைவி பொற்கொடி களமிறங்க உள்ளதாகவும் பேசப்படுகிறது.
கள நிலவரம் என்ன?
திமுக தலைமையிலான கூட்டணி வலுவாக இருக்கும் சூழலில், அதிமுக-பாஜக கூட்டணி தனது பலத்தை நிரூபிக்க வேண்டிய கட்டாயத்தில் உள்ளது. சென்னையில் பெண் வேட்பாளர்களைக் களமிறக்குவது என்பது ஒரு குறியீடாக மட்டும் இல்லாமல், களப் பணியிலும் பெரிய மாற்றத்தை ஏற்படுத்தும் என அரசியல் விமர்சகர்கள் கருதுகின்றனர்.
அதிமுகவின் இந்த 3 பெண் வேட்பாளர்கள் திட்டம் அதிகாரப்பூர்வமாக அறிவிக்கப்பட்டால், அது சென்னையின் தேர்தல் போட்டியை மேலும் சுவாரஸ்யமாக்கும். பெண் பிரதிநிதித்துவத்திற்கு முக்கியத்துவம் அளிப்பது அதிமுகவின் வெற்றி வாய்ப்பை அதிகரிக்குமா என்பதைப் பொறுத்திருந்துதான் பார்க்க வேண்டும்.