டெல்லி,ஏப்.17; மக்களவையில் இன்று (ஏப்ரல் 17, 2026) நடைபெற்ற தொகுதி மறுவரையறை மற்றும் மகளிர் இடஒதுக்கீடு தொடர்பான விவாதத்தில், காங்கிரஸ் எம்.பி சசி தரூர் மத்திய அரசை கடுமையாகச் சாடினார். இந்த நடவடிக்கை இந்தியாவின் கூட்டாட்சித் தத்துவத்தைச் சிதைக்கும் என்று அவர் எச்சரிக்கை விடுத்துள்ளார்.
கூட்டாட்சித் தத்துவத்திற்கு ஆபத்து
தொகுதி மறுவரையறை (Delimitation) என்பது வெறும் வரைபடங்களை மாற்றியமைக்கும் நிர்வாகச் செயல்முறை மட்டுமல்ல, இது இந்தியாவின் அரசியல் அதிகார மையத்தை மாற்றியமைக்கும் ஒரு ஆழமான நடவடிக்கை என்று சசி தரூர் குறிப்பிட்டார். “மத்திய அரசு கொண்டு வந்துள்ள இந்தத் திட்டம், நமது கூட்டாட்சித் தத்துவத்தின் கட்டமைப்பையே (Fabric of Federalism) கிழித்து எறிந்துவிடும்” என்று அவர் கவலை தெரிவித்தார்.
அரசியல் பணமதிப்பிழப்பு (Political Demonetisation)
2016-ல் கொண்டுவரப்பட்ட பணமதிப்பிழப்பு நடவடிக்கை நாட்டுக்கு எத்தகைய பாதிப்புகளை ஏற்படுத்தியதோ, அதே போன்ற ஒரு ‘அரசியல் பணமதிப்பிழப்பு’ நடவடிக்கையாக இந்தத் தொகுதி மறுவரையறை அமையும் என்று அவர் விமர்சித்தார். “பணமதிப்பிழப்பு நடவடிக்கையில் காட்டிய அதே அவசரத்தை இதிலும் காட்டுகிறீர்கள். அதன் விளைவு என்ன ஆனது என்பது நமக்குத் தெரியும். தயவுசெய்து இதைச் செய்யாதீர்கள்” என அவர் மக்களவையில் வலியுறுத்தினார்.
முள்வேலிக்குள் மகளிர் இடஒதுக்கீடு
மகளிர் இடஒதுக்கீட்டை தொகுதி மறுவரையறையுடன் இணைப்பது, இந்தியப் பெண்களின் கனவுகளைப் பிணைக்கைதியாக வைத்திருப்பதற்குச் சமம் என்று அவர் சாடினார்.
“பிரதமர் மோடி மகளிர் இடஒதுக்கீட்டை ஒரு நீதிக்கான பரிசாகக் கொடுக்கிறார். ஆனால் அந்தப் பரிசைச் சுற்றி ‘முள்வேலி’ கட்டப்பட்டுள்ளது” என்று தரூர் உருவகமாகத் தெரிவித்தார்.
தற்போதைய மக்களவை உறுப்பினர்களின் எண்ணிக்கையிலேயே மகளிர் இடஒதுக்கீட்டை உடனடியாக அமல்படுத்த முடியும் என்றும், அதற்குத் தொகுதி மறுவரையறை வரை காத்திருக்கத் தேவையில்லை என்றும் அவர் வாதிட்டார்.
மக்கள் தொகை கட்டுப்பாட்டைப் பின்பற்றிய மாநிலங்களுக்குத் தண்டனையா?
தென்னிந்திய மாநிலங்கள் மற்றும் மக்கள் தொகையைக் கட்டுப்படுத்திய மாநிலங்கள் குறித்துப் பேசிய அவர், “சிறந்த நிர்வாகத்தையும், மக்கள் தொகைக் கட்டுப்பாட்டையும் கடைப்பிடித்த மாநிலங்களுக்கு, அரசியல் செல்வாக்கைக் குறைப்பதன் மூலம் மத்திய அரசு தண்டனை வழங்கப் போகிறதா?” என்ற கேள்வியை எழுப்பினார். இது ஒரு ‘மக்கள்தொகை பெரும்பான்மைவாத எதேச்சதிகாரத்திற்கு’ (Tyranny of Demographic Majority) வழிவகுக்கும் என்றும் அவர் எச்சரித்தார்.
சிக்கலான விசயங்களை அவசரமாக நிறைவேற்றக்கூடாது
தொகுதி மறுவரையறை போன்ற சிக்கலான விஷயங்களை அவசரமாக நிறைவேற்றக் கூடாது என்றும், அனைத்துக் கட்சிகளுடனும் விரிவான ஆலோசனைகளை நடத்திய பின்னரே இறுதி முடிவு எடுக்கப்பட வேண்டும் என்றும் சசி தரூர் தனது உரையில் கேட்டுக்கொண்டார்.